Read Nguna Togoa Etafe North KI YAKOBO 5 Bible Online

KI YAKOBO 5 - Nguna Togoa Etafe North bible

KI YAKOBO 5

¹Kuga umai ragi waia, tea vei sogolapa maga, kuga tagi doko do lalagaarova nalakena narogokitesaana animu maga waina eu do umai.

²Nasogolapaana animu maga eu madada, go sugoro animu maga eu pei tea kaniana ki tuluki maga.

³Kold go silver animu ero dum̃ada madani ra; go namadaniana kakada ega wo pei nanoasokisokiana sikai dip̃a mu, go ega wo gani nap̃okasimu dapala nakapu vavaga. Ku daua ki naloriki animu maga dip̃a naaleatia edaku maga.

⁴Kuga leo, namoriana ki tea wosiwosi maga waina eu dagaukotovi vanua animu maga, waina e pei tea lawogoroana, e do pioso; go nakuapiosoana ki tea maga waina eu dagaukotovi eu sili paki nadaliga ni Yehovah ni taua maga.

⁵Ku doko namaroana maramana, po ganikani po munu po sori p̃aragoto; ku pagani nap̃op̃omu naaleatia ni namaripunueana.

⁶Ku dip̃akotovi, ku mari punue tea leana; e da dugoro mu mau.

⁷Nalakena tea wanogoe kuga vei maritasoki‐parau, tai maga, pa pa paki naumaiana ki Nawota. Kuga leo, tea wosiwosi natano e do leogoro nawa wia ni natano, e pei maritasoki‐parau nalo kakana, pa pa ega tape sua usa vea go tea edaku.

⁸Nimu ma kuga vei maritasoki‐parau; kuga lawosoki nap̃op̃omu; nalakena naumaiana ki Nawota e pei m̃aladigi.

⁹Kuga ta dauruuru, tai maga, dum̃amu dip̃a mu mau, naga kuga ta pei tea vasap̃otaeana mau: kuga leo, tea vasa p̃otae e lawodu narae ni namata maga.

¹⁰Tai maga, kuga tape profeta maga waina eu pasa doko nagisa ni Yehovah, euga vei naviseikiana sikai ni narogokitesaana go naveimaritasokiparauana.

¹¹Kuga leo, tu soso tea maga waina eu soki ki tea maropa: ku dogo nasokiana ki Yob, go ku punusi tea waina Yehovah e edaku mari a, nalakena Yehovah e pei maritadodomi p̃arua, go e pei p̃op̃ododomi.

¹²Ma pea ki sara naleo, taigu maga, kuga ta pivisa mau, pae nakoroatelagi mau, kite pae maramana mau kite pae te navivisaana p̃ota mau: ma ioro animu ega vei ioro go ee ega vei ee; naga kuga ta dowo paki etano ki navasasap̃otaeana mau.

¹³Te naata sikai e dogokitesa m̃aleoputo kakamu kite? Ega tapasavasa. Te naata sikai e marasike kite? Ega lega samasamani.

¹⁴Te naata sikai e sasana m̃aleoputo kakamu kite? Ega soso tea matua maga ni ekalesia euga umai punusi a; go euga tapasavasa goro e, ragi waina euga vuvurai ki sua e ki naroro doko nagisa ni Nawota:

¹⁵go natapasavasaana ni nasaralomauana ega wo mautipauri tea waina e sasana, go Nawota ega wo sike a ega tuleana; go e pe mari namarinaleosaana maga, euga wo maneana pei tea midoakikorokoroana.

¹⁶Nalakena tea wanogoe kuga noa sai dum̃amu paki mu natapiriana animu maga, go kuga tum̃amu manimu dapasavasa, naga kuga vei tea maripauriana. Navavaraniana wosiwosi ki tea leana sikai e marimatua p̃arua.

¹⁷Eliyah e pei naatam̃oli sikai waina e sua narogoana maga dakiusi gida, go e dapasavasa ki natapasavasaana naga usa ega ta p̃owo mau; go usa e da p̃owo navanua mau natau dolu go atelagi latesa.

¹⁸Go e moro dapasavasa; go nakoroatelagi e pitua ki usa, go navanua e dau ki nawana.

¹⁹Taigu maga, te naata sikai m̃aleoputo kakamu e pe vei tea viragisasap̃okiana m̃elu dua ki nalomauana, go te naata sikai e pe vuadoa e;

²⁰ega atae naga tea waina e puadoa tea mari naleo sa sikai m̃elu dua ki nasasap̃oana ni napua aneana, ega wo mautipauri naatana sikai pa dua ki namateana, go ega wo kovagoro taua ni namarinaleosaana maga.