Read Nguna Togoa Etafe North 1 KI PETERO 2 Bible Online

1 KI PETERO 2 - Nguna Togoa Etafe North bible

1 KI PETERO 2

¹Nalakena tea wanogoe waina ku doropusi sua sara navilosiana, go sara nasorosoroana, go naveinakalep̃oana maga, go naroitoiana maga, go navasapinoakiana maga mamau puti,

²dapala pipia maga waina eu po pakilina, kuga masau p̃arua ki milk ni namidodoana waina nasorosoroana e dika asa, naga kuga to disu po p̃arua asa paki namautipauriana;

³ku pe munudogo naga Nawota e pei tea vakale:

⁴waina ku do umai paki nia waina e pei vatu mauri sikai, tea tip̃adoaana lomau pae naatam̃oli maga, ma narae ni Sup̃e tea matadoaana, tea dodomadaganiana,

⁵nimu ma, dapala vatu mauri maga, ku do pei tea tavagiana nasum̃a sikai ni naatana, naga kuga vei naveiteaviriana tautau sikai, naga kuga to pitua ki naviriana maga ni naatana, tea viragim̃atakiana ki Sup̃e pae Yesu Kristo.

⁶Nalakena e doko navasaana midiriana, e naga, Kuga leo, a doropusi doko Sion vatu laketano warua sikai ni naweluki, tea matadoana, tea dodomadaganiana: Go tea waina e saralomau asa ega wo da pei tea mariana ega maliere mau.

⁷Nalakena tea wanogoe e manimu waina ku saralomau pei nadodomadaganiana: ma magi tea maga waina eu da saralomau mau, Vatu waina tea tavagi maga eu leodoa e, Nae e pei tea mariana e pei nap̃au ni naweluki:

⁸Go Vatu sikai ni natapilagonaana, go vatu laketoko sikai ni natapilagona‐dowoana; Waina eu do dapilagona navasaana, doko do dogopiri a: waina eu pei tea tawonakiana paki asa.

⁹Ma nimu ku pei naworawora matadoaana sikai, naveiteaviriana ki nawota sikai, nalauna tautau sikai, narei sikai waina kuga vei tea veaniana taluaana aneana, naga kuga rogorogo ki nawialuaana maga ki tea waina e soso mu m̃elu dua ki namaligo paki namarama magaana aneana:

¹⁰waina sala vea ku da pei narei sikai mau, ma ragi waia ku pei narei ki Sup̃e: waina ku da pei tea dodomiana mau, ma ragi waia ku pei tea dodomiana.

¹¹Tea dodomiana maga, a pasa parati ki mu, waina ku dapala nam̃enaki maga go atatoko maga, naga kuga tum̃amu mauti mu ki namasauana sa maga ni nap̃okasimu, waina eu do mari navakalo dip̃a naatamu;

¹²kuga veani natomariana animu ega wia m̃aleoputo ni tea ni nalauna p̃ota maga; naga, nalo ni tea waina eu pasa pinoa ki mu asa, dapala ku pei tea mari naleo sa maga, euga, nalakena nawosiana wia animu maga, waina eu do leopunusi ra, samasamani Sup̃e naaleatia ni naumaileopunusiana.

¹³Kuga toko etano paki sara natawonakiana ki naatam̃oli nalakena Nawota: e pe vei paki nawota, waina e pakilagi liu;

¹⁴kite e pe vei paki tea maramara maga, waina eu pei tea tautauana aneana maga, naga euga mari nasikoana paki tea mari naleo sa maga, go nasamasamaniana paki tea mari naleo p̃ia maga.

¹⁵Nalakena namasauana ki Sup̃e e dapala waia, naga kuga to mari naleo p̃ia po mari naveisap̃oana ki naatam̃oli midoakisap̃o wanogoe maga ega vunuta:

¹⁶kuga tapala ku pei tea veresiana dum̃amu doko, ma kuga ta dapala ku peani naveresi‐mu‐ana e pei tea kovagoro sikai ni nasigisigileoana mau, ma kuga tapala naviti maga ki Sup̃e.

¹⁷Kuga dodomadagani tea maga mamau puti. Kuga dodomi navei‐taigidaana. Kuga matau ki Sup̃e. Kuga dodomadagani nawota.

¹⁸Tea suasua maga, kuga to doko etano paki nawota animu maga pilake sara namatakuana; ega ta paki tea wia maga go tea mari matemate maga sikida mau, ma ega vaki tea tagele maga.

¹⁹Nalakena tea waia e pei tea dodom̃atakiana, te naata sikai e pe soki narogokitesaana nalakena natum̃anaataeaana paki Sup̃e ragi waina e pei tea mariana e pitinu dagele.

²⁰Nalakena e pe vei nasamasamaana dapale sava, ku pe soki a ragi waina ku mari naleo sa po pei tea tukiana asa? Ma ku pe soki a ragi waina ku mari naleo p̃ia po pei tea mariana ku pitinu asa, tea wanogoe e pei tea dodom̃atakiana narae ni Sup̃e.

²¹Nalakena ku pei tea sosoana paki tea wanogoe: nalakena Kristo ma e manimu pei tea mariana e pitinu, doko manimu doropusi naatulakeana sikai, naga kuga rausi naatum̃eleana aneana maga:

²²waina e da mari te namarinaleosaana mau, go te nasorosoroana e da pei tea vap̃aiana doko nawokana mau:

²³waina, ragi waina e pei tea suoriana, e da suori liliu mau; ragi waina e pei tea mariana e pitinu e da pasadip̃akotovi mau; ma e pituaki paki tea waina e do pasa p̃otae leana:

²⁴waina e dum̃ana dapetape namarinaleosaana anigida maga eu doko nap̃atokona sake paki nakau ragi waina e dau asa dau, naga tuga mate paki namarinaleosaana maga, po mauri paki namarinaleoleanaana; ku pei tea maripauriana ki wotu maga ni navarati‐a‐ana.

²⁵Nalakena ku do sasap̃o dapala shiip maga; ma ku liliu umai ragi waia punusi Tea Leo paratiki ni shiip go Tea Leo paratiki dap̃au ni naatamu maga.