Read Nguna Togoa Etafe North 1 KI PETERO 3 Bible Online

1 KI PETERO 3 - Nguna Togoa Etafe North bible

1 KI PETERO 3

¹Dapala nogoe, nagoroi maga, kuga toko etano paki naanoai animu maga; naga, nara seara eu pe rogopiri navasaana, euga vei tea taluaana pae natomariana ki nagoroi adeada maga navasaana e dika;

²ragi waina eu do leopunusi natomariana tautau animu waina e pilake namatakuana.

³Waina narekeiana animu ega ta pei narekeiana ni etaku mau, tea ni navirinalolu‐ana, go ni natalikiana ni naleo maga ni kold,

⁴kite ni nasuni‐sugoroana; ma ega vei naatam̃oli sili ni nap̃op̃omu, waina e suni sugoro waina e da madada mau, ni naatana matemate go tatam̃ate, waina e pei tea waina navakokotoana kakana e p̃arua namata ni Sup̃e.

⁵Nalakena dapala nogoe tuai nagoroi tautau maga, waina eu leogoro pavatu Sup̃e, eu dum̃ada dekei ki da, eu doko etano paki naanoai adeada maga:

⁶dapala waina Sarah e dogo paratiki nadaleo ni Abraham, po soso e ki nawota: waina ku pei natuna maga ragi waina ku do marinaleop̃ia, po da mataku ki tea mataukiana sikai mau.

⁷Naanoai maga, dapala nogoe, kuga to doko sikoti nagoroi animu maga, ega vae naataeana, dapala e pei lasa manainai, doko do dua ra nadodomadaganiana dapala nara go nimu ku mamau peani nasaup̃iaana ni namauriana; naga natapasavasaana animu euga ta pei tea tugoroana mau.

⁸Go tea edaku, kuga mamau puti pei tea p̃op̃o sikai maau, tea p̃op̃o rogosikoti, tea dodomi taigida maga, tea vei maritadodomi, tea p̃op̃o vakitano:

⁹kuga ta lagati pitua ki tea sa dip̃a tea sa mau, kite nasuoriana dip̃a nasuoriana mau; ma ega vanop̃ota ki nia kuga to pasa p̃ia ki nalakena ku pei tea sosoana paki tea wanogoe, naga kuga veani navasap̃iakiana sikai.

¹⁰Nalakena, Naata waina e masauna naga ega dodomi namauriana, Po punusi naaleatia wia maga, Ega mari namenana ega makoto ki tea sa, Go nagolena naga eroga ta pasa nasorosoroana mau:

¹¹Go ega tawasi m̃elu dua ki tea sa, go ega mari tea wia; Ega laaga natam̃ateana, po sava dausi a.

¹²Nalakena namata ni Yehovah ero paki tea leana maga, Go nadaligana ero paki navavaraniana adeada: Ma narae ni Yehovah e dip̃a tea maga waina eu do mari naleo sa.

¹³Go ku pe vei tea suisui ni tea waina e p̃ia, tea waina ega wo mari sa ki mu e pei sei?

¹⁴Ma ku pe vei tea mariana ku pe vitinu nalakena namarinaleoleanaana, ku maro pa: go kuga ta mataku ki namatakuana adeada mau, go kuga ta m̃anaunau mau.

¹⁵Ma kuga tapugoro Kristo Nawota doko nap̃op̃omu: doko do pei tea mari m̃ata sua sara ragi naga kuga vitua ki navasakorokoroana sikai paki sara naatam̃oli waina eu datagovi mu ki naatusiana nalo ni naleogoroana waina e doko mu, ma ega vilake namatemateana go namatakuana:

¹⁶doko do peani natum̃amu‐atae‐mu‐ana wia, naga, nalo ni tea waina ku pei tea vasapinoakiana asa, tea maga waina eu pasadao natomariana wia animu doko Kristo euga maliere.

¹⁷Nalakena namasauana ki Sup̃e, e pe masauna, e pe wia naga kuga vei tea mariana kuga vitinu ragi waina ku mari naleo p̃ia, liu naga kuga vei tea mariana kuga vitinu ragi waina ku mari naleo sa.

¹⁸Nalakena Kristo ma e paka sikai pei tea mariana e pitinu nalakena namarinaleosaana, tea leana oli tea tagele maga, naga ega viragi gida umai paki m̃aladigi ki Sup̃e, e pei tea maripunueana lomau nalo ni nap̃okasina, ma e pei tea vakamaurikiana nalo ni naatana;

¹⁹waina e doko asa pano po dogorogo paki naatana maga waina eu doko tokora ni nakokoroana, waina eu dogopiri sala vea,

²⁰ragi waina namarita‐soki‐parau‐ana ki Sup̃e e do leogoro naaleatia maga ki Noah, ragi waina areka e do pei tea marim̃atakiana, waina tea visa maau, tea wanogoe e pei naatam̃oli latolu, eu sili asa, po pei tea mautipauriana pae noai:

²¹waina natakiusiana kakana e do mautipauri mu ragi waia, nabapetisoana, e da pei natoropusiana ni naloaana ni nap̃okasimu mau, ma e pei navusuusuana ni natum̃amu‐ataemu‐ana wia paki Sup̃e, pae namoroduleanaana ki Yesu Kristo;

²²waina e doko pisari nam̃elearu ni matua ni Sup̃e, e paki nakoroatelagi pano; agelo maga go tea vei nawota maga go tea kasua maga eu doko etano paki nia.