Read Nguna Togoa Etafe North 1 KI PETERO 5 Bible Online

1 KI PETERO 5 - Nguna Togoa Etafe North bible

1 KI PETERO 5

¹Nalakena tea wanogoe a pasa paratiki tea matua maga waina eu doko m̃aleoputo kakamu, waina a pei tea matua sikai sikoti mu, go tea noa sokisoki sikai ni narogokitesaana maga ki Kristo, go waina a pei tea saisai sikai peani nasamasamaana waina ega wo pei tea maripakasakiana:

²Kuga leo paratiki pakale navata ni shiip ki Sup̃e waina eu doko m̃aleoputo kakamu, kuga to leo paratiki da, ega ta pae navasadiemu‐ana mau, ma ega vae narakarakaana, ega vae namasauana ki Sup̃e; go ega ta pae namasauana ni nataluaana sa mau, ma ega vae p̃op̃o suasua;

³go ega ta dapala ku pei nawota maga dap̃au tea veaniana maga mau, ma kuga tum̃amu mari mu kuga vei naatulakeana maga ni navata.

⁴Go ragi waina Nap̃au ni tea leo paratiki maga ega wo pakilina, kuga wo dape vauvau ni nasamasamaana waina ega wo da kokolo mau.

⁵Dapala nogoe, natureai maga, kuga toko etano paki tea matua maga. Go kuga mamau puti dum̃amu dasoki mu ki naveip̃op̃ovakitanoana, naga kuga tum̃amu manimu suasua: nalakena Sup̃e e dugoro tea leo madaga maga, ma e dua tea vakitano maga nasaup̃iaana.

⁶Nalakena tea wanogoe kuga tum̃amu doro mu pakitano etano ki nam̃elearu kasua ni Sup̃e, naga ega tape mu pakilagi te ragi;

⁷go kuga to nadi ki namidoakiparatikiana mamau animu paki nia, nalakena e midoaki paratiki nalo kakamu.

⁸Kuga to midodoa p̃ia, kuga to leleogoro: tea kokona ki mu, diabolo, dapala laion waina e do uru, e do surata pasara, e do laaga tea waina ega tinomi a:

⁹waina kuga to lawodugoro e doko kasua nalo ni nasaralomauana animu, ku atae naga narogokitesaana maga sikai maau eu do pei tea marisuaana nalo ni taimu maga waina eu doko maramana.

¹⁰Ma Sup̃e ni sara nasaup̃iaana, waina e soso mu doko Kristo paki nasamasamaana aneana waina e du mau du, ragi waina kuga vei tea mariana kuga vitinu sua ragi kiki, ega wo dum̃ana mari mu kuga wia lua, ega wo lawosoki mu, ega wo mari mu kuga kasua.

¹¹Waina namarakiana ega vei aneana pa pa ega tu du po du mau du. Amen.

¹²Pae Silvano, taigida lomau, dapala waina a midoaki nia asa, a midiri paki mu pae navasaana visa maau, doko do pasa paratiki mu, po do noa sokisoki kasua naga tea waia e pei nasaup̃iaana lomau ki Sup̃e: kuga to lawodu asa.

¹³Tea waina e doko Babelon, tea matadoaana sikoti mu, e pasadodomi mu, go Marko natugu.

¹⁴Kuga tum̃amu pasadodomi mu ki natum̃iliana sikai ni nadodomiana. Natam̃ateana ega vei animu maga mamau puti waina ku doko Kristo.