Read Nguna Togoa Etafe North 2 KI PETERO 1 Bible Online

2 KI PETERO 1 - Nguna Togoa Etafe North bible

2 KI PETERO 1

¹Simon Petero, tea suasua sikai go apostolo sikai ki Yesu Kristo, a midiri paki tea maga waina eu dape nasaralomauana wia dakiusi aginami doko namarinaleoleanaana ki Sup̃e anigida go Tea Maumau pauri anigida Yesu Kristo:

²Nasaup̃iaana go natam̃ateana eroga manimu pei tea mariana eroga laapa doko naataem̃atakiana ni Sup̃e go ni Yesu Nawota anigida;

³Dapala waina nakasuaana ki Sup̃e aneana e dua m̃oli ki gida naleo maga mamau puti waina eu pei tea ni namauriana go naga tuga matau ki Sup̃e, pae naataem̃atakiana ni tea waina e soso gida ki nasamasamaana go ki namarimatuaana aneana;

⁴waina e dua m̃oli ki gida pae ara nasaiana wia aneana maga waina eu p̃arua liu; naga kuga vae tea wanogoe maga pei tea mariana kuga saisai pilake namarianawia ragi waina kuga sava sua m̃elu dua ki namadadaana waina e doko maramana nalakena namasauana sa.

⁵Go nalakena tea wanogoe kuga to piragi paki ara sara nam̃arekarekaana, po do pitua ki namarimatuaana ega toko nasaralomauana animu; go naataeana ega toko namarimatuaana animu;

⁶go natum̃amusokimuana ega toko naataeana animu; Go nasokiana ega toko natum̃amusokimuana; go namataukiana paki Sup̃e ega toko nasokiana animu;

⁷Go nadodomiana paki taigida ega toko namataukiana ki Sup̃e animu; Go nadodomiana ega toko nadodomiana paki tai mu.

⁸Nalakena tea maga wanogoe eu pe vei animu po do laapa, euga wo mari mu naga kuga ta doko m̃oli mau go naga kuga ta pei tea oro mau paki naataem̃atakiana ni Nawota anigida Yesu Kristo.

⁹Nalakena tea waina e dika ki tea maga wanogoe e kesa, e mari sa leo paki uvea, e malio ki nasarueana m̃elu dua ki namarinaleosaana tuai aneana maga.

¹⁰Nalakena tea wanogoe, tai maga, kuga mari m̃arekareka p̃arua liu naga kuga mari nasoso‐mu‐ana go namatadoa‐mu‐ana eroga kasua:

¹¹nalakena ku pe mari tea maga wanogoe, ku pe ta dapilagona te ragi mau: nalakena napua ni nasiliana ega wo dapala nogoe manimu pei tea vituakiana pae nasogolapaana paki namarakiana waina e du mau du ki Nawota anigida go Tea Maumau pauri Yesu Kristo.

¹²Nalakena tea wanogoe aga wo marim̃ata sua sara ragi naga aga mari mu kuga midoaki tea maga wanogoe, waina ku atae sua ra, po pei tea lawosokiana doko nalomauana waina e sikoti mu doko.

¹³Go a midoaki nia naga e leana, ragi waina a do doko tap̃aup̃au waia, naga aga vasapugoni mu po mari mu kuga midoaki;

¹⁴a atae naga natoropusiana ni tap̃aup̃au aginau e do umai m̃araverave, dapala waina Nawota anigida Yesu Kristo e paivai ki nia paki nau.

¹⁵Ioro, go aga wo mari m̃arekareka naga sara ragi kuga mari atae midoaki tea maga wanogoe edaku ki nam̃eluana aginau.

¹⁶Nalakena au da sarausi navasaana sorosoro tea manumatua midoakiana mau, ragi waina au mari mu ku atae nakasuaana go naumaiana ki Nawota anigida Yesu Kristo, ma au pei tea leopunusi natatap̃auana aneana.

¹⁷Nalakena e dape ki Sup̃e Tamana nadodomadaganiana go nasamasamaana, ragi waina nadaleo sikai dapala waia e pei tea tapeana umai paki nia pae nasamasamaana tatap̃au, Tea waia e pei Natugu dodomiana, waina kinau a midoaki m̃ata ki nia:

¹⁸go nadaleo wanogoe kinami au dogoe e pei tea tapeana m̃elu nakoroatelagi umai, ragi waina au do sikoti a doko tava tapu.

¹⁹Go tu peani navasaana ni naveanoasaiana waina e pei tea mariana e kasua p̃arua, waina ku mari p̃ia waina ku do dogo paratiki nia, dapala e pei nasulu sikai waina e do maramalaga tokora maligo sikai, pa pa paki ragi ni namakotokotoana ni nap̃ogiana, go m̃asoe lapa ni malip̃ogi ega sake doko nap̃op̃omu maga:

²⁰doko do atae tea waia pea, naga te naveanoasaiana sikai ni navasaana midiriana e da pei tea ni nanoap̃otaeana aneana mau.

²¹Nalakena naveanoasaiana e da pei tea tapeana umai ki namasauana ki naatam̃oli te ragi mau: ma naatam̃oli eu pasa m̃elu Sup̃e, eu pei tea tieana pae Naatana Tapu.