Read Nguna Togoa Etafe North 1 KI YOANE 1 Bible Online

1 KI YOANE 1 - Nguna Togoa Etafe North bible

1 KI YOANE 1

¹Tea waina e doko pae ragi ni naatulakeana pa pa pa, tea waina au po dogo e, tea waina au po punusi a ki namatagami, tea waina au leosoki a, go waina nam̃elearugami eu dovidogo e, nalo ni Navasaana ni namauriana.

²(Go namauriana wanogoe e pakilina, go au po punusi a, po do noa sokisoki a, po do dogorogo paki mu ki namauriana wanogoe, waina e du mau du, waina nara ma Tamana ero dua doko, go waina e pakilina ki gami);

³tea waina au po punusi a po dogo e au dogorogo ki nia paki mu naga nimu ma kuga veani nasaisaipeaniana sikoti gami: io, go nasaisaipeaniana aginami e sikoti Tamana, go e sikoti Natuna Yesu Kristo:

⁴go kinami au midiri tea maga waia, naga nalaelaeaana anigida ega vuru.

⁵Go tea waia e pei navitaua waina au po dogo e kiana, po noa ki sai mu asa, naga Sup̃e e pei namarama, go namaligo e dika asa e dika sa.

⁶Tu pe noa naga tu peani nasaisaipeaniana sikoti a, go tu pe surata namaligo, tu sorosoro, po da mari nalomauana mau:

⁷ma tu pe surata namarama, dapala waina nae e doko namarama doko, tu peani nasaisaipeaniana dum̃agida sikoti gida, go nada ni Yesu Natuna aneana e mari gida tu dautau m̃elu dua ki sara namarinaleosaana.

⁸Tu pe noa naga tu dika namarinaleosaana tu dum̃agida piragi sasap̃o ki gida, go nalomauana e da doko gida mau.

⁹Tu pe noa sai namarinaleosaana anigida maga, nae e pei lomau go e leana naga ega manigida midoaki korokoro namarinaleosaana anigida maga, po mari gida tuga tautau m̃elu dua ki sara namarinaleotageleana.

¹⁰Tu pe noa naga tu da mari te naleo sa mau, tu mari a e pei tea sorosoro, go navasaana aneana e da doko gida mau.