Read Nguna Togoa Etafe North 1 KI YOANE 2 Bible Online

1 KI YOANE 2 - Nguna Togoa Etafe North bible

1 KI YOANE 2

¹Piakirikiri aginau maga, a midiri paki mu tea maga waia, naga kuga ta mari naleo sa mau. Go te naata e pe mari naleo sa, tu peani Tea Vasakorokoro sikai sikoti Tamana, Yesu Kristo waina e leana:

²go nae e pei natap̃augoroana nalakena namarinaleosaana anigida maga; go tea anigida eu da sikida mau, ma nalakena maramana mamau.

³Go tea waia tu atae pae asa naga tu atae a, tu pe rogo paratiki natip̃akiana aneana maga tu pe atae a.

⁴Tea waina e naga, A atae a, go waina e da dogo paratiki natip̃akiana aneana maga mau, e pei tea sorosoro, go nalomauana e da doko naata wanogoe mau:

⁵ma naata waina e pe rogo paratiki navasaana aneana, nadodomi‐Sup̃e‐ana e matua asa lomau. Tea waia tu atae pae asa naga tu doko asa:

⁶tea waina e noa naga e doko asa doko, e one naata wanogoe one naga ega surata ega takiusi waina nae e surata.

⁷Tea dodomiana maga, a da midiri te natip̃akiana vau dua mu mau, ma a midiri natip̃akiana tuai sikai waina ku peani a pae ragi ni naatulakeana pa pa pa: natip̃akiana tuai e pei navasaana waina ku dogo e.

⁸A moro midiri natip̃akiana vau sikai dua mu, tea wanogoe e pei lomau nalo kakana go nalo kakamu; nalakena namaligo e do pano, go namarama lomau e po maramalaga.

⁹Tea waina e noa naga e doko namarama, go waina e pilosi taina, e doko namaligo doko pa pa paki ragi waia.

¹⁰Tea waina e dodomi taina e doko namarama doko, go tea tapilagonaana e da doko asa mau.

¹¹Ma tea waina e pilosi taina e doko namaligo, po surata namaligo, po da atae tokora waina e paki asa pano mau, nalakena namaligo e mari p̃onoti namatana.

¹²A midiri dua mu, piakirikiri maga, nalakena namarinaleosaana animu maga eu manimu pei tea midoakikorokoroana nalakena nagisana.

¹³A midiri dua mu, tamada maga, nalakena ku atae tea waina e doko pae ragi ni naatulakeana pa pa pa. A midiri dua mu, natureai maga, nalakena ku po mari matua ki tea sigisigileo.

¹⁴A po midiri dua mu, piakirikiri maga, nalakena ku atae Tamana. A po midiri dua mu, tea matua maga, nalakena ku atae tea waina e doko pae ragi ni naatulakeana pa pa pa. A po midiri dua mu, natureai maga, nalakena ku kasua, go navasaana ki Sup̃e e doko mu doko, go ku po mari matua ki tea sigisigileo.

¹⁵Kuga ta dodomi maramana mau, go kuga ta dodomi naleo maga waina eu doko maramana. Te naata e pe dodomi maramana, nadodomi‐Tamana‐ana e da doko asa mau.

¹⁶Nalakena sara naleo waina eu doko maramana, namasauana sa ni nap̃okasigida, go namasauana sa ni namatagida, go naleomadagaana ni nasogolapaana, eu da pei tea ni Tamana mau, ma eu pei tea ni maramana.

¹⁷Go maramana e do pano puoli, go namasauana sa kakana: ma tea waina e do mari namasauana ki Sup̃e e doko po doko mau doko.

¹⁸Piakirikiri, e pei ragi edaku: go dakiusi waina ku dogo naga tea kokona ki Kristo ega wo umai, tea kokona ki Kristo laapa eu po pakilina ragi waia; tea wanogoe tu atae pae asa naga e pei ragi edaku.

¹⁹Eu m̃elu dua ki gida pano, ma eu da pei seara kakagida mau; nalakena eu pe vei seara kakagida, teu pe toko sikoti gida doko: ma eu m̃elu pano, naga euga toko lina naga eu da mamau puti pei seara kakagida mau.

²⁰Go nimu ku peani navuvuraiana sikai waina Tea Tapu e dua mu asa, go ku atae naleo maga mamau puti.

²¹A da midiri dua mu nalakena ku da atae nalomauana mau, ma a midiri nalakena ku atae a, go nalakena te nasorosoroana e da pei tea ni nalomauana mau.

²²Sei e pei tea sorosoro, ma nae waina e pasagoro naga Yesu e pei Kristo? Nae wanogoe e pei tea kokona ki Kristo, nae waina e pasagoro Tamana go Natuna.

²³Sara naata waina eu pasagoro Natuna eu da peani Tamana mau; tea waina e noa sai Natuna e peani ra ma Tamana.

²⁴Nimu, tea waina ku dogo e pae ragi ni naatulakeana pa pa pa ega toko mu doko. Tea waina ku dogo e pae ragi ni naatulakeana pa pa pa e pe toko mu doko, nimu ma kuga wo doko Natuna go Tamana doko.

²⁵Go tea waia e pei nasaiana waina e sai a paki gida, namauriana waina e du mau du.

²⁶A po midiri dua mu tea maga wanogoe, nalo ni tea maga waina eu piragi sasap̃o ki mu.

²⁷Go nimu, navuvuraiana waina ku dape a waina nae e dua mu asa e doko mu doko, go ku da pei sap̃o mau naga te naata ega vasa piseiki mu; ma dapala waina navuvuraiana aneana e do pasa piseiki mu nalo ni naleo maga mamau puti, po pei lomau, po da pei nasorosoroana mau, go dakiusi waina nae e pasa piseiki mu, kuga toko asa doko.

²⁸Go ragi waia, piakirikiri, kuga toko asa doko; naga, e pe vakilina, tuga veani naviviariana, po da maliere pa dua ki nia mau ragi ni naumaiana aneana.

²⁹Ku pe atae naga nae e leana, ku pe moro atae naga sara naata waina eu do mari namarinaleoleanaana eu pei tea vesiana m̃elu asa.