Read Nguna Togoa Etafe North TEA VASAP̃OTAE MAGA 1 Bible Online

TEA VASAP̃OTAE MAGA 1 - Nguna Togoa Etafe North bible

TEA VASAP̃OTAE MAGA 1

¹Go e pakilina edaku ki namateana ki Yoshua, naga Israel natuna maga eu pusuusu paki Yehovah, eu naga, Sei ega maginami sake pano pea dip̃a naworawora ni Kanaan naga ega mari navakalo paki da?

²Go Yehovah e noa naga Yudah ega sake pano: p̃a leo, kinau a po pitua ki navanua paki nam̃elearuna.

³Go Yudah e noa ki taina Simeon, e naga, P̃a sake sikoti au paki gole aginau, naga toroga mari navakalo paki naworawora ni Kanaan; go kinau ma aga wo pano sikoti ko paki gole anigo. Go Simeon e pano sikoti a.

⁴Go Yudah e sake pano; go Yehovah e pitua ki naworawora ni Peris paki nam̃elearuda: go eu atugi ra Besek, naatam̃oli tivilia sikai kakada.

⁵Go eu pap̃ai Adoni‐besek doko Besek: go eu mari navakalo paki nia, po atugi naworawora ni Kanaan go naworawora ni Peris.

⁶Ma Adoni‐besek e sava pano; go eu sava dausi a, po puasoki a, po daelua nakini lapa dua ni nam̃elearuna dua go ni natuana dua.

⁷Go Adoni‐besek e naga, Nawota rualima larua waina nakini lapa maga ni nam̃elearuda maga go ni natuada maga eu pei tea taeluaana, eu pilae navinaga adeada etano ni wede aginau: dapala waina a mari a, dapala nogoe Sup̃e e lagati dua au asa. Go eu piragi a paki Yerusalem, go e mate tokora wanogoe.

⁸Go Yudah natuna maga eu mari navakalo paki Yerusalem, po puati a, po atugi a ki nawoka ni lova, po dokoni natokoana ki nakapu.

⁹Go ragi edaku Yudah natuna maga eu siwo naga euga mari navakalo paki naworawora ni Kanaan waina eu doko navanua ni tava, go navanua ni Sauth, go navanua ni etano.

¹⁰Go Yudah e pano dip̃a naworawora ni Kanaan waina eu doko Hebron: (go nagisa ni Hebron sala vea e pei Kiriath‐arba): go eu atugi Sheshai, go Ahiman, go Talmai.

¹¹Go e pae tokora wanogoe pano dip̃a naka ni Debir. (Go nagisa ni Debir sala vea e pei Kiriath‐sefer).

¹²Go Kaleb e naga, Naata waina ega wo atugi Kiriath‐sefer, po puati a, aga wo dua e natugu Aksah ega vei anagoroi.

¹³Go Othniel natu ni Kenas, Kaleb taina takariki, e puati a: go e dua e natuna Aksah e pei anagoroi.

¹⁴Go e pakilina ragi waina e umai punusi a, naga e pasadie a naga ega tatagovi tamana ki vanua sikai: go e siwo m̃elu dua ki ass aneana; go Kaleb e noa ki nia, e naga, Ku masau nasava?

¹⁵Go e naga, P̃a tua au navasam̃atakiana sikai: nalakena ku po doropusi au navanua ni Sauth, go p̃a tua au namata noai maga ni noai. Go Kaleb e dua e namata noai maga ni elagi go namata noai maga ni etano.

¹⁶Go Kain natuna maga, Moses anatawiana, eu sake m̃elu dua ki natokoana ni paama maga sikoti Yudah natuna maga paki masop̃alo ni Yudah, waina e doko sauth ni Arad; go eu pano po doko sikoti narei doko.

¹⁷Go Yudah e pano sikoti taina Simeon, go eu atugi naworawora ni Kanaan waina eu doko Sefat doko, po mari sa sa ki nia. Go nagisa ni natokoana wanogoe e pei tea sosoana ki Hormah.

¹⁸Go Yudah e puati Casa go kokoi kakana, go Ashkelon go kokoi kakana, go Ekron go kokoi kakana.

¹⁹Go Yehovah e doko sikoti Yudah, go e kopasi lua tea maga waina eu doko navanua ni tava doko; nalakena e mari sa kopasi lua tea maga waina eu doko nap̃aloa doko, nalakena eu peani kariot ni airon maga.

²⁰Go eu dua Kaleb Hebron, dapala waina Moses e pasa asa: go e kopasi lua m̃elu dua ki tokora wanogoe Anak natuna dolu.

²¹Go Benyamin natuna maga eu da kopasi lua naworawora ni Yebus mau waina eu doko Yerusalem doko: ma naworawora ni Yebus eu doko Yerusalem doko sikoti Benyamin natuna maga pa pa paki naaleatia waia.

²²Go nasum̃a ni Yosef nara ma eu sake dip̃a Beth‐el: go Yehovah e sikoti ra.

²³Go nasum̃a ni Yosef eu dip̃aki lua naga euga leousiusi Beth‐el. (Go nagisa ni natokoana wanogoe sala vea e pei Lus).

²⁴Go tea vavaigoro maga eu punusi naatam̃oli sikai e dave m̃elu dua ki natokoana, go eu noa ki nia, eu naga, P̃a visei ki gami, au pavara ni ko asa, malo duaduru ni natokoana, go auga wo mari nadodomiana paki‐go.

²⁵Go e pisei ki da malo duaduru ni natokoana, go eu atugi natokoana ki nawoka ni lova; ma eu suasua ki naatam̃oli wanogoe go ki naworana mamau puti naga euga vano.

²⁶Go naatam̃oli wanogoe e pano paki navanua ki naworawora ni Heth, po davagi natokoana sikai, po soso nagisana ki Lus: waina e pei nagisana pa pa paki naaleatia waia.

²⁷Go Manasseh e da kopasi lua tea ni Beth‐shean go natokoana kakana maga mau, go tea ni Taanak go natokoana kakana maga mau, go tea maga waina eu doko Dor doko go natokoana kakana maga mau, go tea maga waina eu doko Ibleam doko go natokoana kakana maga mau, go tea maga waina eu doko Mekiddo doko go natokoana kakana maga mau: ma naworawora ni Kanaan eu masauna naga euga toko navanua wanogoe doko.

²⁸Go e pakilina, ragi waina Israel e kasua naga eu doropusi ra paki nawosiana ni nasautoga, po da kopasi lua puti ra mau.

²⁹Go Efraim e da kopasi lua naworawora ni Kanaan mau waina eu doko Ceser doko; ma naworawora ni Kanaan eu doko Ceser doko m̃aleoputo kakada.

³⁰Sebulun e da kopasi lua tea maga waina eu doko Kitron doko mau, go tea maga waina eu doko Nahalol doko mau; ma naworawora ni Kanaan eu doko m̃aleoputo kakada doko po pei tea ni nawosiana ni nasautoga.

³¹Asher e da kopasi lua tea maga waina eu doko Akko doko mau, go tea maga waina eu doko Sidon doko mau, go tea ni Ahlap mau, go tea ni Aksib mau, go tea ni Helbah mau, go tea ni Afik mau, go tea ni Rehob mau:

³²Ma naworawora ni Asher eu doko m̃aleoputo ni naworawora ni Kanaan doko, naatatoko maga ni navanua: nalakena eu da kopasi lua ra mau.

³³Naftali e da kopasi lua tea maga waina eu doko Beth‐shemesh doko mau, go tea maga waina eu doko Beth‐anath doko mau; ma e doko m̃aleoputo ni naworawora ni Kanaan doko, naatatoko maga ni navanua: ma tea maga waina eu doko Beth‐shemesh go Beth‐anath doko eu madeada pei tea ni nawosiana ni nasautoga.

³⁴Go naworawora ni Amor eu diesoki Dan natuna maga paki navanua ni tava: nalakena eu da suasua ki da naga euga siwo paki nap̃aloa mau:

³⁵Ma naworawora ni Amor eu masauna naga euga toko tava Heres doko, naga euga toko Aiyalon doko, go naga euga toko Shaalbim doko: ma nam̃elearu ni nasum̃a ni Yosef e marimatua, go eu po pei tea ni nawosiana ni nasautoga.

³⁶Go kokoi ni naworawora ni Amor e pae tokora ni nasakesakeana ni Akrabbim, pae vatu laketoko, po sakesake pano.