Read Nguna Togoa Etafe North TEA VASAP̃OTAE MAGA 11 Bible Online

TEA VASAP̃OTAE MAGA 11 - Nguna Togoa Etafe North bible

TEA VASAP̃OTAE MAGA 11

¹Go Yefthah nawora ni Cilead e pei naatam̃oli marimatua sikai ni navakalo, go e pei natu ni nagoroi masausara sikai: go Cilead e pesi Yefthah.

²Go nagoroi ki Cilead e maneana dape natuna naanoai maga; go ragi waina anagoroi natuna naanoai maga eu po p̃arua, eu kopasi lua Yefthah, po noa ki nia, eu naga, P̃a wo da peani pioli doko nasum̃a ki tamagida mau; nalakena nigo ku pei natu ni nagoroi p̃ota sikai.

³Go Yefthah e sava m̃elu dua ki narae ni taina maga, po doko navanua ni Tob doko: go naatam̃oli p̃alo maga eu pei tea vila‐saisai‐kiana pa punusi Yefthah, go eu dave sikoti a pano.

⁴Go e pakilina edaku ki naaleatia seara, naga Ammon natuna maga eu mari navakalo paki Israel.

⁵Go e pakilina, ragi waina Ammon natuna maga eu mari navakalo paki Israel, naga tea matua maga ni Cilead eu pano naga euga viragi Yefthah umai m̃elu dua ki navanua ni Tob:

⁶Go eu noa ki Yefthah, eu naga, P̃a umai po pei tea maraki aginami, naga tuga mari navakalo paki Ammon natuna maga.

⁷Go Yefthah e noa ki tea matua maga ni Cilead, e naga, Nimu ku da pilosi au, po kopasi au m̃elu dua ki nasum̃a ki tamagu, kite? Go ekasana ku umai punusi au ragi waia, waina ku pei tea riesokiana asa?

⁸Go tea matua maga ni Cilead eu noa ki Yefthah, eu naga, Nalakena tea wanogoe au moro liliu umai punusi ko ragi waia, naga p̃a sikoti gami pano, po mari navakalo paki Ammon natuna maga, go p̃a wo pei nap̃au gami, go ni tea mamau puti waina eu doko Cilead doko.

⁹Go Yefthah e noa ki tea matua maga ni Cilead, e naga, Nimu ku pe viragi au liliu naga aga mari navakalo paki Ammon natuna maga, go Yehovah e pe vitua ki da naraegu, kinau a pe wo pei nap̃aumu, kite?

¹⁰Go tea matua maga ni Cilead eu noa ki Yefthah, eu naga, Yehovah ega wo pei tea rogo namawota kakagida, naga auga wo mari ega tapala navasaana anigo maga.

¹¹Go Yefthah e pano sikoti tea matua maga ni Cilead, go narei eu mari a e pei nap̃auda go tea maraki dap̃au ra: go Yefthah e pasa navasaana aneana mamau puti narae ni Yehovah Mispah.

¹²Go Yefthah e dip̃aki lua tea tautauana maga eu pa punusi nawota ki Ammon natuna maga, po naga, P̃a kasa ki nau, nalakena ku umai punusi au naga p̃a mari navakalo paki navanua aginau?

¹³Go nawota ki Ammon natuna maga e noa ki tea tautauana maga ki Yefthah, e naga, Nalakena Israel e dape lua navanua aginau, ragi waina e m̃elu dua ki Ityipt sake umai, pae Arnon pa pa paki Yabbok, go pa pa paki Yordan: go nalakena tea wanogoe p̃a moro pitua ki da euga liliu ega vae natam̃ateana.

¹⁴Go Yefthah e moro dip̃aki lua tea tautauana maga eu pa punusi nawota ki Ammon natuna maga:

¹⁵Go e noa ki nia, e naga, Yefthah e noa dapala nea, e naga, Israel e da dape lua navanua ki Moab, go navanua ki Ammon natuna maga mau:

¹⁶Ma ragi waina eu m̃elu dua ki Ityipt sake umai, go Israel e surata duaduru masop̃alo pa pa paki Natasi ni Nam̃om̃o, po umai paki Kadesh;

¹⁷Go Israel e dip̃aki lua tea tautauana maga eu pa punusi nawota ki Edom, po naga, Aga surata duagoto, a pavara ni ko asa, navanua anigo: ma nawota ki Edom e da dogo parati ki nia mau. Go e moro dip̃aki lua pa punusi nawota ki Moab: ma e da suasua mau: go Israel e doko Kadesh doko.

¹⁸Go e surata duaduru masop̃alo, po daliviri ki navanua ki Edom, go navanua ki Moab, po umai pae taleva ni elo sake ni navanua ki Moab, go eu m̃enaki taleva kerua ni Arnon; ma eu da umai sili kokoi ki Moab mau, nalakena Arnon e pei kokoi ki Moab.

¹⁹Go Israel e dip̃aki lua tea tautauana maga eu pa punusi Sihon nawota ki naworawora ni Amor, nawota ni Heshbon; go Israel e noa ki nia, e naga, Auga surata duagoto, au pavara ni ko asa, navanua anigo paki tokora aginau.

²⁰Ma Sihon e da saralomau Israel mau naga ega surata duagoto kokoi aneana: ma Sihon e piragi saisai ki narei aneana mamau, po m̃enaki Yahas, po mari navakalo paki Israel.

²¹Go Yehovah, Sup̃e ki Israel, e pitua ki Sihon go narei aneana mamau paki nam̃elearu ni Israel, go eu atugi ra: go Israel e peani navanua mamau ki naworawora ni Amor, waina eu doko navanua wanogoe doko.

²²Go eu peani kokoi mamau ki naworawora ni Amor, pae Arnon pa pa paki Yabbok, go pae masop̃alo pa pa paki Yordan.

²³Go dapala nogoe Yehovah, Sup̃e ki Israel, e kopasi lua naworawora ni Amor pa dua ki narae ni narei aneana Israel, go nigo p̃a wo peani a, kite?

²⁴P̃a wo da peani tea waina Kemosh sup̃e anigo e dua ko asa naga p̃a veani a, kite? Go tea mamau puti waina Yehovah Sup̃e aginami e kopasi lua ra pa dua ki naraegami, auga wo peani tea wanogoe.

²⁵Ragi waia nigo ku p̃ia liu Balak natu ni Sippor, nawota ki Moab, kite? E pululu e pululu ki Israel, kite? E mari navakalo paki da, kite?

²⁶Ragi waina Israel e doko Heshbon doko go natokoana kakana maga, go Aroer go natokoana kakana maga, go natokoana mamau puti waina eu doko pisari nadigi ni Arnon, natau p̃onotia dolu; go ekasana ku da pualua ra ragi wanogoe mau?

²⁷Go kinau a da mari naleo sa paki‐go mau, ma nigo ku mari tea sa paki nau nalo ni waina ku mari navakalo paki nau: Yehovah, Tea Vasap̃otae, ega vasap̃otae namawota ni Israel natuna maga go ni Ammon natuna maga naaleatia waia.

²⁸Ma nawota ki Ammon natuna maga e da dogo parati ki navasaana maga ki Yefthah mau waina e dip̃aki lua e paki nia.

²⁹Go Naata ni Yehovah e umai doko Yefthah, go e pano duaduru Cilead go Manasseh, po pano duaduru Mispeh ni Cilead, go e pae Mispeh ni Cilead pano duaduru pa punusi Ammon natuna maga.

³⁰Go Yefthah e sai nasaiana sikai paki Yehovah, po naga, Ku pe vitua ki lomau ki Ammon natuna maga paki nam̃elearugu,

³¹Go e pe wo doko, naga tea waina ega wo dave pae namata ni nasum̃a aginau naga ega sua au, ragi waina aga wo liliu doko natam̃ateana m̃elu dua ki Ammon natuna maga, e pe wo pei agi Yehovah, go a pe wo pitua ki nia ega vei naviriana tap̃arakiana sikai.

³²Go Yefthah e pano duaduru pa punusi Ammon natuna maga naga ega mari navakalo paki da; go Yehovah e pitua ki da paki nam̃elearuna.

³³Go e atugi ra pae Aroer go pa pa ku umai paki Minit, natokoana rualima dua, go pa pa paki Abel‐keramim, naatugiana warua liu sikai. Go Ammon natuna maga eu pei tea mariana eu pakitano pa dua ki narae ni Israel natuna maga.

³⁴Go Yefthah e umai paki Mispah paki nasum̃a aneana, go kuga leo, natuna nagoroi e dave naga ega sua e pilake timbrel maga go nasaleana maga: go nae e pei natuna sikedau; e da peani te natuna naanoai sikai kite te natuna nagoroi sikai masale ki nia mau.

³⁵Go e pakilina, ragi waina e punusi a, naga e pua p̃orae sugoro aneana maga, po naga, Ako, natugu nagoroi! Ku po mari au a pakitano p̃arua, go nigo ku pei sikai ni tea maga waina eu mari duletulea ki nau: nalakena kinau a p̃olagati nawokagu paki Yehovah, go a mari sa liliu.

³⁶Go e noa ki nia, e naga, Mama, ku p̃olagati nawokam̃a paki Yehovah; p̃a mari paki nau ega tapala tea waina e dave m̃elu dua ki nawokam̃a; edaku ki Yehovah e po manigo mari nasikoana paki tea kokona ki‐go maga, paki Ammon natuna maga.

³⁷Go e noa ki tamana, e naga, Naleo waia ega maginau pei tea mariana: p̃a toropusi au atelagi dua, naga aga vano, po siwo paki tava maga, po dagisi navei‐muta‐ana aginau, kinau go tagu ri maga.

³⁸Go e naga, P̃a vano. Go e dip̃aki lua e atelagi dua: go e pano, nae go tana ri maga, po dagisi navei‐mutaana aneana doko tava maga.

³⁹Go e pakilina ragi waina atelagi dua ero nopu, naga e liliu pa punusi tamana, go e mari paki nia nasaiana waina e sai a: go nae e da atae naanoai mau. Go e pei natawonakiana sikai doko Israel,

⁴⁰Israel natuna nagoroi maga eu pano sara natau naga euga tagisi samasama ni natu ni Yefthah nawora ni Cilead naaleatia pati natau sikai.