Read Nguna Togoa Etafe North TEA VASAP̃OTAE MAGA 12 Bible Online

TEA VASAP̃OTAE MAGA 12 - Nguna Togoa Etafe North bible

TEA VASAP̃OTAE MAGA 12

¹Go naatam̃oli maga ni Efraim eu pei tea soso‐saisai‐kiana po pano duaduru paki Safon; go eu noa ki Yefthah, eu naga, Ekasana ku pano duaduru naga p̃a mari navakalo paki Ammon natuna maga, go ku da soso gami mau naga auga sikoti ko pano? Auga wo dap̃ara ki nasum̃a anigo dap̃augoro ko ki nakapu.

²Go Yefthah e noa ki da, e naga, Kinau go narei aginau go Ammon natuna maga au dum̃agami pau p̃arua ki gami, go a pioso paki mu, ma ku da mauti au m̃elu dua ki nam̃elearuda mau.

³Go a punusi naga ku da mauti au mau, go a doropusi namauriana aginau e doko nam̃elearugu, go a pano duaduru dip̃a Ammon natuna maga, go Yehovah e pitua ki da paki nam̃elearugu: go ekasana ku sake umai punusi au naaleatia waia, naga kuga mari navakalo paki nau?

⁴Go Yefthah e piragi saisai ki naatam̃oli mamau puti ni Cilead, po mari navakalo paki Efraim: go naatam̃oli maga ni Cilead eu atugi Efraim, nalakena eu naga, Ku pei tea sava pano ni Efraim, nimu tea ni Cilead, m̃aleoputo ni Efraim, go m̃aleoputo ni Manasseh.

⁵Go tea ni Cilead eu puati tokora maga ni natuagotoana ni Yordan dip̃a Efraim: go e doko naga ragi waina tea sava pano seara ni Efraim eu naga, Aga tuagoto; naatam̃oli maga ni Cilead eu noa ki nia, eu naga, Nigo ku pei nawora ni Efraim, kite?

⁶Go e naga, Ee; go eu noa ki nia, eu naga, P̃a noa, Shibolet, au pavara ni ko; go e noa, Sibolet; nalakena e mari sa pasa leana ki nia; go eu puati a, po mari punue a pisari tokora maga ni natuagotoana ni Yordan: go ragi wanogoe tea ni Efraim tivilia pati go manu takuna dua eu dowo.

⁷Go Yefthah e pasap̃otae Israel natau latesa. Go Yefthah nawora ni Cilead e mate, po pei tea ovakiana e one natokoana maga ni Cilead sikai.

⁸Go edaku ki nia Ibsan ni Bethlehem e pasap̃otae Israel.

⁹Go e peani natuna naanoai rualima dolu, go e dip̃aki lua natuna nagoroi rualima dolu paki malo p̃ota maga, po magi natuna naanoai maga piragi naatam̃oli natuda nagoroi rualima dolu pae malo p̃ota maga umai. Go e pasap̃otae Israel natau larua.

¹⁰Go Ibsan e mate, po pei tea ovakiana e one Bethlehem.

¹¹Go edaku ki nia Elon nawora ni Sebulun e pasap̃otae Israel; go e pasap̃otae Israel natau rualima sikai.

¹²Go Elon nawora ni Sebulun e mate, po pei tea ovakiana e one Aiyalon, ni navanua ki Sebulun.

¹³Go edaku ki nia Abdon natu ni Hilel tea ni Pirathon e pasap̃otae Israel.

¹⁴Go e peani natuna naanoai rualima pati go natuna naanoai maga natuda naanoai rualima dolu, waina eu sakesaake ass natuda rualima larua: go e pasap̃otae Israel natau latolu.

¹⁵Go Abdon natu ni Hilel tea ni Pirathon e mate, po pei tea ovakiana e one Pirathon, ni navanua ni Efraim, ni navanua ni tava ki naworawora ni Amalek.