Read Nguna Togoa Etafe North TEA VASAP̃OTAE MAGA 14 Bible Online

TEA VASAP̃OTAE MAGA 14 - Nguna Togoa Etafe North bible

TEA VASAP̃OTAE MAGA 14

¹Go Samson e siwo paki Timnah, po punusi nagoroi sikai Timnah, tea ni Filistine maga natuda nagoroi maga sikai kakada.

²Go e sake umai po noakisai tamana go p̃ilana asa, po naga, A po punusi nagoroi sikai Timnah, tea ni Filistine maga natuda nagoroi maga sikai kakada: nalakena tea wanogoe koroga maginau puati a ega vei nagoroi aginau.

³Go tamana go p̃ilana ero noa ki nia, ero naga, Nagoroi sikai e da doko m̃aleoputo ni taim̃a maga natuda nagoroi maga, kite m̃aleoputo ni narei aginau mamau, e pei nalakena nigo ku pano naga p̃a viragi nagoroi sikai ni Filistine maga waina eu da pei tea tovadaviviana mau, kite? Go Samson e noa ki tamana, e naga, P̃a maginau puati a; nalakena kinau a midoa ki m̃ata ki nia.

⁴Ma tamana go p̃ilana ero da atae mau naga tea wanogoe e pae Yehovah; nalakena nae e do laaga nalakena sikai dip̃a Filistine maga. Go ragi wanogoe Filistine maga eu peani namarakiana dap̃au Israel.

⁵Go Samson e siwo, go tamana go p̃ilana, paki Timnah, go eu rumai pa pa paki roara maga ni vaine ni Timnah: go kuga leo, laion tureai sikai e uru umai sua e.

⁶Go Naata ni Yehovah e puvua umai doko asa, go e pua p̃orae a dapala e pe vua p̃orae naninani natuna sikai, go te navatuna e da doko nam̃elearuna mau: ma e da noakisai tamana go p̃ilana tea waina e mari a mau.

⁷Go e siwo pano, po pasa ki nagoroi wanogoe; go Samson e midoa ki m̃ata ki nia.

⁸Go edaku ki naaleatia seara, e liliu naga ega viragi a, go e dawasi naga ega vunusi nap̃atoko ni laion: go kuga leo, navata sikai ni bii maga eu doko nap̃alau ni laion, go honi.

⁹Go e karu lua e paki nam̃elearuna dua, po pano, po do gani a pano, go e umai punusi tamana go p̃ilana, po dua ra, go ero gani a: ma e da noakisai ra naga e karu lua honi wanogoe m̃elu dua ki nap̃alau ni laion mau.

¹⁰Go tamana e siwo pano punusi nagoroi wanogoe: go Samson e mari nakaniana sikai tokora wanogoe; nalakena natureai maga eu do mari dapala nogoe.

¹¹Go e pakilina, ragi waina eu leo punusi a, naga eu piragi tana rualima dolu umai naga euga sikoti a.

¹²Go Samson e noa ki da, e naga, Aga vasa maluluaki paki mu, a pavara ni mu asa, navasamaluluakiana sikai: ku pe noasai a paki nau, ragi ni naaleatia larua ni nakaniana, po midoa ki p̃ai a, go a pe wo dua mu sugoro ni linen rualima dolu go sugoro kovagoro ni nasunioliana rualima dolu:

¹³Ma ku pe mari sa noasai a paki nau, go nimu ku pe wo dua au sugoro ni linen rualima dolu go sugoro kovagoro ni nasunioliana rualima dolu. Go eu noa ki nia, eu naga, P̃a vasa malulua ki navasamaluluakiana anigo, naga auga rogo e.

¹⁴Go e noa ki da, e naga, Navinaga e dave m̃elu dua ki tea kanikani, Go tea gagadi e dave m̃elu dua ki tea kasua. Go eu da mariatae noasai navasamaluluakiana wanogoe naaleatia dolu mau.

¹⁵Go e pakilina naaleatia kelarua, naga eu noa ki nagoroi ki Samson, eu naga, P̃a vasa surusurue naanoai anigo, naga ega noakisai gami navasamaluluakiana aneana, au pe tap̃ara ki‐go go ki nasum̃a ki tamam̃a ki nakapu: ku soso gami umai naga kuga tape lua kiagami tea waina au peani a, kite? E da dapala nogoe, kite?

¹⁶Go nagoroi ki Samson e dagi liko asa, po naga, Ku pilosi mau au, go ku da dodomi au mau: ku pasa malulua ki navasamaluluakiana sikai paki narei aginau natuda maga, go ku da noakisai au asa mau. Go e noa ki nia, e naga, P̃a leo, a da noakisai tamagu go p̃ilagu asa mau, go aga noakisai ko asa, kite?

¹⁷Go e dagi liko asa naaleatia larua waina nakaniana adeada e doko asa: go e pakilina naaleatia kelarua, naga e noakisai a asa, nalakena e diesoki pavara ni p̃arua ki nia asa: go e noasai navasamaluluakiana wanogoe paki narei aneana natuda maga.

¹⁸Go naatam̃oli maga ni natokoana wanogoe eu noa ki nia naaleatia kelarua e pea ki elo e musu, eu naga, Nasava e gagadi liu honi? Go nasava e kasua liu laion sikai? Go e noa ki da, e naga, Ku pe ta sisi natano ki kau atara aginau mau, Ku pe ta midoa ki p̃ai navasamaluluakiana aginau mau.

¹⁹Go Naata ni Yehovah e puvua umai doko asa, go e siwo paki Ashkelon, po atugi naatam̃oli kakada rualima dolu, po dape lua tea vuti‐luapavakotoana kakada, po pitua ki sugoro ni nasunioliana maga wanogoe paki tea maga waina eu noasai navasamaluluakiana aneana. Go namaetoana aneana e pavaga, go e sake pano paki nasum̃a ki tamana.

²⁰Ma nagoroi ki Samson e pei tea vituakiana paki tana waina e pei tana ri.