Read Nguna Togoa Etafe North TEA VASAP̃OTAE MAGA 15 Bible Online

TEA VASAP̃OTAE MAGA 15 - Nguna Togoa Etafe North bible

TEA VASAP̃OTAE MAGA 15

¹Go e pakilina edaku ki naaleatia seara, naaleatia maga ni natagaukotoviana ni whiit, naga Samson e pano punusi anagoroi pilake naninani natuna sikai; go e noa ki nia, e naga, Aga wo paki ekopu punusi nagoroi aginau paki em̃ago aneana. Ma tamana e da suasua ki nia naga ega vaki ekopu mau.

²Go tamana e noa ki nia, e naga, A midoa ki midoa ki nia naga ku pilosi lomau ki nia; go a pitua ki nia paki tam̃a: taina takariki e da pei rae wia liu sa, kite? P̃a viragi a ega toko oli a, a pavara ni ko asa.

³Go Samson e noa ki da, e naga, Aga wo dautau sala waia nalo ni Filistine maga ragi waina kinau aga wo mari tea sa sikai paki da.

⁴Go Samson e pano po puati foks p̃onotia dolu, po dape nasulu maga, po doa napue ni sikai paki napue ni kerua, po doropusi nasulu sikai m̃aleoputo namawota ni napueda duarua.

⁵Go e dokoni nasulu maga ki nakapu, po dip̃aki lua ra paki korn lawodu ki Filistine maga, po dokoni taua maga ni napu maga ni korn go korn lawodu, go roara maga ni oliva.

⁶Go Filistine maga eu naga, Sei e po mari tea waia? Go eu naga, Samson m̃o ni tea ni Timnah, nalakena e puati nagoroi aneana po pitua ki nia paki tana. Go Filistine maga eu sake umai po dap̃ara ki nia go ki tamana ki nakapu.

⁷Go Samson e noa ki da, e naga, Ku pe mari dapala waia, ma a pe wo dum̃agu maginau mari nasikoana paki mu, go aga wo edaku makoto ki mu.

⁸Go e atugi ra natuada e one namaoda naatugiana warua sikai: go e siwo pano po doko masap̃ala ni vatu laketoko ni Etam.

⁹Go Filistine maga eu sake pano, po m̃enaki Yudah, po dum̃ada peravera ki da Lehi.

¹⁰Go naatam̃oli maga ni Yudah eu naga, Ekasana ku sake umai dip̃a gami? Go eu naga, Au sake umai naga auga soli Samson, naga auga mari paki nia ega tapala waina e mari a paki gami.

¹¹Go naatam̃oli manu dolu ni Yudah eu siwo paki masap̃ala ni vatu laketoko ni Etam, po noa ki Samson, eu naga, Ku da atae naga Filistine maga eu peani namarakiana dap̃au gida? Go nasava waia ku po mari a paki gami? Go e noa ki da, e naga, Dapala waina eu mari paki nau, a mari dapala nogoe paki da.

¹²Go eu noa ki nia, eu naga, Au po siwo umai naga auga soli ko, naga auga vitua ki‐go paki nam̃elearu ni Filistine maga. Go Samson e noa ki da, e naga, Kuga vivisa paki nau, naga nimu kuga wo da atugi au mau.

¹³Go eu noa ki nia, eu naga, Ee; ma auga wo solisoki ko, po pitua ki‐go paki nam̃elearuda: ma auga wo da mari punue ko mau lomau. Go eu soli a ki namea vau dua, po piragi a sake m̃elu dua ki vatu laketoko wanogoe.

¹⁴Nae e umai pa pa paki Lehi, go Filistine maga eu darasa ragi waina eu sua e: go Naata ni Yehovah e puvua umai doko asa, go namea maga waina eu doko nam̃elearuna maga eu po dapala flaks waina e pei tea tap̃arakiana ki nakapu, go natali solisoli kakana maga eu sara marua ki nam̃elearuna maga.

¹⁵Go e pap̃ai nasi ni ass vau sikai, go e sai ki nam̃elearuna po puati a, po atugi naatam̃oli manu sikai asa.

¹⁶Go Samson e naga, Ki nasi ni ass, taua sikai, taua dua, Ki nasi ni ass a po atugi naatam̃oli manu sikai.

¹⁷Go e pakilina, ragi waina e pasa sua, naga e nadi ki nasi wanogoe m̃elu dua ki nam̃elearuna; go e soso tokora wanogoe ki Ramathlehi.

¹⁸Go e madou p̃arua, po pioso paki Yehovah, po noa ki nia, e naga, Nigo ku po pitua ki namautiana warua waia pae nam̃elearu ni tea suasua anigo; go ragi waia aga wo mate ki namadouana, po dowo paki nam̃elearu ni tea maga waina eu da pei tea tovadaviviana mau, kite?

¹⁹Ma Sup̃e e dap̃orae tokora sikai waina e pei m̃oru waina e doko Lehi, go noai e dave m̃elu dua ki nia; go e munu, go naatana e liliu, go e moro mauri: nalakena tea wanogoe e soso nagisana ki Enhakore, waina e doko Lehi pa pa paki naaleatia waia.

²⁰Go e pasap̃otae Israel naaleatia maga ki Filistine maga natau rualima dua.