Read Nguna Togoa Etafe North TEA VASAP̃OTAE MAGA 16 Bible Online

TEA VASAP̃OTAE MAGA 16 - Nguna Togoa Etafe North bible

TEA VASAP̃OTAE MAGA 16

¹Go Samson e pano paki Casa, po punusi nagoroi masausara sikai tokora wanogoe, po paki ekopu punusi a.

²Go e pei tea noasaiana paki naka ni Casa, eu naga, Samson e po umai paki nea. Go eu dalivirigoro e, po kusugoro e nap̃ogiana mamau pisari namata‐pua ni natokoana, go eu datam̃ate nap̃ogiana mamau, eu naga, Ega toko pa pa paki namarama ni malip̃ogi, go tuga wo mari punue a.

³Go Samson e one pa pa paki p̃ogi matua, go e duleana p̃ogi matua, po puati nakokoro dua ni namata‐pua ni natokoana, go nakautu dua ni namata‐pua, po paku dakati ra pilake tea walagoto, po doropusi ra napauna dua, po dapetape ra sake paki nap̃au ni tava waina e doko kivea ki Hebron.

⁴Go e pakilina edaku ki tea wanogoe, naga e dodomi nagoroi sikai waina e doko nap̃aloa ni Sorek, waina nagisana Delaila.

⁵Go nawota maga ki Filistine maga eu sake umai punusi a, po noa ki nia, eu naga, P̃a vasa surusurue a, po punusi nakasuaana aneana e p̃arua dapale sava, go auga mariatae marimatua ki nia dapale sava, naga auga soli a naga auga mari a ega rogokitesa: go sara naata kakagami auga wo dua ko matele ni silver manu sikai go p̃onotia takuna sikai.

⁶Go Delaila e noa ki Samson, e naga, P̃a noakisai au, a pavara ni ko asa, nakasuaana anigo e p̃arua dapala sava, go p̃a wo pei tea soliana dapale sava naga euga mari ko p̃a rogokitesa.

⁷Go Samson e noa ki nia, e naga, Eu pe soli au ki natali mata larua waina eu da pei tea vagaraeana mau, go a pe wo manainai, go a pe wo dapala naatam̃oli p̃ota sikai.

⁸Go nawota maga ki Filistine maga eu maneana dape natali mata larua sake umai waina eu da pei tea vagaraeana mau, go e soli a ara.

⁹Go e peani tea kusugoro maga eu doko em̃ago tukituki. Go e noa ki nia, e naga, Filistine maga eu sigoro ko, Samson. Go e mari kotovi natali maga, dapala waina natali vilokiana ni tau e pei tea marikotoviana ragi waina e kisidogo nakapu. Go nakasuaana aneana e da pei tea ataeana mau.

¹⁰Go Delaila e noa ki Samson, e naga, P̃a leo, ku po mari saudoa ki nau, po pasa paki nau nasorosoroana maga: ragi waia p̃a noakisai au, a pavara ni ko asa, p̃a wo pei tea soliana dapale sava?

¹¹Go e noa ki nia, e naga, Eu pe soli soki au ki namea vau maga waina te nawosiana sikai e da pei tea mariana ara mau, go a pe wo manainai, go a pe wo dapala naatam̃oli p̃ota sikai.

¹²Go Delaila e dape namea vau maga, po soli a ara, po noa ki nia, e naga, Filistine maga eu sigoro ko, Samson. Go tea kusugoro maga eu doko em̃ago tukituki. Go e mari kotovi ra m̃elu dua ki naruna maga dapala nalolu sikai.

¹³Go Delaila e noa ki Samson, e naga, Ku do mari saudoa ki nau pa pa paki ragi waia, po do pasa paki nau nasorosoroana maga: p̃a noakisai au, p̃a wo pei tea soliana dapale sava? Go e noa ki nia, e naga, Ku pe vausi navutilolu larua ni nap̃augu paki navauana.

¹⁴Go e marisoki a ki pin, po noa ki nia, e naga, Filistine maga eu sigoro ko, Samson. Go e darapa m̃elu dua ki namaturuana aneana, po paku lua pin, navutiloluna maga, go navauana.

¹⁵Go e noa ki nia, e naga, E dapale sava ku naga, A dodomi ko, ragi waina nap̃op̃om̃a e da sikoti au mau? Ku mari saudoa ki nau paka tolu waia, go ku da noakisai au asa mau nakasuaana anigo e p̃arua dapale sava.

¹⁶Go e pakilina, ragi waina e do diesoki pavarani a ki navasaana aneana maga sara naaleatia, po do pasadie dali ki nia asa, naga naatana e pei maritavuru asa paki namateana.

¹⁷Go e noakisai a nap̃op̃ona mamau, po noa ki nia, e naga, Tea masi nalolu sikai e da sake paki nap̃augu mau; nalakena kinau a pei Nasarite sikai ki Sup̃e pae nap̃ele ni p̃ilagu pa pa; a pe vei tea masiana, go nakasuaana aginau e pe wo m̃elu dua ki nau pano, go a pe wo manainai, po pei tea tapala naatam̃oli p̃ota maga.

¹⁸Go Delaila e punusi naga e noakisai a nap̃op̃ona mamau, go e dip̃aki lua po soso nawota maga ki Filistine maga, e naga, Kuga sake umai paka sikai maau waia, nalakena e noakisai au nap̃op̃ona mamau. Go nawota maga ki Filistine maga eu sake umai punusi a, po dape m̃ane wanogoe sake e doko nam̃elearuda.

¹⁹Go e mari a e maturu one nap̃atuana maga; go e soso naatam̃oli sikai, po masi lua navutilolu larua ni nap̃auna; go e atulake mari a e dogokitesa, go nakasuaana aneana e m̃elu dua ki nia pano.

²⁰Go e naga, Filistine maga eu sigoro ko, Samson. Go e darapa m̃elu dua ki namaturuana aneana, po naga, Aga tave ragi waia ega tapala sala vea maga, po dum̃agu paruvaru lua au. Ma nae e da atae mau naga Yehovah e m̃elu dua ki nia pano.

²¹Go Filistine maga eu puasoki a, po asiri lua namatana maga; go eu piragi a siwo paki Casa, po soli a ki natali dua ni brass; go e do mani ekopu ni nasum̃a ni nasolisoliana.

²²Ma nalolu ni nap̃auna e atulake moro ulua pae ragi waina e pei tea masiana asa pa pa.

²³Go nawota maga ki Filistine maga eu dum̃ada saisai ki da, naga euga mari naviriana warua sikai paki Dakon sup̃e adeada, go naga euga laelaea: go eu naga, Sup̃e anigida e po pitua ki Samson tea kokona ki gida paki nam̃elearugida.

²⁴Go ragi waina narei eu punusi a, eu samasama ni sup̃e adeada: nalakena eu naga, Sup̃e anigida e po pitua paki nam̃elearugida, Ki tea kokona ki gida, Go ki tea mari sa ki navanua anigida, Go waina e mari punue tea laapa kakagida.

²⁵Go e pakilina ragi waina nap̃op̃oda e laelaea, naga eu noa, Kuga soso Samson, naga ega manigida mari kalakala. Go eu soso Samson dave nasum̃a ni nasolisoliana; go e mari kalakala naraeda: go eu lawo ki nia namawota ni tip̃a maga.

²⁶Go Samson e noa ki natureai waina e do puati a ki nam̃elearuna, e naga, P̃a toro au naga aga tovidogo tip̃a maga waina nasum̃a e doko ara, naga aga ovi ara.

²⁷Go nasum̃a e pura ki naatam̃oli naanoai go nagoroi maga; go nawota mamau puti ki Filistine maga eu doko tokora wanogoe; go naatam̃oli naanoai maga go nagoroi maga eu alagoro pei manu dolu eu doko nap̃au ni nasum̃a, waina eu do leo punusi ragi waina Samson e do mari kalakala.

²⁸Go Samson e pioso paki Yehovah, po naga, Nawota Yehovah O, p̃a midoa ki nau, a pavara ni ko asa, po mari au aga kasua, a pavara ni ko asa, paka sikai maau waia, Sup̃e O, naga aga tum̃agu maginau mari nasikoana sikai paki Filistine maga nalakena namatagu dua.

²⁹Go Samson e puati tip̃a ni m̃aleoputo dua waina nasum̃a e doko ara, go e ovi ara, sikai ki nam̃elearuna ni matua, go kerua ki nam̃elearuna ni mawiri.

³⁰Go Samson e naga, Kinau aga mate sikoti Filistine maga. Go e kolo ki nakasuaana, go nasum̃a e dowo paki nawota maga, go paki narei mamau puti waina eu doko asa. Go tea mate maga waina e mari punue ra ragi ni namateana aneana, eu laapa liu tea maga waina e mari punue ra ragi ni namauriana aneana.

³¹Go taina maga go nasum̃a mamau ni tamana eu siwo umai, po dape lua e, po dape a sake, po ova ki nia e one namawota ni Sorah go ni Eshtaol, e one matigo ki tamana Manoah. Go e pasap̃otae Israel natau rualima dua.