Read Nguna Togoa Etafe North TEA VASAP̃OTAE MAGA 17 Bible Online

TEA VASAP̃OTAE MAGA 17 - Nguna Togoa Etafe North bible

TEA VASAP̃OTAE MAGA 17

¹Go naatam̃oli sikai ni navanua ni tava ki Efraim e doko, waina nagisana Maika.

²Go e noa ki p̃ilana, e naga, Matele ni silver manu sikai go p̃onotia takuna sikai, waina e pei tea tapeluaana kiam̃a, go waina nigo ku pasa sa ki asa, go waina ku moro pasa asa nadaligagu maga, p̃a leo, silver wanogoe e sikoti au; kinau a dape a. Go p̃ilana e naga, P̃a vei tea vasap̃iakiana ki Yehovah, natugu.

³Go e liliua ki matele ni silver manu sikai go p̃onotia takuna sikai wanogoe paki p̃ilana, go p̃ilana e naga, A magi natugu dapugoro silver wanogoe m̃elu dua ki nam̃elearugu paki Yehovah, naga euga mari nasup̃e taeana sikai go nasup̃e takiana sikai asa: go te ragi aga wo liliua ki nia paki‐go.

⁴Go e liliua ki m̃ane wanogoe paki p̃ilana, go p̃ilana e dape matele ni silver p̃onotia dua, po pitua ki nia paki tea vei mataisau ni silver, waina e mari a e pei nasup̃e taeana sikai go nasup̃e takiana sikai: go e doko nasum̃a ki Maika.

⁵Go naatam̃oli wanogoe Maika e peani nasum̃a sikai ni sup̃e maga, go e mari efod sikai go terafim maga, go e pakavuro nam̃elearu ni natuna naanoai maga sikai kakada, waina e po pei tea viri aneana.

⁶Naaleatia maga wanogoe te nawota sikai e da doko Israel mau: sara naatam̃oli eu sikasikai mari tea waina e leana namatada maga.

⁷Go natureai sikai e doko waina e pei tea ni Bethlehem‐yudah, ni naworawora ni Yudah, go nae e pei nawora ni Levi, go nae e m̃enaki atatoko tokora wanogoe.

⁸Go naatam̃oli wanogoe e pano m̃elu dua ki natokoana, m̃elu dua ki Bethlehem‐yudah, naga ega m̃enaki atatoko tokora waina ega vap̃ai a: go e umai paki navanua ni tava ki Efraim, pa pa paki nasum̃a ki Maika, naga ega mari napua aneana.

⁹Go Maika e noa ki nia, e naga, Ku pae esava umai? Go e noa ki nia, e naga, Kinau a pei nawora ni Levi ni Bethlehem‐yudah, go kinau a do pano naga aga m̃enaki atatoko tokora waina aga vap̃ai a.

¹⁰Go Maika e noa ki nia, e naga, P̃a toko sikoti au doko, po pei tamagu sikai go tea viri aginau, go aga wo dua ko matele ni silver rualima sikai, natau sikai, go sugoro tagoviana sikai, go navinaga anigo. Go nawora ni Levi wanogoe e pano.

¹¹Go nawora ni Levi wanogoe e suasua naga ega toko sikoti naatam̃oli wanogoe doko; go natureai wanogoe e maneana doko dapala natuna maga sikai kakada.

¹²Go Maika e pakavuro nam̃elearu ni nawora ni Levi wanogoe, go natureai wanogoe e po pei tea viri aneana, po doko nasum̃a ki Maika doko.

¹³Go Maika e naga, Ragi waia a atae naga Yehovah ega wo mari m̃ata ki nau, nalakena a peani nawora ni Levi sikai e pei tea viri aginau.