Read Nguna Togoa Etafe North TEA VASAP̃OTAE MAGA 18 Bible Online

TEA VASAP̃OTAE MAGA 18 - Nguna Togoa Etafe North bible

TEA VASAP̃OTAE MAGA 18

¹Naaleatia maga wanogoe te nawota sikai e da doko Israel mau: go naaleatia maga wanogoe naworawora ni Dan eu dum̃ada madeada laaga tea veani‐pioli‐kiana sikai waina euga toko asa doko; nalakena tea veani‐piolikiana sikai e ko da madeada dowo m̃aleoputo ni naworawora ni Israel maga pa pa paki naaleatia wanogoe mau.

²Go Dan natuna maga eu dip̃aki lua naatam̃oli lima ni naworaworada m̃elu dua ki tea laapa, naatam̃oli maga ni namarimatuaana, pae Sorah, go pae Eshtaol, naga euga va pasara navanua po leo pavaraka asa; go eu noa ki da, eu naga, Kuga vano, kuga leo pavaraka navanua: go eu rumai paki navanua ni tava ki Efraim, pa pa paki nasum̃a ki Maika, po m̃enaki tokora wanogoe.

³Ragi waina nara eu doko pisari nasum̃a ki Maika, nara eu dogoatae nadaleo ni natureai nawora ni Levi wanogoe: go eu dawasi paki tokora wanogoe, po noa ki nia, eu naga, Sei e piragi ko umai paki nea? Go nigo ku do mari nasava tokora waia? Go ku peani nasava nea?

⁴Go e noa ki da, e naga, Maika e mari dapala waia go dapala waia paki nau, go e pasadapui au, go a po pei tea viri aneana.

⁵Go eu noa ki nia, eu naga, P̃a vusuusu paki Sup̃e, au pavara ni ko asa, naga auga atae napua aginami waina kinami au surata pae asa ega wo disu p̃ia, kite.

⁶Go tea viri e noa ki da, e naga, Kuga vano pae natam̃ateana: napua animu waina ku surata pae asa e doko narae ni Yehovah.

⁷Go naatam̃oli lima wanogoe eu pano, po umai paki Laish, po punusi narei waina eu doko m̃aleoputo kakana doko, eu doko navavatuana, dapala natomariana ki naka ni Sidon, eu do dam̃ate doko po do pavatu; go te naata e da doko navanua wanogoe waina e mari sa ki da te navatuna mau, kite waina e peani namarakiana, go nara eu madu uvea ki naka ni Sidon, go eu da peani te nawosiana sikai paki te naatam̃oli sikai mau.

⁸Go eu rumai punusi taida maga paki Sorah go Eshtaol: go taida maga eu noa ki da, eu naga,

⁹Nimu ku noa nasava? Go eu naga, Kuga tuleana, go tuga sake pano dip̃a ra; nalakena au po punusi navanua, go kuga leo, e p̃ia p̃arua: go nimu ku punuta, kite? Kuga ta mamale pano paki navanua wanogoe mau naga kuga veani a.

¹⁰Ragi waina kuga vano, kuga wo umai punusi narei sikai waina eu do pavatu, go navanua e p̃elewelea: nalakena Sup̃e e po pitua ki nia paki nam̃elearumu: tokora sikai waina te navatuna ni sara naleo waina eu doko maramana e da dika asa mau.

¹¹Go naatam̃oli p̃onotia latesa ni naworawora ni Dan, waina eu pei tea tasokiana ki nalikau maga ni navakalo, eu m̃elu dua ki tokora wanogoe, m̃elu dua ki Sorah, go m̃elu dua ki Eshtaol pano.

¹²Go eu sake pano, po m̃enaki Kiriath‐yearim, ni Yudah: nalakena tea wanogoe eu soso tokora wanogoe ki Mahaneh‐dan, pa pa paki naaleatia waia: kuga leo, e doko nataku ni Kiriath‐yearim.

¹³Go eu pano m̃elu dua ki tokora wanogoe paki navanua ni tava ki Efraim, po umai paki nasum̃a ki Maika.

¹⁴Go naatam̃oli lima waina eu pano naga euga vasara navanua ni Laish, eu pasadara, po noa ki taida maga, eu naga, Ku atae naga efod sikai, go terafim maga, go nasup̃e taeana sikai, go nasup̃e takiana sikai, eu doko nasum̃a maga waia, kite? Go ragi waia kuga atae tea waina kuga mari a.

¹⁵Go eu dawasi paki tokora wanogoe, po umai paki nasum̃a ki natureai nawora ni Levi wanogoe, paki nasum̃a ki Maika, po pusuusu paki nia ki natam̃ateana aneana.

¹⁶Go naatam̃oli p̃onotia latesa waina eu pei tea tasokiana ki nalikau adeada maga ni navakalo, waina eu pei Dan natuna maga seara kakada, eu lawodu pisari namasova ni namata‐pua.

¹⁷Go naatam̃oli lima waina eu pano naga euga vasara navanua eu sake pano, po umai paki ekopu ni tokora wanogoe, po dape nasup̃e taeana, go efod, go terafim maga, go nasup̃e takiana: go tea viri e lawodu pisari namasova ni namata‐pua sikoti naatam̃oli p̃onotia latesa waina eu pei tea tasokiana ki nalikau maga ni navakalo.

¹⁸Go nara eu paki ekopu ni nasum̃a ki Maika, po dape nasup̃e taeana, efod, go terafim maga, go nasup̃e takiana, go tea viri e noa ki da, e naga, Nimu ku do mari nasava?

¹⁹Go eu noa ki nia, eu naga, P̃a vunuta, p̃a toropusi nam̃elearum̃a ega toko nawokam̃a, go p̃a umai sikoti gami, go p̃a vei tamagami sikai go tea viri aginami: seve tea e p̃ia ki‐go naga p̃a vei tea viri agi nasum̃a ki naatam̃oli sikai maau, kite naga p̃a vei tea viri agi naworawora sikai go nawora sikai ni Israel?

²⁰Go nap̃op̃o ni tea viri e laelaea, go e dape efod, go terafim maga, go nasup̃e taeana, po pano m̃aleoputo ni narei.

²¹Go eu dum̃ada doa ra po pano, po doropusi piakirikiri maga go katel maga go naleo wia maga eu doko kivea ki da.

²²Nara eu po madu uvea ki nasum̃a ki Maika, go naatam̃oli maga waina eu doko nasum̃a maga waina eu pei m̃aladigi ki nasum̃a ki Maika eu pei tea soso‐saisai‐kiana, po sava dausi Dan natuna maga.

²³Go eu pioso paki Dan natuna maga. Go eu doa naraeda, po noa ki Maika, eu naga, Nasava e mari ko nalakena ku pei tea soso‐saisai‐kiana?

²⁴Go e naga, Ku po dape lua sup̃e aginau maga waina a mari ra, go tea viri, po pano, go a moro peani nasava? Go nasava waia ku noa ki nau asa, Nasava e mari ko?

²⁵Go Dan natuna maga eu noa ki nia, eu naga, Nadaleom̃a ega ta pei tea rogoana m̃aleoputo kakagami maga, naatam̃oli maeto maga eu pe sava dip̃a mu, go ku pe tape puoli ki namauriana anigo go ki namauriana ki tea maga ni nasum̃a anigo.

²⁶Go Dan natuna maga eu pano pae napua adeada: go Maika e punusi naga nara eu kasua liu sa, go e dum̃ana doa e po liliu paki nasum̃a aneana.

²⁷Go nara eu dape tea waina Maika e mari a, go tea viri waina e peani a, go eu rumai paki Laish, punusi narei sikai waina eu do dam̃ate doko, po do pavatu, go eu atugi ra ki nawoka ni lova; go eu dap̃ara ki natokoana ki nakapu.

²⁸Go tea vualua e da doko mau, nalakena nae e madu uvea ki Sidon, go eu da peani te nawosiana sikai paki te naatam̃oli sikai mau; go nae e doko nap̃aloa waina e pei agi Bethrehob. Go eu davagi natokoana, po doko asa doko.

²⁹Go eu soso nagisa ni natokoana ki Dan, pae nagisa ni tamada Dan, waina e magi Israel pakilina: ma nagisa ni natokoana sala vea e pei Laish.

³⁰Go Dan natuna maga eu dum̃ada madeada sike lawo ki nasup̃e taeana wanogoe: go Yonathan natu ni Cershom, natu ni Moses, nae go natuna maga eu pei tea viri maga agi naworawora ni Dan pa pa paki naaleatia ni naviragilua‐pavakotoana ni navanua.

³¹Go eu dum̃ada madeada sike lawo ki nasup̃e taeana ki Maika waina e mari a, naaleatia mamau puti waina nasum̃a ki Sup̃e e doko Shiloh.