Read Nguna Togoa Etafe North TEA VASAP̃OTAE MAGA 19 Bible Online

TEA VASAP̃OTAE MAGA 19 - Nguna Togoa Etafe North bible

TEA VASAP̃OTAE MAGA 19

¹Go e pakilina naaleatia maga wanogoe waina nawota sikai e da doko Israel mau, naga naatam̃oli sikai nawora ni Levi e m̃enaki atatoko taleva ni uvea ni navanua ni tava ki Efraim, waina e dum̃ana maneana piragi nagoroi narup̃a sikai m̃elu dua ki Bethlehem‐yudah.

²Go narup̃a aneana e maripele dip̃a e, po m̃elu dua ki nia pano paki nasum̃a ki tamana paki Bethlehem‐yudah, po doko tokora wanogoe naaleatia maga ni atelagi pati.

³Go anawota e duleana, po dausi a pano, naga ega vasa paki nap̃op̃ona, naga ega viragi a ega liliu, go natureai sikai e sikoti a go ass dua: go e piragi a paki ekopu ni nasum̃a ki tamana: go ragi waina nagoroi atara wanogoe tamana e punusi a, e laelaea sua e.

⁴Go m̃ona, nagoroi atara wanogoe tamana, e piragi soki a; go e doko sikoti a doko naaleatia dolu: go eu ganikani po munu, po m̃enaki tokora wanogoe.

⁵Go e pakilina naaleatia kevati, naga eu duleana malip̃ogi loaloa, go e duleana naga ega vano; go nagoroi atara wanogoe tamana e noa ki m̃ona, e naga, P̃a silae nap̃op̃om̃a ki matele sikai ni bred, go kuga wo edaku pano.

⁶Go ero do natano po ganikani ero dua dum̃ada sikoti ra po munu: go nagoroi atara tamana e noa ki naatam̃oli wanogoe, e naga, P̃a suasua, a pavara ni ko asa, go p̃a m̃enaki nap̃ogiana waia, go nap̃op̃om̃a ega laelaea.

⁷Go naatam̃oli wanogoe e duleana naga ega vano; ma m̃ona e pasadie a, go e moro m̃enaki tokora wanogoe.

⁸Go e duleana malip̃ogi loaloa malip̃ogi ni naaleatia kelima naga ega vano; go nagoroi atara tamana e naga, P̃a silae nap̃op̃om̃a, a pavara ni ko asa, go e mari daliali pa pa naaleatia e doa e; go ero dua ganikani.

⁹Go ragi waina naatam̃oli wanogoe e duleana naga ega vano, nae go narup̃a aneana, go natureai aneana, m̃ona, nagoroi atara tamana, e noa ki nia, e naga, P̃a leo, a pavara ni ko asa, naaleatia e siwo paki ragi melu, kuga m̃enaki nap̃ogiana waia, a pavara ni mu asa: kuga leo, te maligo, p̃a m̃enaki tokora waia, naga nap̃op̃om̃a ega laelaea; go kuga wo duleana malip̃ogi loaloa ni matamai paki napua animu, go p̃a wo surata paki tap̃aup̃au anigo maga.

¹⁰Ma naatam̃oli wanogoe e da suasua mau naga ega toko nap̃ogiana wanogoe, ma e duleana po pano, po umai pa pa paki kivea ki Yebus (nae e pei Yerusalem): go ass dua waina ero pei tea sawagoroana ero sikoti a; go narup̃a aneana e sikoti a.

¹¹Ragi waina nara eu doko pisari Yebus, naaleatia e pakitano p̃arua; go natureai e noa ki nawota aneana, e naga, P̃a umai, a pavara ni ko asa, go tuga tawasi paki natokoana waia ki naworawora ni Yebus, go tuga m̃enaki asa.

¹²Go nawota aneana e noa ki nia, e naga, Tuga ta dawasi paki te natokoana sikai ki tea ni nalauna p̃ota mau, waina eu da pei Israel natuna maga seara kakada mau; ma tuga liu pano pa pa paki Cibeah.

¹³Go e noa ki natureai aneana, e naga, P̃a umai, go tuga vaki m̃aladigi ki tokora maga wanogoe sikai kakada; go tuga wo m̃enaki Cibeah kite Ramah.

¹⁴Go eu liu pano po surata; go elo e musugoro ra m̃aladigi ki Cibeah, waina e pei agi Benyamin.

¹⁵Go eu dawasi paki asa, naga euga sili asa naga euga m̃enaki Cibeah: go e sili asa, po do natano napua ni natokoana; nalakena te naata sikai e da piragi ra paki ekopu ni nasum̃a aneana naga euga m̃enaki asa mau.

¹⁶Go kuga leo, mariki matua sikai e pae nawosiana aneana pae vanua aneana umai ragi melu; go naatam̃oli wanogoe e pei tea ni navanua ni tava ki Efraim, go nae e m̃enaki atatoko Cibeah: ma naatam̃oli maga ni tokora wanogoe eu pei Benyamin natuna maga.

¹⁷Go e sike namatana, po punusi naatam̃oli wanogoe waina e pei tea surata e doko napua ni natokoana; go mariki matua wanogoe e naga, Ku surata paki esava? Go ku pae esava umai?

¹⁸Go e noa ki nia, e naga, Kinami au do surata duagoto pae Bethlehem‐yudah pa pa paki taleva ni uvea ni navanua ni tava ki Efraim; kinau a pei tea ni tokora wanogoe, go a surata pa pa paki Bethlehem‐yudah, go kinau a do surata paki nasum̃a ki Yehovah, go te naata sikai e da piragi au paki ekopu ni nasum̃a aneana mau.

¹⁹Ma nam̃enau go napura agi ass aginami maga e doko; go bred go waine aginau e doko, go agi tea suasua nagoroi anigo, go agi natureai waina e sikoti tea suasua anigo maga: natikaana ni te navatuna e da doko mau.

²⁰Go mariki matua wanogoe e naga, Natam̃ateana ega vei anigo; ma natikaana mamau puti anigo euga one au; ma p̃a ta m̃enaki napua mau.

²¹Go e piragi a paki ekopu ni nasum̃a aneana, po dua ass maga napura; go eu sarue natuada, po ganikani po munu.

²²Ragi waina nara eu do mari nap̃op̃oda e laelaea, kuga leo, naatam̃oli maga ni natokoana wanogoe, tea p̃arop̃aro maga seara kakada, eu dalivirigoro nasum̃a, eu do p̃okawoka kasua ki nakokoro; go eu noa ki talakea ni nasum̃a, mariki matua wanogoe, eu naga, P̃a viragi paki katama naatam̃oli waina e po umai paki ekopu ni nasum̃a anigo, go auga wo atae a.

²³Go naatam̃oli wanogoe, talakea ni nasum̃a, e paki katama punusi ra, po naga, Ee, taigu maga, kuga ta mari naleo sa mau, a pavara ni mu asa; edaku ki naatam̃oli waia e po umai paki ekopu ni nasum̃a aginau, kuga ta mari naveilalaana wanogoe mau.

²⁴Kuga leo, natugu nagoroi e doko, waina e pei muta, go narup̃a aneana; aga viragi ra dave, a pavara ni mu asa, go kuga mari ra eroga one natano, go kuga mari paki da namasauana animu; ma kuga ta mari paki naatam̃oli waia naleo ni naveilalaana wanogoe mau.

²⁵Ma naatam̃oli maga wanogoe eu da masauna mau naga euga rogo parati ki nia: go naatam̃oli wanogoe e puati narup̃a aneana, po piragi a dave punusi ra paki katama, go eu atae a, po mari sa ki nia nap̃ogiana mamau pa pa paki malip̃ogi; go ragi ni naatulakeana ni namakotokotoana eu doropusi a naga ega vano.

²⁶Go nagoroi wanogoe e umai ragi ni namakotokotoana ni malip̃ogi, po dowo pisari namata ni nasum̃a ki naatam̃oli waina anawota e doko asa, pa pa paki namarama ni aleati.

²⁷Go anawota e duleana malip̃ogi, po p̃olagati nakokoro maga ni nasum̃a, po paki katama naga ega vano pae napua aneana: go kuga leo, nagoroi wanogoe narup̃a aneana e one pisari namata ni nasum̃a, go nam̃elearuna maga ero one nakau tuasila ni namata.

²⁸Go e noa ki nia, e naga, P̃a tuleana, go tuga vano; ma e da pasadara mau: go e dape a sake paki nam̃adu ni ass; go naatam̃oli wanogoe e duleana po pano paki tokora aneana.

²⁹Go e umai paki nasum̃a aneana, go e dape masimasi po puati narup̃a aneana, po masi kotokotovi a pae natawotuna maga, e pei matele rualima sikai tamate dua, go e dip̃aki lua e pa usuraki kokoi mamau puti ki Israel.

³⁰Go e doko, naga tea mamau puti waina eu punusi a, eu naga, Tea tapala waia e da pei tea mariana mau go e da pei tea vunusiana mau pae naaleatia waina Israel natuna maga eu m̃elu dua ki navanua ni Ityipt sake umai pa pa paki naaleatia waia: kuga midodoa asa, kuga vusum̃aki asa, go kuga vasa asa.