Read Nguna Togoa Etafe North TEA VASAP̃OTAE MAGA 2 Bible Online

TEA VASAP̃OTAE MAGA 2 - Nguna Togoa Etafe North bible

TEA VASAP̃OTAE MAGA 2

¹Go agelo ki Yehovah e sake pae Cilcal paki Bokim. Go e naga, A mari mu ku sake m̃elu dua ki Ityipt, go a piragi mu umai paki navanua waina a pivisa paki tamamu maga asa; go a naga, Aga wo da dapiri navasasokiana aginau paki mu mau pa pa ega tu du po du mau du:

²Go nimu kuga ta mari navasasokiana sikai paki tea maga waina eu doko navanua waia doko mau; kuga rakai wede ni naviriana adeada maga: ma ku da dogo parati ki nadaleogu mau: nasava waia ku mari a?

³Go a moro naga, Aga wo da kopasi lua ra pa dua ki naraemu mau; ma euga wo dapala natip̃a maga doko navidimu maga, go sup̃e adeada maga euga wo pei nasasa sikai paki mu.

⁴Go e pakilina, ragi waina agelo ki Yehovah e pasa navasaana maga wanogoe paki Israel natuna mamau puti, naga narei eu sike nadaleoda po dagi.

⁵Go eu soso nagisa ni tokora wanogoe ki Bokim: go eu mari naviriana tokora wanogoe paki Yehovah.

⁶Go Yoshua e dip̃aki lua narei, go Israel natuna maga eu pano sara naatam̃oli eu sikasikai paki tea veanipioli‐kiana adeada maga, naga euga veani navanua.

⁷Go narei eu magi Yehovah suasua naaleatia mamau puti ki Yoshua, go naaleatia mamau puti ki tea matua maga waina eu mauri doko parau doko edaku ki Yoshua, waina eu punusi nawosiana warua mamau ki Yehovah waina e magi Israel mari a.

⁸Go Yoshua natu ni Nun, tea suasua ki Yehovah, e mate, e pei tea ni natau p̃onotia sikai rualima takuna sikai.

⁹Go eu ova ki nia e one kokoi ni tea veani‐pioli‐kiana aneana ni Timnathheres, ni navanua ni tava ni Efraim, taleva ni north ni tava ni Caash.

¹⁰Go tagona mamau wanogoe nara ma eu pei tea viragi‐saisai‐kiana paki tamada maga: go tagona p̃ota sikai eu duleana edakugoro ra, waina eu da atae Yehovah mau, go waina eu da atae nawosiana waina e magi Israel mari a mau.

¹¹Go Israel natuna maga eu mari tea waina e sa namata maga ni Yehovah, po magi Baal maga suasua:

¹²Go eu doropusi Yehovah, Sup̃e ki tamada maga, waina e piragi lua ra m̃elu dua ki navanua ni Ityipt umai, go eu dausi sup̃e p̃ota maga, sup̃e maga seara kakada ki nalauna maga waina eu doko dalivirigoro ra, po suai natano paki da: go eu mari Yehovah e maeto.

¹³Go eu doropusi Yehovah, po magi Baal go Ashtaroth suasua.

¹⁴Go namaetoana ki Yehovah e pavaga dip̃a Israel, go e pitua ki da paki nam̃elearu ni tea tape‐pavakoto maga waina eu dape pavakoto ara, go e sori ra paki nam̃elearu ni tea kokona ki da maga daliviri, go eu mari sa moro lawodu narae ni tea kokona ki da maga.

¹⁵Sara naleo waina eu dave paki asa, nam̃elearu ni Yehovah e doko ara paki nasaana, dapala waina Yehovah e pasa sua asa, go dapala waina Yehovah e pivisa sua paki da asa: go eu pei tea riesokiana warua liu.

¹⁶Go Yehovah e sike tea vasap̃otae maga eu duleana, waina eu mauti ra m̃elu dua ki nam̃elearu ni tea maga waina eu dape pavakoto ara.

¹⁷Ma eu da dogo parati ki tea vasap̃otae maga mau, nalakena eu maripele dausi sup̃e p̃ota maga, po suai natano paki da: eu dawasi m̃araverave m̃elu dua ki napua waina tamada maga eu surata asa, waina eu dogo parati ki natip̃akiana maga ki Yehovah; ma eu da mari dapala nogoe mau.

¹⁸Go ragi waina Yehovah e madeada sike tea vasap̃otae maga eu duleana, ragi wanogoe Yehovah e doko sikoti tea vasap̃otae, po mauti ra m̃elu dua ki nam̃elearu ni tea kokona ki da maga naaleatia mamau puti ki tea vasap̃otae: nalakena Yehovah e madeada midoaki piri nalakena nagigiana adeada maga nalakena tea maga waina eu diesoki ra po dosiva ki da.

¹⁹Ma e pakilina, ragi waina tea vasap̃otae e mate, naga eu liliu, po mari sa ki p̃arua liu tamada maga, nalo ni waina eu dausi sup̃e p̃ota maga naga euga madeada suasua, go naga euga suai natano paki da; eu da makoto ki namariana adeada maga mau, go ki napua kasua adeada mau.

²⁰Go namaetoana ki Yehovah e pavaga dip̃a Israel; go e naga, Nalakena nalauna waia eu dapiri navasasokiana aginau waina a dip̃aki tamada maga asa, po da dogo parati ki nadaleogu mau;

²¹Kinau ma aga wo da moro kopasi lua pa dua ki naraeda mau naatam̃oli sikai ni nalauna maga waina Yoshua e doropusi ra, ragi waina e mate:

²²Naga aga maridogo Israel ara, nara euga wo pavaigoro napua ki Yehovah naga euga surata pae asa, ega tapala waina tamada maga eu pavaigoro e, kite e pe tika.

²³Go Yehovah e doropusi nalauna maga wanogoe, po da kopasi lua ra m̃araverave mau; go e da pitua ki da paki nam̃elearu ni Yoshua mau.