Read Nguna Togoa Etafe North TEA VASAP̃OTAE MAGA 20 Bible Online

TEA VASAP̃OTAE MAGA 20 - Nguna Togoa Etafe North bible

TEA VASAP̃OTAE MAGA 20

¹Go Israel natuna maga mamau puti eu dave pano, go navata e pei tea soso‐saisai‐kiana dapala naatam̃oli sikai maau, pae Dan pa pa paki Beer‐sheba, go navanua ni Cilead, pa punusi Yehovah paki Mispah.

²Go nap̃au maga ni narei mamau puti, ni naworawora mamau puti ni Israel, eu dum̃ada lawo ki da nasaisaiana ni narei ki Sup̃e, naatam̃oli manu p̃onotia pati tea surata ki natuada waina eu sailua lova.

³(Go Benyamin natuna maga eu dogo naga Israel natuna maga eu sake paki Mispah pano). Go Israel natuna maga eu naga, Kuga vasa, nasigisigileoana waia e pei tea mariana dapale sava?

⁴Go naatam̃oli wanogoe nawora ni Levi, nagoroi waina e pei tea maripunueana anawota, e pasadara, po naga, A umai paki Cibeah waina e pei agi Benyamin, kinau go narup̃a aginau, naga aroga m̃enaki asa.

⁵Go naatam̃oli maga ni Cibeah eu duleana dip̃a au, po dalivirigoro nasum̃a dip̃a au, p̃ogi; eu midoa ki nia naga euga mari punue au, go eu mari narup̃a aginau e one natano, go e mate asa.

⁶Go a puati narup̃a aginau po masi kotokotovi a, po dip̃aki lua e pa usuraki navanua mamau ni tea veani‐pioli‐kiana ki Israel: nalakena eu po mari nawosiana sa go naveilalaana doko Israel.

⁷Kuga leo, Israel natuna maga, tea mamau puti kakamu, kuga vitua ki navasaana animu go ki navusum̃aki‐potae‐ana animu nalo ni tea wanogoe.

⁸Go narei mamau puti eu duleana dapala naatam̃oli sikai maau, doko do naga, Tuga ta pano te naata kakagida paki tap̃aup̃au aneana mau, go tuga ta dawasi te naata kakagida paki nasum̃a aneana mau.

⁹Ma ragi waia naleo waina tuga mari a paki Cibeah e pei tea waia; tuga sake pano dip̃a e pae gole;

¹⁰Go tuga viragi naatam̃oli rualima sikai ni p̃onotia sikai ni naworawora mamau puti ni Israel, go p̃onotia sikai ni manu sikai, go manu sikai ni tivilia sikai, naga euga magi narei dape navinaga umai, ragi waina euga wo umai paki Cibeah ki Benyamin, ega tapala naveilalaana mamau waina eu mari a doko Israel.

¹¹Go naatam̃oli mamau puti ni Israel eu pei tea saisaikiana dip̃a natokoana wanogoe, eu dum̃ada puluti ra dapala naatam̃oli sikai maau.

¹²Go naworawora maga ni Israel eu dip̃aki lua naatam̃oli maga eu pa usuraki naworawora mamau ni Benyamin, po naga, Seve nasigisigileoana waia waina e pei tea mariana m̃aleoputo kakamu?

¹³Go nalakena tea wanogoe kuga vitua ki naatam̃oli maga wanogoe, tea p̃arop̃aro maga, waina eu doko Cibeah, naga auga mari punue ra, po mari puoli ki nasaana ega m̃elu dua ki Israel pano. Ma Benyamin natuna maga eu da masauna mau naga euga rogo parati ki nadaleo ni taida maga Israel natuna maga.

¹⁴Go Benyamin natuna maga eu dum̃ada saisai ki da m̃elu dua ki natokoana maga paki Cibeah, naga euga tave paki navakalo dip̃a Israel natuna maga.

¹⁵Go Benyamin natuna maga eu pei tea veveana naaleatia wanogoe m̃elu dua ki natokoana maga eu pei naatam̃oli tivilia dua go manu takuna latesa waina eu sailua lova, masale ki tea maga waina eu doko Cibeah, waina eu pei tea veveana eu pei naatam̃oli p̃onotia larua tea matadoaana maga.

¹⁶Narei mamau puti wanogoe naatam̃oli p̃onotia larua kakada tea matadoaana maga eu pei mawiri; nara mamau puti eu mariatae pulua ki vatu sikai paki nalolu sikai, po da nadi pele mau.

¹⁷Go naatam̃oli maga ni Israel, masale ki Benyamin, eu pei tea veveana eu pei naatam̃oli manu p̃onotia pati waina eu sailua lova; nara mamau puti eu pei naatam̃oli ni navakalo.

¹⁸Go eu duleana po sake paki Beth‐el, po pusuusu paki Sup̃e; go Israel natuna maga eu naga, Sei ega maginami sake pea paki navakalo dip̃a Benyamin natuna maga? Go Yehovah e naga, Yudah ega vea.

¹⁹Go Israel natuna maga eu duleana malip̃ogi po m̃enakigoro Cibeah.

²⁰Go naatam̃oli maga ni Israel eu dave paki navakalo dip̃a Benyamin; go naatam̃oli maga ni Israel eu ovara ki navakalo dip̃a ra pisari Cibeah.

²¹Go Benyamin natuna maga eu dave m̃elu dua ki Cibeah, po mari sa ki Israel naaleatia wanogoe naatam̃oli tivilia dua go manu takuna dua kakada paki natano.

²²Go narei naatam̃oli maga ni Israel eu dum̃ada silae ra, po moro ovara ki navakalo tokora waina eu dum̃ada ovara ki da asa naaleatia vea.

²³(Go Israel natuna maga eu sake pano po dagi narae ni Yehovah pa pa paki ragi melu; go eu pusuusu paki Yehovah, eu naga, Aga moro paki m̃aladigi paki navakalo dip̃a taigu Benyamin, kite? Go Yehovah e naga, Kuga sake pano dip̃a e).

²⁴Go Israel natuna maga eu rumai paki m̃aladigi dip̃a Benyamin natuna maga naaleatia kerua.

²⁵Go Benyamin e dave pano sua ra m̃elu dua ki Cibeah naaleatia kerua, po moro mari sa ki Israel natuna maga paki natano naatam̃oli tivilia sikai go manu takuna latolu kakada; nara mamau puti eu pei tea sailua lova.

²⁶Go Israel natuna mamau puti, go narei mamau puti, eu sake pano, po umai paki Beth‐el, po dagi, po do natano tokora wanogoe narae ni Yehovah, po pali naaleatia wanogoe pa pa paki ragi melu; go eu pitua ki naviriana tap̃arakiana maga, go naviriana maga ni natam̃ateana narae ni Yehovah.

²⁷Go Israel natuna maga eu pusuusu paki Yehovah, (go areka ni navasasokiana ki Sup̃e e doko tokora wanogoe naaleatia maga wanogoe,

²⁸Go Finehas, natu ni Eleasar, natu ni Aaron, e do lawodu naraena naaleatia maga wanogoe), eu naga, Aga moro dave pano paki navakalo dip̃a taigu Benyamin natuna maga, kite aga makoto ki nia? Go Yehovah e naga, Kuga sake pano; nalakena matamai aga wo pitua ki nia paki nam̃elearum̃a.

²⁹Go Israel e lawo ki tea kusugoro maga dip̃a Cibeah daliviri.

³⁰Go Israel natuna maga eu sake pano dip̃a Benyamin natuna maga naaleatia ketolu, po dum̃ada ovara ki da dip̃a Cibeah, dapala waina eu mari a sala vea maga.

³¹Go Benyamin natuna maga eu dave pano sua narei, po pei tea vuatiluaana pano pa dua ki natokoana; go eu atulake atugi narei po mari punue seara kakada dapala waina eu mari a sala vea maga napua toniana maga, waina sikai e sake paki Beth‐el, go kerua e paki Cibeah ni namalasi, eu alagoro pei naatam̃oli ni Israel rualima dolu.

³²Go Benyamin natuna maga eu naga, Nara eu pei tea atugiana naraegida dakiusi sala vea. Ma Israel natuna maga eu naga, Tuga sava pano, po puati lua ra pa dua ki natokoana paki napua toniana maga.

³³Go naatam̃oli mamau puti ni Israel eu duleana m̃elu dua ki tokora adeada, po dum̃ada ovara ki da pisari Baaltamar: go tea kusugoro maga ni Israel eu sava duap̃ora m̃elu dua ki tokora adeada, m̃elu dua ki Maareceba.

³⁴Go naatam̃oli tivilia sikai tea matadoaana maga m̃elu dua ki Israel mamau puti eu rumai paki kivea ki Cibeah, go navakalo wanogoe e madaga: ma nara eu da atae mau naga nasaana e pei m̃aladigi ki da.

³⁵Go Yehovah e atugi Benyamin narae ni Israel: go Israel natuna maga eu mari sa ki tea ni Benyamin naaleatia wanogoe naatam̃oli tivilia dua go manu lima go p̃onotia takuna sikai: nara mamau puti eu sailua lova.

³⁶Go Benyamin natuna maga eu punusi naga eu pei tea atugiana: go naatam̃oli maga ni Israel eu pitua ki tokora paki Benyamin, nalakena eu pavatu tea kusugoro maga waina eu lawo ki da dip̃a Cibeah.

³⁷Go tea kusugoro maga eu mari m̃araverave, po sava paki Cibeah; go tea kusugoro maga eu dum̃ada sailua ra ovara ki da, po atugi natokoana mamau ki nawoka ni lova.

³⁸Go navaivaiana tatutakiana agi naatam̃oli maga ni Israel sikoti tea kusugoro maga e pei, naga euga mari napopouru warua sikai ni naasua ega sake m̃elu dua ki natokoana.

³⁹Go naatam̃oli maga ni Israel eu liliu doko navakalo, go Benyamin e atulake atugi po mari punue naatam̃oli maga ni Israel seara kakada, eu alagoro pei naatam̃oli rualima dolu: nalakena eu naga, Lomau eu pei tea atugiana naraegida, dapala waina e doko navakalo vea.

⁴⁰Ma napopouru e atulake sake m̃elu dua ki natokoana tea lawodu ni naasua, go Benyamin e leo kitaku, go kuga leo, natokoana mamau e asua sake paki nakoroatelagi.

⁴¹Go naatam̃oli maga ni Israel eu liliu, go naatam̃oli maga ni Benyamin eu saram̃akoto: nalakena eu punusi naga nasaana e po pa parati ki da.

⁴²Go eu dum̃ada doa ra narae ni naatam̃oli maga ni Israel paki napua ni masop̃alo; ma navakalo e dausi puluti ra; go tea maga waina eu dave m̃elu dua ki natokoana maga eu mari sa ki da m̃aleoputo kakada.

⁴³Eu dalivirigoro Benyamin, po kopasi ra, po pasi ra paki natano tokora ni namaromaroana adeada, pa pa paki kivea ki Cibeah paki taleva ni elo sake.

⁴⁴Go naatam̃oli tivilia sikai go manu takuna latolu ni Benyamin eu dowo; tea mamau puti wanogoe eu pei naatam̃oli ni namarimatuaana.

⁴⁵Go eu dum̃ada doa ra po sava paki masop̃alo paki vatu laketoko ni Rimmon: go eu pilavilae ra napua toniana maga naatam̃oli manu lima; go eu dausi puluti ra pa pa paki Cidom, po atugi naatam̃oli manu dua kakada.

⁴⁶Go tea mamau puti ni Benyamin waina eu dowo naaleatia wanogoe eu pei naatam̃oli tivilia dua go manu takuna lima waina eu sailua lova; tea mamau puti wanogoe eu pei naatam̃oli ni namarimatuaana.

⁴⁷Ma naatam̃oli p̃onotia latesa eu dum̃ada doa ra po sava paki masop̃alo paki vatu laketoko ni Rimmon, po doko vatu laketoko ni Rimmon doko atelagi pati.

⁴⁸Go naatam̃oli maga ni Israel eu moro liliu umai dip̃a Benyamin natuna maga, po atugi ra ki nawoka ni lova, natokoana mamau, go katel maga, go tea mamau puti waina eu pap̃ai ra: go natokoana mamau puti waina eu pap̃ai ra eu dokoni ra ki nakapu.