Read Nguna Togoa Etafe North TEA VASAP̃OTAE MAGA 3 Bible Online

TEA VASAP̃OTAE MAGA 3 - Nguna Togoa Etafe North bible

TEA VASAP̃OTAE MAGA 3

¹Go tea maga waia eu pei nalauna maga waina Yehovah e doropusi ra, naga ega maridogo Israel ara, tea mamau puti waina eu da atae navakalo mamau puti ni Kanaan mau;

²Naga tagona maga ni Israel natuna maga euga atae, naga ega mari pisei ki da navakalo, tea maga kakada waina eu da atae a sala vea mau:

³Nawota lima ki Filistine maga, go naworawora ni Kanaan mamau puti, go naka ni Sidon, go naworawora ni Hivah waina eu doko tava Lebanon doko, pae tava Baalhermon pa pa paki tokora ni nasiliana ni Hamath.

⁴Go eu doko naga ega maridogo Israel ara, naga ega atae euga wo dogo parati ki natip̃akiana maga ki Yehovah, waina e dip̃aki tamada maga asa pae nam̃elearu ni Moses.

⁵Go Israel natuna maga eu doko m̃aleoputo ni naworawora ni Kanaan doko; m̃aleoputo ni naworawora ni Heth, go ni naworawora ni Amor, go ni naworawora ni Peris, go ni naworawora ni Hivah, go ni naworawora ni Yebus;

⁶Go eu piragi natuda nagoroi maga naga euga vei adagoroi maga, po pitua ki natuda nagoroi maga paki natuda naanoai maga, po magi sup̃e adeada maga suasua.

⁷Go Israel natuna maga eu mari tea waina e sa namata maga ni Yehovah, po malio ki Yehovah Sup̃e adeada, po magi Baal maga go Asheroth maga suasua.

⁸Go namaetoana ki Yehovah e pavaga dip̃a Israel, go e sori ra paki nam̃elearu ni Kushan‐risataim nawota ni Mesopotamia: go Israel natuna maga eu magi Kushan‐risataim suasua natau latolu.

⁹Go Israel natuna maga eu pioso paki Yehovah, go Yehovah e magi Israel natuna maga sike tea maumau sikai e duleana, waina e mauti ra, Othniel natu ni Kenas, Kaleb taina takariki.

¹⁰Go Naata ni Yehovah e umai doko asa, go e pasap̃otae Israel; go e dave paki navakalo pano, go Yehovah e pitua ki Kushan‐risataim nawota ni Mespotamia paki nam̃elearuna: go nam̃elearuna e marimatua ki Kushan‐risataim.

¹¹Go navanua e dam̃ate doko natau rualima pati. Go Othniel natu ni Kenas e mate.

¹²Go Israel natuna maga eu moro mari tea waina e sa namata maga ni Yehovah: go Yehovah e mari Eklon nawota ni Moab e kasua dip̃a Israel, nalakena eu mari tea waina e sa namata ni Yehovah.

¹³Go e piragi saisai ki Ammon natuna maga go Amalek natuna maga eu rumai punusi a; go e pano po atugi Israel, go eu dape peani natokoana ni paama maga.

¹⁴Go Israel natuna maga eu magi Eklon nawota ni Moab suasua natau rualima sikai tamate latolu.

¹⁵Go Israel natuna maga eu pioso paki Yehovah, go Yehovah e madeada sike tea maumau sikai e duleana, Ehud natu ni Cera, nawora ni Benyamin, naatam̃oli sikai waina e pei mawiri: go Israel natuna maga eu dip̃aki lua navituaana sikai pae nam̃elearuna paki Eklon nawota ni Moab.

¹⁶Go Ehud e dum̃ana maneana mari lova sikai waina e pilake nawokana dua, kubit sikai e pei navarauana kakana; go e otisoki a etano ni sugoro aneana maga doko namaona ni matua.

¹⁷Go e dape navituaana wanogoe paki m̃aladigi dua Eklon nawota ni Moab asa: go Eklon e pei naatam̃oli m̃anopunopu p̃arua.

¹⁸Go ragi waina e pitua ki sua navituaana e dip̃aki lua narei waina eu dapetape tea vituakiana.

¹⁹Ma nae e liliu pae malo ni nasup̃e ni vatu maga waina eu doko pisari Cilcal, po naga, A peani navasaana ni p̃aia sikai paki‐go, nawota O. Go e naga, P̃a vunuta. Go tea mamau puti waina eu lawodu pisari a eu dave m̃elu dua ki nia pano.

²⁰Go Ehud e umai punusi a; go nae e dasake doko em̃ago ni elagi ni namamaladiana aneana e masikina. Go Ehud e naga, A peani navasaana sikai pae Sup̃e paki‐go. Go e duleana m̃elu dua ki malo tasake aneana.

²¹Go Ehud e sai nam̃elearuna ni mawiri, po puati lova m̃elu dua ki namaona ni matua, po sai ki nia po puri nap̃elena:

²²Go nakauna ma e musu dausi namenana; go nap̃eletia e p̃onogoro namenana, nalakena e da sai lua lova m̃elu dua ki nap̃elena mau; go e sasama natakuna.

²³Go Ehud e dave paki natara‐taup̃a, po kokoro namata maga ni em̃ago ni elagi, po kisoki ra.

²⁴Go ragi waina nae e dave pano sua, tea suasua aneana maga eu rumai; go eu punusi, go kuga leo, nakokoro maga ni em̃ago ni elagi eu pei tea kisokiana; go eu naga, Nae e alagoro do dave em̃ago ni nataveana ekopu ni em̃ago tukituki ni namamaladiana.

²⁵Go eu leogoro pa pa eu maliere: go kuga leo, e da p̃olagati nakokoro maga ni em̃ago ni elagi mau; go eu dape tea viloki, po p̃olagati ra: go kuga leo, nawota adeada e dowo mate one natano.

²⁶Go Ehud e m̃elu pano ragi waina eu mari daliali, go nae e pano liu malo ni nasup̃e ni vatu maga, po sava pano paki Seira.

²⁷Go e pakilina ragi waina e po umai, naga e sui paiga sikai navanua ni tava ni Efraim, go Israel natuna maga eu siwo sikoti a pae navanua ni tava, go nae e pea ki da.

²⁸Go e noa ki da, e naga, Kuga sava dausi au: nalakena Yehovah e po pitua ki tea kokona ki mu maga Moab paki nam̃elearumu. Go eu siwo dausi a, po puati tokora maga ni natuagotoana ni Yordan dip̃a Moab, po da suasua ki naatam̃oli sikai naga ega tuagoto mau.

²⁹Go eu atugi Moab ragi wanogoe eu alagoro pei naatam̃oli tivilia sikai, sara naatam̃oli m̃anopunopu, go sara naatam̃oli ni namarimatuaana; go naatam̃oli sikai e da m̃elu pano mau.

³⁰Go Moab e pei tea mariana e pakitano naaleatia wanogoe etano ni nam̃elearu ni Israel. Go navanua e dam̃ate doko natau rualima latolu.

³¹Go edaku ki nia Samkar e doko, e pei natu ni Anat, waina e atugi Filistine maga naatam̃oli p̃onotia latesa ki tea tip̃a sikai ni oks: go nae ma e mauti Israel.