Read Nguna Togoa Etafe North TEA VASAP̃OTAE MAGA 4 Bible Online

TEA VASAP̃OTAE MAGA 4 - Nguna Togoa Etafe North bible

TEA VASAP̃OTAE MAGA 4

¹Go Israel natuna maga eu moro mari tea waina e sa namata maga ni Yehovah, ragi waina Ehud e mate sua.

²Go Yehovah e sori ra paki nam̃elearu ni Yabin nawota ni Kanaan, waina e maramara doko Hasor; go tea maraki taua ni naatam̃oli navakalo aneana maga e pei Sisera, go nae e doko Haroset ni nalauna maga doko.

³Go Israel natuna maga eu pioso paki Yehovah: nalakena e peani kariot ni airon p̃onotia loveti; go nae e diesoki kasua ki Israel natuna maga natau rualima dua.

⁴Go Deborah, profeta nagoroi sikai, Lapidot anagoroi, nae e pasap̃otae Israel ragi wanogoe.

⁵Go nae e doko etano ni paama ki Deborah doko namawota ni Ramah go ni Beth‐el navanua ni tava ki Efraim, go Israel natuna maga eu sake umai punusi a raki navasap̃otaeana.

⁶Go e dip̃aki lua po soso Barak natu ni Abinoam pae Kedesh‐naftali, po noa ki nia, e naga, Yehovah, Sup̃e ki Israel e da pitip̃aki, po naga, P̃a vano po pualua paki Tabor, po piragi naatam̃oli manu rualima sikai ni Naftali natuna maga go ni Sebulun natuna maga euga sikoti ko pano, kite?

⁷Go aga wo puati lua Sisera, tea maraki taua ni naatam̃oli navakalo maga ki Yabin, go kariot aneana maga go taua aneana maga euga umai punusi ko paki noaisara Kishon; go aga wo pitua ki nia paki nam̃elearum̃a.

⁸Go Barak e noa ki nia, e naga, Ku pe sikoti au pano, go a pe wo pano: ma ku pe ta sikoti au pano mau, a pe wo da pano mau.

⁹Go e naga, Aga wo sikoti ko pano lomau: ma nadodomadagani‐ko‐ana ega wo da doko napua waina nigo p̃a wo pae asa pano mau; nalakena Yehovah ega wo sori Sisera paki nam̃elearu ni nagoroi sikai. Go Deborah e duleana, po sikoti Barak pano paki Kedesh.

¹⁰Go Barak e soso saisai ki Sebulun go ki Naftali paki Kedesh; go naatam̃oli manu rualima sikai eu sake sikoti natuana pano. Go Deborah e sake sikoti a pano.

¹¹Go Heber nawora ni Kain e m̃elu dua ki naworawora ni Kain, m̃elu dua ki Hobab natuna maga, Moses anatawiana, go e pukesi tap̃aup̃au aneana pa pa paki oak ni Saananim, waina e pisari Kedesh.

¹²Go e noakisai Sisera naga Barak natu ni Abinoam e sake pano paki tava Tabor.

¹³Go Sisera e soso saisai ki kariot aneana mamau puti, kariot ni airon p̃onotia loveti, go narei mamau waina eu sikoti a pae Haroset ni nalauna maga, pa pa paki noaisara Kishon.

¹⁴Go Deborah e noa ki Barak, e naga, P̃a tuleana; nalakena masoso e pei naaleatia waina Yehovah e po pitua ki Sisera paki nam̃elearum̃a asa: Yehovah e da dave pea ki‐go pano mau, kite? Go Barak e siwo m̃elu dua ki tava Tabor, go naatam̃oli manu rualima sikai eu dausi a.

¹⁵Go Yehovah e marimatua ki Sisera, go kariot aneana mamau puti, go taua aneana mamau ki nawoka ni lova narae ni Barak; go Sisera e siwo m̃elu dua ki kariot aneana po sava ki natuana pano.

¹⁶Ma Barak e sava dausi kariot maga go dausi taua pa pa paki Haroset ni nalauna maga: go taua mamau ki Sisera eu dowo ki nawoka ni lova; te naatam̃oli sikai e da pei tea toropusiana mau.

¹⁷Ma Sisera e sava ki natuana pano paki tap̃aup̃au ki Yael nagoroi ki Heber nawora ni Kain: nalakena natam̃ateana e doko namawota ni Yabin nawota ni Hasor go ni nasum̃a ni Heber nawora ni Kain.

¹⁸Go Yael e dave naga ega sua Sisera, go e noa ki nia, e naga, P̃a tawasi umai, nawota aginau, p̃a tawasi umai punusi au; p̃a ta mataku mau. Go a dawasi punusi a paki ekopu ni tap̃aup̃au, go e kulugoro e ki napanu sikai.

¹⁹Go e noa ki nia, e naga, P̃a tua au, a pavara ni ko asa, noai kiki aga munugi a; nalakena a madou. Go e p̃olagati noai ni nawili sikai ni milk, po duae e munu, go e kulugoro e.

²⁰Go e noa ki nia, e naga, P̃a lawodu namata ni tap̃aup̃au, go ega wo doko naga te naata e pe wo umai po pusuusu paki‐go, po naga, Te naata e doko nea, kite? Go p̃a naga, Ee.

²¹Go Yael nagoroi ki Heber e dape pin sikai ni tap̃aup̃au, po doropusi hammer sikai e doko nam̃elearuna, po palako pano punusi a, po duki pin wanogoe paki nap̃orona, go e siwo paki natano; nalakena nae e maturu daratara go e mawosa; go e mate.

²²Go p̃a leo, Barak e do sava dausi Sisera, go Yael e dave naga ega sua e, po noa ki nia, e naga, P̃a umai, go aga wo pisei ki‐go naatam̃oli waina nigo ku laaga asa. Go e umai punusi a, go p̃a leo, Sisera e mate one, go pin ni tap̃aup̃au e doko nap̃orona.

²³Go Sup̃e e mari Yabin nawota ni Kanaan e pakitano narae ni Israel natuna maga naaleatia wanogoe.

²⁴Go nam̃elearu ni Israel natuna maga e pano po do pano po kasua dip̃a Yabin nawota ni Kanaan, pa pa eu mari sa ki Yabin nawota ni Kanaan.