Read Nguna Togoa Etafe North TEA VASAP̃OTAE MAGA 5 Bible Online

TEA VASAP̃OTAE MAGA 5 - Nguna Togoa Etafe North bible

TEA VASAP̃OTAE MAGA 5

¹Go Deborah e lega go Barak natu ni Abinoam naaleatia wanogoe, ero naga,

²Nalakena tea maraki maga ni Israel eu peapea, Nalakena narei eu suasua dum̃ada pitua ki da, Kuga vasap̃ia ki Yehovah.

³Kuga rogo, nawota maga; kuga taki dorogo, tea maraki maga; Kinau, io kinau, aga wo lega ki Yehovah; Aga wo lega samasama ni Yehovah, Sup̃e ki Israel.

⁴Yehovah, ragi waina ku dave m̃elu dua ki Seir pano, Ragi waina ku surata m̃elu dua ki navanua ki Edom, Maramana e duruuru, go nakoroatelagi maga eu lawolawoki, Go napopouru maga eu lawolawo ki noai.

⁵Tava maga eu duruuru pa dua ki narae ni Yehovah, Sinai waina pa dua ki narae ni Yehovah, Sup̃e ki Israel.

⁶Naaleatia maga ki Samkar natu ni Anat, Naaleatia maga ki Yael, napua warua maga eu pei tea makotokiana, Go tea surata napua eu surata napua dagele maga.

⁷Tea maraki maga eu makoto doko Israel, eu makoto, Pa pa kinau Deborah a duleana, Pa pa kinau a duleana p̃ila ni Israel sikai.

⁸Eu matadoa sup̃e vau maga; Ragi wanogoe navakalo e doko namata‐pua maga: Nakokoro sikai kite naio sikai e pei tea vunusiana mau M̃aleoputo ni manu rualima pati ni Israel, kite?

⁹Nap̃op̃ogu e paki tea vasa‐dawonaki maga ni Israel, Waina eu suasua dum̃ada pitua ki da m̃aleoputo ni narei: Kuga vasap̃ia ki Yehovah.

¹⁰Kuga to noa e, nimu waina ku sakesaake ass tare maga, Nimu waina ku doko raki navasap̃otaeana, Go nimu waina ku surata pae napua.

¹¹Uvea ki nadaleo ni tea tipe maga, pisari tokora ni navautuana maga, Tokora maga wanogoe euga wo dogorogo ki samasama ni namariana leana maga ki Yehovah, Namariana leana maga ni namarakiana aneana doko Israel. Ragi wanogoe narei ki Yehovah eu siwo paki namata‐pua maga.

¹²P̃a tarapa, p̃a tarapa, Deborah; P̃a tarapa, p̃a tarapa, p̃a vasa nalegaana sikai: P̃a tuleana, Barak, po piragi lua pavakoto tea vua‐pavakotoana anigo maga, nigo natu ni Abinoam.

¹³Ragi wanogoe namagovai toropusiana ni tea warua maga eu siwo umai; Narei ki Yehovah eu siwo umai punusi au m̃aleoputo ni tea marimatua maga.

¹⁴M̃elu Efraim tea maga waina nakoada e doko Amalek; Edakugoro ko, Benyamin, m̃aleoputo ni narei anigo maga; M̃elu Makir tea vasa‐dawonaki maga eu siwo umai, Go m̃elu Sebulun tea maga waina eu puati tiko ki tea midiri.

¹⁵Go tea maraki maga ni Issakar eu sikoti Deborah; Go dapala Issakar, dapala nogoe Barak; Eu pei tea tip̃aki‐lua‐ana paki nap̃aloa sikoti natuana. Pisari noaisara maga ki Reuben namidoaki‐dawona‐kiana warua maga ni nap̃op̃oda eu doko.

¹⁶Ekasana ku do natano namawota ni loga maga ni shiip, Naga p̃a rogo nasui‐nau‐ana maga ni navata maga? Pisari noaisara maga ki Reuben namidoakiusiusiana warua maga ni nap̃op̃oda eu doko.

¹⁷Cilead e one taleva kerua ni Yordan: Go Dan, ekasana e m̃enaki doko rarua maga? Asher e do natano pisari elau ni natasi. Po one pisari nawora aneana maga.

¹⁸Sebulun e pei narei sikai waina eu midoa ki p̃alo ki namauriana adeada paki namateana, Go Naftali, tokora vakilagi maga ni nagurua.

¹⁹Nawota maga eu rumai po marimari; Ragi wanogoe nawota maga ni Kanaan eu marimari, Doko Taanak, pisari noai maga ni Mekiddo: Eu da dape te nataluaana ni m̃ane mau.

²⁰Eu marimari pae nakoroatelagi, M̃asoe maga eu marimari pae napua adeada maga dip̃a Sisera.

²¹Noaisara Kishon e dape lua ra, Noaisara ni tea tuai maga, noaisara Kishon. Naatagu O, ku pasi nakasuaana.

²²Ragi wanogoe nam̃ele maga ni horse eu dukituki. Nalakena natam̃atam̃aluaana maga, natam̃atam̃aluaana maga ni tea kasua adeada maga.

²³Kuga vasa sa ki Meros, agelo ki Yehovah e noa e, Kuga vasa sa ki p̃arua ki tea maga waina eu doko asa doko; Nalakena eu da umai paki nasilae Yehovah‐ana mau, Paki nasilae Yehovah‐ana m̃aleoputo ni tea marimatua maga.

²⁴Yael ega wo pei tea vasap̃iakiana ki nagoroi maga, Nagoroi ki Heber nawora ni Kain, Ega wo pei tea vasap̃iakiana ki nagoroi maga ni tap̃aup̃au.

²⁵E datago noai, go e dua e milk; E maneana dape batar doko lasa ki nawota maga.

²⁶E sai ki nam̃elearuna paki pin, Go ki nam̃elearuna ni matua paki hammer ki tea wosiwosi maga; Go e duki Sisera, e duki sai nap̃auna, Go e duki lulu po duki sasama nap̃orona.

²⁷Pisari natuana e ditip̃atua, e dowo, e one: Pisari natuana e ditip̃atua, e dowo: Tokora waina e ditip̃atua asa, tokora wanogoe e dowo asa, e pei tea marisakiana.

²⁸E dorovaki leoduru pae namata leoduru, po pioso, Sisera p̃ilana e pioso duru pae namata leoduru sariana, Ekasana kariot aneana e mari daliali naga ega umai? Ekasana tea taliepu maga ni kariot aneana maga eu mari daliali?

²⁹Tukurau manumatua aneana maga eu pasadara e, Go nae e pasadara liliu dum̃ana paki nia,

³⁰Eu da pap̃ai, eu da dap̃otae tea vuti‐lua‐pavakotoana, kite? Nagoroi atara sikasikai, nagoroi atara duarua agi sara naatam̃oli sarasara ra; Tea vuti‐lua‐pavakotoana sikai ni sugoro pupugiana maga agi Sisera, Tea vuti‐lua‐pavakotoana sikai ni sugoro pupugiana maga, tea turi midiriana, Sugoro pupugiana sikasikai, tea turi midiria taleva dua, agi nanoa maga ni tea vuti‐luapavakotoana maga sarasara ra?

³¹Dapala nogoe, tea kokona ki‐go mamau puti euga vuoli, Yehovah O: Ma tea maga waina eu dodomi a euga tapala natave‐pano‐ana ni elo doko namarimatuaana aneana. Go navanua e dam̃ate doko natau rualima pati.