Read Nguna Togoa Etafe North TEA VASAP̃OTAE MAGA 7 Bible Online

TEA VASAP̃OTAE MAGA 7 - Nguna Togoa Etafe North bible

TEA VASAP̃OTAE MAGA 7

¹Go Yerubbaal, waina e pei Cideon, e duleana malip̃ogi loaloa, go narei mamau waina eu sikoti a, go eu m̃enaki pisari namata noai ni Harod: go tokora ni nam̃enakiana ki Midian e doko taleva ni north kakada, pisari tava ni Moreh, doko nap̃aloa.

²Go Yehovah e noa ki Cideon, e naga, Narei waina eu sikoti ko eu laapa sa dapala a pe ta pitua ki Midian paki nam̃elearuda, Israel eu pe vakavakae dip̃a au, po naga, Nam̃elearugu e po maginau mari namautiana.

³Go ragi waia p̃a vioso, a pavara ni ko, nadaliga maga ni narei, po naga, Te naata seara eu pe mataku po m̃anaunau, euga liliu po pano daliviri pae Cilead. Go naatam̃oli ni narei tivilia dua go manu takuna dua eu liliu pano; go tivilia sikai eu pei tea toropusiana eu doko.

⁴Go Yehovah e noa ki Cideon, e naga, Narei eu ko laapa sa; p̃a viragi ra siwo paki noai, go aga wo manigo maridogo ra tokora wanogoe: go ega wo doko, naga naata waina aga wo noa ki‐go asa, Tea waia ega sikoti ko pano; nae ega sikoti ko pano; go sara naata waina aga wo noa ki‐go ara, Tea maga waia euga ta sikoti ko pano mau; nara euga ta sikoti ko pano mau.

⁵Go e piragi narei siwo paki noai: go Yehovah e noa ki Cideon, e naga, Sara naata waina euga wo saovi noai ki namenada dapala waina koria e saovi a, p̃a lawo ki da euga toko mamau; go sara naata waina euga wo kolo ki napatuada naga euga munu.

⁶Go naveveana ni tea maga waina eu sao ki nam̃elearuda paki nawokada, e pei naatam̃oli p̃onotia dolu: ma tea p̃ota mamau puti ni narei eu kolo ki napatuada naga euga munu noai.

⁷Go Yehovah e noa ki Cideon, e naga, Aga wo mauti mu pae naatam̃oli p̃onotia dolu waina eu sao, po pitua ki Midian paki nam̃elearum̃a; go narei mamau euga vano sara naatam̃oli sikasikai paki tokora adeada maga.

⁸Go narei eu dape navinaga e doko nam̃elearuda, go paiga adeada maga: go e dip̃aki lua naatam̃oli mamau puti ni Israel sara naatam̃oli eu sikasikai paki tap̃aup̃au adeada maga, ma e mauti naatam̃oli p̃onotia dolu wanogoe: go tokora ni nam̃enakiana ki Midian e doko etano ki nia doko nap̃aloa.

⁹Go e pakilina nap̃ogiana wanogoe, naga Yehovah e noa ki nia, e naga, P̃a tuleana, p̃a siwo dip̃a tokora ni nam̃enakiana; nalakena a po pitua ki nia paki nam̃elearum̃a.

¹⁰Ma nigo ku pe mataku naga p̃a siwo, p̃a siwo nigo go Purah natureai anigo paki tokora ni nam̃enakiana:

¹¹Go p̃a wo dogo tea waina eu pasa asa; go edaku ki nia nam̃elearum̃a eroga wo kasua naga p̃a siwo dip̃a tokora ni nam̃enakiana. Go e siwo nae go Purah natureai aneana paki namatap̃ago ni tea vua nalikau maga waina eu doko tokora ni nam̃enakiana.

¹²Go Midian go Amalek go tea mamau puti ni nalauna p̃ota maga ni ist eu one nap̃aloa eu dapala midiri maga nalo ni nalaapaana; go kamel adeada maga eu mari sa pei tea veveana, eu dapala naworaone waina e one nagole ni natasi nalo ni nalaapaana.

¹³Go Cideon e umai, go p̃a leo, naatam̃oli sikai e do dogorogo ki nap̃erea sikai paki tea ni m̃aladigi ki nia, go e naga, P̃a leo, a p̃erea ki nap̃erea sikai, go p̃a leo, keke sikai ni bred ni barle e malulu paki tokora ni nam̃enakiana ki Midian, po umai pa pa paki tap̃aup̃au, po atugi a, go e dowo, go e dap̃olosiwo ki nia, go tap̃aup̃au e one natano.

¹⁴Go tea ni m̃aladigi ki nia e pasadara po naga, Tea wanogoe e da pei te navatuna p̃ota mau, ma e pei lova ki Cideon natu ni Yoash, naatam̃oli sikai ni Israel: Sup̃e e po pitua ki Midian paki nam̃elearuna, go taua mamau.

¹⁵Go e doko, ragi waina Cideon e dogo narogorogoana ni nap̃erea, go nanoap̃otaeana kakana, naga e suai natano; go e liliu paki tokora ni nam̃enakiana ki Israel, po naga, Kuga tuleana, nalakena Yehovah e po pitua ki taua ni Midian paki nam̃elearumu.

¹⁶Go e dap̃otae naatam̃oli p̃onotia dolu wanogoe eu pei taua dolu, go e pitua ki paiga maga paki nam̃elearuda mamau puti, go napura‐noai p̃alo maga, go nasulu maga doko nap̃alau ni napura‐noai maga.

¹⁷Go e noa ki da, e naga, Kuga leo punusi au, go kuga mari ega tapala nogoe: go kuga leo, kinau aga wo umai paki namatap̃ago ni tokora ni nam̃enakiana, go ega wo doko naga, dapala waina aga wo mari a, nimu kuga mari a ega tapala nogoe.

¹⁸Go aga wo sui paiga, kinau go tea mamau puti waina eu sikoti au, go nimu ma kuga sui paiga maga dalivirigoro tokora ni nam̃enakiana mamau, go kuga noa naga, Agi Yehovah go agi Cideon.

¹⁹Go Cideon, go naatam̃oli p̃onotia sikai waina eu sikoti a, eu rumai paki namatap̃ago ni tokora ni nam̃enakiana, naatulakeana ni ragi ni navavaigoroana m̃aleoputo, ragi waina eu po lawo ki sua tea vavaigoro maga: go eu sui paiga maga, po mari p̃oraworae napura‐noai maga waina eu doko nam̃elearuda.

²⁰Go taua dolu wanogoe eu sui paiga maga, po mari p̃oraworae napura‐noai maga, po puati nasulu maga eu doko nam̃elearuda ni mawiri, go paiga maga eu doko nam̃elearuda ni matua naga euga sui ra: go eu pioso, po naga, Lova ki Yehovah go ki Cideon.

²¹Go eu lawodu sara naatam̃oli eu sikasikai lawodu tokora adeada maga dalivirigoro tokora ni nam̃enakiana: go taua mamau eu sava; go eu darasa, po mari ra eu sava pano.

²²Go eu sui paiga p̃onotia dolu, go Yehovah e mari lova ki sara naatam̃oli eu dip̃a tea ni m̃aladigi ki da, go dip̃a taua mamau: go taua eu sava pa pa paki Beth‐sitta ni Sererah, pa pa paki Abel‐meholah pisari Tabat.

²³Go naatam̃oli maga ni Israel eu pei tea soso‐saisai‐kiana m̃elu dua ki Naftali, go m̃elu dua ki Asher, go m̃elu dua ki Manasseh mamau, go eu sava dausi Midian.

²⁴Go Cideon e dip̃aki lua tea tautauana maga eu pa usuraki navanua mamau ni tava ni Efraim, po naga, Kuga siwo umai naga kuga sua Midian, po puati noai maga ega vea ki da, pa pa paki Beth‐barah go Yordan. Go naatam̃oli mamau puti ni Efraim eu pei tea soso‐saisai‐kiana, po puati noai maga pa pa paki Beth‐barah, go Yordan.

²⁵Go eu puati tea maraki dua ni Midian, Oreb go Seeb; go eu mari punue Oreb pisari vatu laketoko ki Oreb, go eu mari punue Seeb pisari m̃oru ni navasokiana ni nawa ni vaine ki Seeb, po sava dausi Midian: go eu dape nap̃au ni Oreb go ni Seeb umai punusi Cideon taleva kerua ni Yordan.