Read Nguna Togoa Etafe North TEA VASAP̃OTAE MAGA 8 Bible Online

TEA VASAP̃OTAE MAGA 8 - Nguna Togoa Etafe North bible

TEA VASAP̃OTAE MAGA 8

¹Go naatam̃oli maga ni Efraim eu noa ki nia, eu naga, Seve naleo waia ku mari a paki gami, naga ku da soso gami mau ragi waina ku pano naga p̃a mari navakalo paki Midian? Go eu pululu kasua ki nia.

²Go e noa ki da, e naga, A po mari nasava ragi waia dapala mu? Naleleiana ni nawa ni vaine maga ki Efraim e da p̃ia liu nawa ni vaine ki Abieser, kite?

³Sup̃e e po pitua ki tea maraki dua ni Midian, Oreb go Seeb, paki nam̃elearumu: go a mariatae mari nasava dapala mu? Ragi wanogoe namaetoana adeada paki nia e makoto, ragi waina e pasa sua navasaana wanogoe.

⁴Go Cideon e umai paki Yordan, po duagoto, nae go naatam̃oli p̃onotia dolu waina eu sikoti a, eu mawosa, ma eu do sava dausi.

⁵Go e noa ki naatam̃oli maga ni Sukkoth, e naga, Kuga vitua, a pavara ni mu asa, ki m̃olim̃oli maga ni bred paki narei waina eu dausi au; nalakena nara eu mawosa, go kinau a do sava dausi Seba go Salmuna, nawota dua ni Midian.

⁶Go tea maraki maga ni Sukkoth eu naga, Nam̃elearu ni Seba go ni Salmuna ero doko nam̃elearum̃a ragi waia, naga auga tua taua ni naatam̃oli navakalo anigo bred, kite?

⁷Go Cideon e naga, Nalakena tea wanogoe ragi waina Yehovah ega wo pitua ki Seba go Salmuna paki nam̃elearugu, go aga wo p̃okalesue nap̃okasimu pilake tea vivitip̃a maga ni masop̃alo go pilake tea makalikali maga.

⁸Go e sake m̃elu dua ki tokora wanogoe po paki Penuel, go e pasa ki da dapala nogoe: go naatam̃oli maga ni Penuel eu pasadara e dapala waina naatam̃oli maga ni Sukkoth eu pasadara sua e.

⁹Go e moro noa ki naatam̃oli maga ni Penuel, e naga, Ragi waina aga wo liliu umai doko natam̃ateana, aga wo dakai nasum̃a varau pakilagi waia.

¹⁰Go Seba go Salmuna ero doko Karkor, go taua adeada maga eu sikoti ra, eu alagoro pei naatam̃oli tivilia sikai go manu takuna lima, tea mamau puti waina eu pei tea toropusiana ni taua mamau ni tea ni nalauna maga ni ist: nalakena naatam̃oli manu p̃onotia sikai go manu rualima dua waina eu sai lua lova eu dowo.

¹¹Go Cideon e sake pae napua ki tea maga waina eu doko tap̃aup̃au maga doko taleva ni ist ni Nobah go ni Yokbehah, po atugi taua ni Midian; nalakena taua eu midoa ki nia naga eu doko p̃ia doko.

¹²Go Seba go Salmuna ero sava pano; go e sava dausi ra; go e puati nawota dua ni Midian; Seba go Salmuna, po kura piri ki taua mamau.

¹³Go Cideon natu ni Yoash e liliu pae navakalo pae tokora ni nasakesakeana ni Heres.

¹⁴Go e puati natureai sikai ni naatam̃oli maga ni Sukkoth, po pusuusu paki nia: go e maneana midiri tea maraki maga ni Sukkoth, go tea matua kakana maga, naatam̃oli rualima larua tamate larua.

¹⁵Go e umai punusi naatam̃oli maga ni Sukkoth, po noa ki da, e naga, Kuga leo, Seba go Salmuna, waina ku pasadao au ara, po naga, Nam̃elearu ni Seba go ni Salmuna ero doko nam̃elearum̃a ragi waia, naga auga tua naatam̃oli anigo maga waina eu mawosa bred, kite?

¹⁶Go e puati tea matua maga ni natokoana, go tea vivitip̃a maga ni masop̃alo go tea makalikali maga, go e mari pisei ki naatam̃oli maga ni Sukkoth ara.

¹⁷Go e dakai nasum̃a varau pakilagi ni Penuel, po mari punue naatam̃oli maga ni natokoana wanogoe.

¹⁸Go e noa ki Seba go ki Salmuna, e naga, Naatam̃oli maga waina ku mari punue ra Tabor eu dapale sava? Go ero naga, Dapala nigo, dapala nara; eu mamau puti sikasikai dakiusi nawota natuna maga.

¹⁹Go e naga, Nara eu pei taigu maga, tete natuna maga: Yehovah e mauri, koro pe mauti ra eu pe mauri doko, a pe ta mari punue mu mau.

²⁰Go e noa ki natuna takalapa Yether, e naga, P̃a tuleana, p̃a mari punue ra. Ma natureai wanogoe e da sai lua lova aneana mau: nalakena e mataku, nalakena e ko pei natureai sikai.

²¹Go Seba go Salmuna ero pasa po naga, Nigo p̃a tuleana, po atu gami nalakena dapala waina naatam̃oli e doko nakasuaana aneana e dapala nogoe. Go Cideon e duleana po atugi Seba go Salmuna, po dape atelagi kiki maga waina eu doko nanoa kamel adeada maga.

²²Go naatam̃oli maga ni Israel eu noa ki Cideon, eu naga, P̃a maramara dap̃au gami, nigo go natum̃a go natu ni natum̃a, nalakena ku po mauti gami m̃elu dua ki nam̃elearu ni Midian.

²³Go Cideon e noa ki da, e naga, Kinau aga wo da maramara dap̃au mu mau, go natugu ega wo da maramara dap̃au mu mau: Yehovah ega wo maramara dap̃au mu.

²⁴Go Cideon e noa ki da, e naga, Aga tatagovi mu ki natatagoana sikai, naga kuga tua au asa, sara naatam̃oli euga sikasikai pitua ki vakadaliga ni tea vuti‐lua‐pavakotoana adeada maga. (Nalakena eu sara vakadaliga maga ni kold, nalakena nara eu pei naworawora ni Ishmael.)

²⁵Go eu pasadara, po naga, Auga wo suasua pitua ki da. Go eu p̃elesa ki sugoro kovagoro sikai, po nadi ki paki asa, sara naatam̃oli eu sikasikai nadi ki vakadaliga ni tea vuti‐lua‐pavakotoana adeada maga.

²⁶Go narowogiana ni vakadaliga maga ni kold waina e datago asa e pei shekel ni kold manu sikai go p̃onotia takuna larua; masale ki atelagi kiki maga, go ki tea tausale maga, go ki sugoro maga ni tea miala kesakesa waina eu doko nawota dua ni Midian, go masale ki namori maga waina eu doko nanoa ni kamel adeada maga.

²⁷Go Cideon e mari a e pei efod sikai, po doropusi a e doko natokoana aneana, e doko Ofrah: go Israel mamau puti eu maripele dausi a paki tokora wanogoe: go e pei nasasa sikai paki Cideon, go paki nasum̃a aneana.

²⁸Go Midian e pei tea mariana e pakitano narae ni Israel natuna maga, go eu da moro sike nap̃auda mau. Go navanua e dam̃ate doko natau rualima pati naaleatia maga ki Cideon.

²⁹Go Yerubbaal natu ni Yoash e pano po doko nasum̃a aneana doko.

³⁰Go Cideon e peani natuna naanoai rualima larua waina e pesi ra: nalakena e peani nagoroi laapa.

³¹Go narup̃a aneana waina e doko Shekem, nae ma e maneana dape natuna naanoai sikai, go e salagisana ki Abimelek.

³²Go Cideon natu ni Yoash e mate ragi waina e kapuara p̃ia, go e pei tea ovakiana e one matigo ki tamana Yoash, e one Ofrah ki naworawora ni Abieser.

³³Go e pakilina, ragi waina Cideon e mate, naga Israel natuna maga eu moro liliu, po maripele dausi Baal maga, po mari Baal‐berit e pei sup̃e adeada.

³⁴Go Israel natuna maga eu da midoa ki Yehovah Sup̃e adeada mau, waina e pualua ra m̃elu dua ki nam̃elearu ni tea kokona ki da maga daliviri:

³⁵Go eu da mari nadodomiana paki nasum̃a ni Yerubbaalcideon mau, dapala nawiaana mamau waina e mari a paki Israel.