Read Nguna Togoa Etafe North TEA VASAP̃OTAE MAGA 9 Bible Online

TEA VASAP̃OTAE MAGA 9 - Nguna Togoa Etafe North bible

TEA VASAP̃OTAE MAGA 9

¹Go Abimelek natu ni Yerubbaal e pano paki Shekem punusi p̃ilana gorena maga, po pasa paki da, go paki nawora mamau ni nasum̃a ni p̃ilana tamana, e naga,

²Kuga vasa, a pavara ni mu asa, nadaliga maga ni naatam̃oli mamau puti ni Shekem, po naga, Seve tea e p̃ia ki mu, naga Yerubbaal natuna naanoai mamau puti, naatam̃oli rualima larua, euga maramara dap̃au mu, kite naga naatam̃oli sikai maau ega maramara dap̃au mu? Go kuga midoa ki nia naga kinau a pei navatumu go nap̃okasimu.

³Go p̃ilana gorena maga eu pasa nalo kakana nadaliga maga ni naatam̃oli mamau puti ni Shekem navasaana mamau puti wanogoe: go nap̃op̃oda e kere dausi Abimelek; nalakena eu naga, Nae e pei taigida.

⁴Go eu dua e matele ni silver rualima larua m̃elu nasum̃a ki Baal‐berit, go Abimelek e pasadapui naatam̃oli p̃alo maga go tea mari p̃aragoto maga asa, go eu dausi a.

⁵Go e umai paki nasum̃a ki tamana paki Ofrah, po mari punue taina maga Yerubbaal natuna naanoai maga, naatam̃oli rualima larua elagi ni vatu sikai maau: ma Yotham, Yerubbaal natuna takariki e pei tea toropusiana doko; nalakena e dum̃ana dasuru ki nia.

⁶Go naatam̃oli mamau puti ni Shekem eu dum̃ada saisai ki da, go nasum̃a mamau ni Millo, po pano po mari Abimelek e pei nawota, pisari oak ni tea lawodu waina e doko Shekem.

⁷Go eu noakisai Yotham asa, go e pano po lawodu nap̃au ni tava Cerisim, po sike nadaleona, po pioso, po noa ki da, e naga, Kuga rogo au, naatam̃oli maga ni Shekem, naga Sup̃e ega rogo mu.

⁸Nakau maga eu pano ragi sikai naga euga vuvurai ki nawota sikai ega tap̃au ra: go eu noa ki oliva, eu naga, P̃a maramara dap̃au gami.

⁹Ma oliva e noa ki da, e naga, Aga makoto ki nam̃aladuagu waina eu dodomadagani Sup̃e go naatam̃oli maga asa pae au, po pano naga aga tuletule dap̃au nakau maga, kite?

¹⁰Go nakau maga eu noa ki napuliva, eu naga, Nigo p̃a umai, po maramara dap̃au gami.

¹¹Ma napuliva e noa ki da, e naga, Aga makoto ki nagagadiana aginau go nawagu wia, po pano naga aga tuletule dap̃au nakau maga, kite?

¹²Go nakau maga eu noa ki vaine, eu naga, Nigo p̃a umai, po maramara dap̃au gami.

¹³Go vaine e noa ki da, e naga, Aga makoto ki waine aginau, waina e mari Sup̃e go naatam̃oli maga eu laelaea, po pano naga aga tuletule dap̃au nakau maga, kite?

¹⁴Go nakau mamau puti eu noa ki tea vivitip̃a, eu naga, Nigo p̃a umai, po maramara dap̃au gami.

¹⁵Go tea vivitip̃a e noa ki nakau maga, e naga, Nimu ku pe vuvurai ki nau pae nalomauana naga aga vei nawota dap̃au mu, kuga umai po pavatu doko melu kakagu: go e pe tika, nakapu ega m̃elu tea vivitip̃a, po gani sidar maga ni Lebanon.

¹⁶Go ragi waia, ku pe mari pae nalomauana go pae nawialuaana nalo ni waina ku mari Abimelek e pei nawota, go ku pe mari p̃ia paki Yerubbaal go paki nasum̃a aneana, go ku pe mari paki nia dapala waina e pataka ni namariana ni nam̃elearuna dua;

¹⁷(Nalakena tamagu e manimu marimari, po nadi ki namauriana aneana pa dua ki naraena, po pualua mu m̃elu dua ki nam̃elearu ni Midian:

¹⁸Go nimu ku po duleana dip̃a nasum̃a ni tamagu naaleatia waia, po mari punue natuna naanoai maga, naatam̃oli rualima larua, elagi ni vatu sikai maau, po mari Abimelek, natu ni tea suasua nagoroi aneana, e pei nawota dap̃au naatam̃oli maga ni Shekem, nalakena nae e pei taimu);

¹⁹Go ku pe mari pae nalomauana go pae nawialuaana paki Yerubbaal go paki nasum̃a aneana naaleatia waia, kuga laelaea Abimelek, go nae ma ega laelaea mu;

²⁰Ma e pe tika, nakapu ega m̃elu Abimelek, po gani naatam̃oli maga ni Shekem, go nasum̃a ni Millo; go nakapu ega m̃elu naatam̃oli maga ni Shekem, go ega m̃elu nasum̃a ni Millo; po gani Abimelek.

²¹Go Yotham e sava pano, po sava p̃orawora, po paki Beer pano, po doko tokora wanogoe doko, pa dua ki narae ni taina Abimelek.

²²Go Abimelek e pei tea maraki dap̃au Israel natau dolu.

²³Go Sup̃e e dip̃aki lua naatana sa sikai paki namawota ni Abimelek go ni naatam̃oli maga ni Shekem; go naatam̃oli maga ni Shekem eu mari malauweluki paki Abimelek:

²⁴Naga namaripavakotoana paki Yerubbaal natuna naanoai rualima larua ega umai, go naga nadada ega vei tea toropusiana doko taida Abimelek, waina e mari punue ra, go doko naatam̃oli maga ni Shekem, waina eu mari nam̃elearuna dua ero kasua naga ega mari punue taina maga.

²⁵Go naatam̃oli maga ni Shekem eu lawo ki tea kusugoro maga doko nap̃au ni tava maga, go eu puti lua ki tea mamau puti waina eu pae napua wanogoe liu ra pano: go e pei tea noasaiana paki Abimelek.

²⁶Go Caal natu ni Ebed e umai go taina maga, go eu liu pano paki Shekem: go naatam̃oli maga ni Shekem eu pavatu asa.

²⁷Go eu dave paki namalasi, po lei roara ni vaine adeada maga, po pasi nawa ni vaine maga, po mari nasamasamaniana, po paki ekopu ni nasum̃a ki sup̃e adeada, po ganikani po munu, po pasa sa ki Abimelek.

²⁸Go Caal natu ni Ebed e naga, Abimelek e pei sei, go Shekem e pei sei, naga tuga maneana suasua? E da pei natu ni Yerubbaal, kite? Go Sebul e da pei tea leoparatiki aneana, kite? Kuga magi naatam̃oli maga ki Hamor, Shekem tamana suasua: ma ekasana nigida tuga magi Abimelek suasua?

²⁹Go sei ega wo pitua ki narei waia paki nam̃elearugu? Go aga wo dape lua Abimelek. Go e noa ki Abimelek, e naga, P̃a mari taua ni naatam̃oli navakalo anigo ega warua, go p̃a tave umai.

³⁰Go Sebul tea maraki ni natokoana e dogo navasaana maga ki Caal natu ni Ebed, go namaetoana aneana e pavaga.

³¹Go e dip̃aki lua panako tea tautauana maga pano eu pa punusi Abimelek, po naga, P̃a leo, Caal natu ni Ebed go taina maga eu do umai paki Shekem; go p̃a leo, eu do pasadie natokoana dip̃a ko.

³²Nalakena tea wanogoe p̃a tuleana p̃ogi, nigo go narei waina eu sikoti ko, go p̃a kusugoro doko namalasi:

³³Go ega wo doko, naga malip̃ogi ragi waina elo ega sake, p̃a wo duleana malip̃ogi loaloa, po sava umai dip̃a natokoana: go p̃a leo, nae go narei waina eu sikoti a euga wo dave dip̃a ko, go p̃a wo mari paki nia ega tapala waina nam̃elearum̃a ega wo pap̃ai a.

³⁴Go Abimelek e duleana, go narei mamau waina eu sikoti a p̃ogi, go eu kusugoro dip̃a Shekem eu pei taua pati.

³⁵Go Caal natu ni Ebed e dave, po lawodu namasova ni namata‐pua ni natokoana: go Abimelek e duleana, go narei waina eu sikoti a, m̃elu dua ki tokora ni nakusugoroana.

³⁶Go Caal e punusi narei, go e noa ki Sebul, e naga, P̃a leo, narei eu pae nap̃au ni tava maga siwo umai. Go Sebul e noa ki nia, e naga, Nigo ku punusi melu ni tava maga e dapala naatam̃oli maga.

³⁷Go Caal e moro pasa, po naga, P̃a leo, narei eu siwo umai pae m̃aladigi ki m̃aleoputo ni navanua, go taua sikai eu rumai pae napua ni oak ni Meonenim.

³⁸Go Sebul e noa ki nia, e naga, Nawokam̃a wai ragi waia, waina ku naga, Abimelek e pei sei, naga tuga maneana suasua? Nara waina eu da pei narei waina ku midoa ki p̃alo ki da, kite? P̃a tave pano ragi waia, a pavara ni ko asa, go p̃a mari navakalo paki da.

³⁹Go Caal e dave pano pea ki naatam̃oli maga ni Shekem, po mari navakalo paki Abimelek.

⁴⁰Go Abimelek e kopasi a, go e sava pa dua ki naraena, go tea laapa eu dowo eu mate mau mauri, pa pa paki namasova ni namata‐pua.

⁴¹Go Abimelek e doko Aruma doko: go Sebul e kopasi lua Caal go taina maga, naga euga ta doko Shekem doko mau.

⁴²Go e pakilina matamai ki nia naga narei eu dave paki namalasi; go eu noakisai Abimelek asa.

⁴³Go e piragi narei, po dap̃otae ra eu pei taua dolu, go eu kusugoro doko namalasi; go e leo punusi, go kuga leo, narei eu do dave m̃elu dua ki natokoana; go e duleana dip̃a ra, po atugi ra.

⁴⁴Go Abimelek, go taua maga waina eu sikoti a, eu sava pano, po lawodu namasova ni namata‐pua ni natokoana: go taua dua eu sava dip̃a tea mamau puti waina eu doko namalasi, po atugi ra.

⁴⁵Go Abimelek e mari navakalo paki natokoana naaleatia wanogoe mamau: go e puati natokoana, po mari punue narei waina eu doko asa: go e dakai natokoana, po sapura ki natasimena asa.

⁴⁶Go naatam̃oli mamau puti ni nasum̃a varau pakilagi ni Shekem eu dogo e, go eu paki ekopu ni nasum̃a ni p̃aaka ki El‐berit.

⁴⁷Go e pei tea noasaiana paki Abimelek naga naatam̃oli mamau puti ni nasum̃a varau pakilagi ni Shekem eu dum̃ada saisai ki da.

⁴⁸Go Abimelek e sake paki tava Salmon, nae go narei mamau waina eu sikoti a; go Abimelek e puati tagoto maga eu doko nam̃elearuna, go e daelua ara sikai m̃elu nakau maga, po dape dakati a, po doropusi a e one napauna: go e noa ki narei waina eu sikoti a, e naga, Tea waina ku po punusi au a mari a, kuga mari m̃araverave, po mari ega tapala waina kinau a po mari a.

⁴⁹Go narei mamau ma sara naatam̃oli eu daelua ara sikasikai sarasara ra, po dausi Abimelek, po doropusi a paki nasum̃a ni p̃aaka, po dokoni nasum̃a ni p̃aaka dap̃augoro ra ki nakapu; go naatam̃oli mamau puti ni nasum̃a varau pakilagi ni Shekem ma eu mate eu alagoro pei manu sikai naanoai go nagoroi.

⁵⁰Go Abimelek e pano paki Tebes, po m̃enaki goro Tebes, po puati a.

⁵¹Ma nasum̃a varau pakilagi kasua sikai e doko m̃aleoputo ni natokoana, go naatam̃oli mamau puti naanoai maga go nagoroi maga eu sava paki asa, go naatam̃oli mamau puti ni natokoana, po dum̃ada kokoro ra, po sake paki nap̃au ni nasum̃a varau pakilagi wanogoe.

⁵²Go Abimelek e umai paki nasum̃a varau pakilagi wanogoe, po mari navakalo paki asa, po paki m̃aladigi ki namata ni nasum̃a varau pakilagi naga ega tap̃ara ki nia ki nakapu.

⁵³Go nagoroi sikai e nadi ki vatumaa sakelagi sikai paki nap̃au ni Abimelek, po mari p̃oraworae nagadaina.

⁵⁴Go e pioso m̃araverave paki natureai waina e do dape nalikau aneana maga, po noa ki nia, e naga, P̃a sai lua lova anigo, po mari au aga mate, naga euga ta noa nalo kakagu, Nagoroi sikai e mari punue a. Go natureai aneana e puri sasama asa, go e mate.

⁵⁵Go naatam̃oli maga ni Israel eu punusi naga Abimelek e mate, go eu pano sara naatam̃oli eu sikasikai paki tokora adeada maga.

⁵⁶Go Sup̃e e mari nasigisigileoana ki Abimelek e liliu, waina e mari a paki tamana, nalo ni waina e mari punue taina rualima larua:

⁵⁷Go nasigisigileoana mamau ki naatam̃oli maga ni Shekem, Sup̃e e mari a e liliu paki nap̃auda: go navasasakiana ki Yotham natu ni Yerubbaal e umai paki da.