Read Nguna Togoa Etafe North 3 KI YOANE 1 Bible Online

3 KI YOANE 1 - Nguna Togoa Etafe North bible

3 KI YOANE 1

¹Tea matua e midiri dua Caio tea dodomiana, waina a dodomi ko doko nalomauana.

²Tea dodomiana, a dapasavasa naga nalo ni naleo maga mamau puti p̃a to disu p̃ia, go naga p̃a to p̃ia doko, dapala waina naatam̃a e do disu p̃ia.

³Nalakena a laelaea p̃arua ragi waina taigida seara eu rumai po noa sokisoki nalomauana anigo, dapala waina ku do surata nalomauana.

⁴Nalaelaeaana warua liu tea wanogoe a da peani a mau, naga aga rogo naga natugu maga eu do surata nalomauana.

⁵Tea dodomiana, ku do mari nawosiana lomau, tea waina ku mari a paki tea maga waina eu pei taigida go nam̃enaki maga;

⁶waina eu noa sokisoki nadodomiana anigo narae ni ekalesia: waina ku pe vusivusi ra naga euga vano ega tapala waina e pataka ni Sup̃e p̃a wo mari p̃ia:

⁷nalakena eu pano nalakena Nagisana, eu da dape te navatuna ki tea ni nalauna p̃ota maga mau.

⁸Nalakena tea wanogoe e one gida one naga tuga silae tea tapala nogoe maga, naga tuga magi nalomauana pei tea wosiwosi sikoti ra.

⁹A midiri te navatuna dua ekalesia: ma Diotrefe, waina e masauna naga ega vei tea vea kakada, e da piragi soki gami mau.

¹⁰Nalakena tea wanogoe, a pe valoti a pe wo mari nawosiana aneana maga waina e mari ra euga vei tea midoakiana, e do pasa pinoa ki gami ki navasaana sa maga: go e da maro tea wanogoe mau, go e da dum̃ana piragi soki taigida maga mau, go tea maga waina eu masauna naga euga viragi soki ra e dip̃agoro ra asa, go e nadi ki da paki etaku ni ekalesia.

¹¹Tea dodomiana, p̃a ta mari oli tea waina e sa mau, ma p̃a mari oli tea waina e p̃ia: naata waina e do mari tea wia e m̃elu Sup̃e: naata waina e do mari tea sa e ko da punusi Sup̃e mau.

¹²E magi Demetrio pei tea noasokisokiana pae tea maga mamau puti, go pae nalomauana: go kinami ma au do maneana noa sokisoki; go ku atae naga nanoasokisokiana aginami e pei lomau.

¹³A peani naleo laapa waina aga midiri dua ko ara, ma a da masauna naga aga midiri dua ko pae noai loa go pen mau.

¹⁴Ma a leogoro naga aga vunusi ko, go toroga wo pasa nawoka paki nawoka.

¹⁵Natam̃ateana ega vei anigo. Tagida maga ri eu pasa dodomi ko. P̃a vasa dodomi tagida maga ri pae nagisada sikasikai.