Read Nguna Togoa Etafe North KI YUDA 1 Bible Online

KI YUDA 1 - Nguna Togoa Etafe North bible

KI YUDA 1

¹Yuda, tea suasua sikai ki Yesu Kristo, go tai ni Yakobo, a midiri dua tea maga waina ku pei tea sosoana, tea dodomiana maga doko Sup̃e Tamana, po magi Yesu Kristo pei tea vavaigoroana:

²nasaup̃iaana go natam̃ateana go nadodomiana euga manimu pei tea mariana euga laapa.

³Tea dodomiana maga, ragi waina a do mari sara nam̃arekarekaana naga aga midiri dua mu nalo ni namautipauriana waina e p̃olosi gida, a peani nasokiana naga aga midiri dua mu po pasa paratiki mu naga kuga to magi nasaralomauana waina e paka sikai pei tea vituakiana paki tea tautau maga mari pilele kasua.

⁴Nalakena te naatam̃oli seara eu sili panako umai, waina eu pei tea vea midiriana pae tuai raki natip̃akotoviana waia, naatam̃oli maga waina eu da matau ki Sup̃e mau, waina eu do mari nasaup̃iaana ki Sup̃e anigida e panop̃ota po pei namasausauana, po do pasagoro Talakeagida sikai maau go Nawota anigida Yesu Kristo.

⁵Ma a masauna naga aga mari mu kuga midoaki, waina ku paka sikai atae naleo maga mamau puti, naga Nawota, waina e mautipauri sua narei sikai m̃elu dua ki navanua ni Ityipt, sala kerua e mari puoli ki tea maga waina eu da saralomau mau.

⁶Go agelo maga, tea maga waina eu da pavaigoro naveiteaveaana adeada mau, ma eu doropusi natokoana adeada, e pavaigoro ra doko natali solisoli maga waina eu du mau du etano ki namaligo raki navasap̃otaeana ni naaleatia warua.

⁷Dapala Sodom go Comorrah, go natokoana maga dalivirigoro ra, waina eu do maripele dakiusi waina nara eu maripele, po dausi nap̃okasi p̃ota pano, eu pei tea toropusiana eu one kivea, eu pei naviseikiana sikai, eu do sua nasikoana ni nakapu waina e du mau du.

⁸Dapala nogoe nara ma waina eu do p̃erea eu mari nap̃okasida e loa, po midoaki p̃alo ki naveinawotaana, po pasa sa ki nasamasamaana maga.

⁹Ma Mikael agelo warua liu, ragi waina e pululu ki diabolo po pasapululu nalo ni nap̃atoko ni Moses, e da piviari naga ega viragi dip̃a e navasap̃otaeana sikai ni navasasakiana mau, ma e naga, Yehovah ega vasa kasua ki‐go.

¹⁰Ma nara eu pasa sa ki naleo maga waina eu da atae ra mau: go naleo maga waina eu midoaki atae ra pae navakilinaana, dapala nalo mauri maga waina eu dika namidodoana, eu pei tea marisakiana doko naleo maga wanogoe.

¹¹Ai ki da! Nalakena eu pae napua ki Kain pano, po sava pae nasasap̃oana ki Balaam raki namoriana, po matepuoli doko navasadugoroana ki Korah.

¹²Nara eu pei m̃alo maga waina eu doko nasaisaiana ni nadodomiana animu maga ragi waina eu ganikani sikoti mu, tea leoparati ki shiip waina eu dum̃ada pagani ra po da mataku mau; napopouru maga waina noai e dika ara, waina eu pei tea tapetapeana pano pae nalagi maga; nakau maga ni ragi ni p̃aunarago waina te nawada e da doko ara mau waina eu paka rua kokolo, waina eu pei tea vakudakatiana;

¹³napeao mila maga ni natasi, waina eu do lotalota ki namaliereana adeada maga, m̃asoe vasara maga, waina naloaana ni namaligo e madeada pei tea vavaigoroana pa pa ega tu mau du.

¹⁴Go Enok, tea kelarua pae Adam, e pea noa sai nalo ni tea maga wanogoe, e naga, Kuga leo, Nawota ega wo umai m̃aleoputo ni tivilia maga ni tea tautau aneana maga,

¹⁵naga ega mari navasap̃otaeana nalo ni tea maga mamau puti, go naga ega vasa kasua ki tea maga mamau puti waina eu da matauki Sup̃e mau nalo ni nawosiana adeada maga mamau puti ni nasigisigileoana waina eu sigisigileo mari ra, go nalo ni naleo kasua maga mamau puti waina tea mari naleo sa sigisigileo maga eu pasa dip̃a e ara.

¹⁶Nara eu pei tea tauruuru maga, tea dodosaki maga, tea surata pae namasauana sa adeada maga (go nawokada e do pasa tea vuka warua maga), eu do midoaki m̃ata ki narae ni naatam̃oli maga nalakena nasilaeana.

¹⁷Ma nimu, tea dodomiana maga, kuga midoaki navasaana maga waina eu pea pei tea noaana pae apostolo maga ki Nawota anigida Yesu Kristo;

¹⁸naga eu noa ki mu, naga, Ragi edaku tea mari saudoa maga euga wo doko, waina euga wo surata pae namasauana sa adeada maga ni nasigisigileoana maga.

¹⁹Nara eu pei tea maga waina eu mari natap̃otaeana maga, eu pei tea ni namero, eu da peani Naatana mau.

²⁰Ma nimu, tea dodomiana maga, waina ku do dum̃amu davagi mu doko nasaralomauana tautau p̃arua liu animu, doko do dapasavasa doko Naatana Tapu,

²¹kuga tam̃amu pavaigoro mu kuga toko nadodomiana ki Sup̃e, doko do leogoro nadodomiana ki Nawota anigida Yesu Kristo paki namauriana waina e du mau du.

²²Go kuga dodomi te seara waina eu midoakisara;

²³go kuga mautipauri te seara, doko do pua lua ra m̃elu dua ki nakapu; go kuga dodomi te seara pilake namatakuana; doko do pilosi sugoro waina e pei tea mariana e loa m̃elu nap̃okasi.

²⁴Ma agi tea waina e mari atae pavaigoro mu naga kuga ta dapilagona mau, po mari mu kuga lawodu narae ni nasamasamaana aneana kuga vei tea mamaau doko nalaelaeaana warua liu,

²⁵agi Sup̃e sikai maau Tea Maumaupauri anigida, pae Yesu Kristo Nawota anigida, ega vei nasamasamaana, natatap̃auana, namarakiana, go nakasuaana ega vea ki ragi varau mamau, go ragi waia, go pa pa paki ragi varau maga mamau puti. Amen.