Read Nguna Togoa Etafe North APOKALUPESI 1 Bible Online

APOKALUPESI 1 - Nguna Togoa Etafe North bible

APOKALUPESI 1

¹Apokalupesi ki Yesu Kristo waina Sup̃e e dua e asa, naga ega viseiki tea suasua aneana maga, tea maga waina e one ara one naga euga vakilina m̃araverave: go e dip̃aki lua po paivai ki da pae agelo aneana paki tea suasua aneana Yoane;

²waina e noa sokisoki navasaana ki Sup̃e, go nanoasokisokiana ni Yesu Kristo, tea maga waina e punusi ra.

³Naata waina e do peve, go tea maga waina eu do dogo navasaana maga ni naveanoasaiana waia, po do pavaigoro tea maga waina eu pei tea midiriana asa eu maropa: nalakena ragi e pei m̃aladigi.

⁴Yoane e midiri dua ekalesia larua waina eu doko Asia: Nasaup̃iaana ega vei animu, m̃elu tea waina e doko ragi waia, go waina e doko tuai, go waina ega wo umai; go m̃elu Naatana larua waina eu doko narae ni malo tasake aneana;

⁵go m̃elu Yesu Kristo, waina e pei tea noa sokisoki lomau, takalapa ni tea mate maga, go tea maraki nawota maga ni maramana. Agi tea waina e dodomi gida, po peresi lua gida m̃elu dua ki namarinaleosaana anigida maga doko nadana;

⁶go e mari gida tu pei namarakiana sikai, tea viri maga ki Sup̃e aneana go Tamana; nasamasamaana go namarakiana eroga vei aneana pa pa ega tu du po du mau du. Amen.

⁷Kuga leo, e do umai pilake napopouru maga; go sara namata euga wo punusi a, go tea maga waina eu puri a; go naworawora maga mamau puti ni maramana euga wo lalagaarova asa. Ioro, Amen.

⁸Kinau a pei Alfa go Omeca, Yehovah Sup̃e e noa e, tea waina e doko ragi waia go waina e doko tuai go waina ega wo umai, Tea Kasua mau.

⁹Kinau Yoane, taimu go tea saisaipeani sikoti mu doko nariesokiana go namarakiana go nasokiana waina eu doko Yesu, a doko naure waina e pei tea sosoana ki Patmos nalakena navasaana ki Sup̃e go nanoasokisokiana ni Yesu.

¹⁰A doko Naatana naaleatia ki Nawota, go a dogo nadaleo warua sikai natakugu, dapala tea ni paiga sikai e naga,

¹¹Tea waina ku punusi a, p̃a midiri a tusi sikai, po dip̃aki lua e paki ekalesia larua; paki Efeso, go paki Semurna, go paki Percamo, go paki Tuateira, go paki Sardeis, go paki Filadelfia, go paki Laodikeia.

¹²Go a dum̃agu doa au naga aga vunusi nadaleo waina e pasa ki nau. Go ragi waina a dum̃agu doa sua au a punusi nakau ni nasulu ni kold larua;

¹³go m̃aleoputo ni nakau ni nasulu maga tea takiusi naatam̃oli Natuna, e pei tea sugoroana ki sugoro sikai waina e pakitano dip̃a nam̃elena, go e pei tea tasokiana namalona ki tasoki sikai ni kold.

¹⁴Go nap̃auna go naloluna ero dare dapala nam̃au ni shiip tare, dapala sno; go namatana ero dapala soro ni nakapu;

¹⁵go nam̃elena ero dakiusi brass waina e lidalida, dapala e pe vei tea veniana upu ni nakapu;

¹⁶go nadaleona e dapala nadaleo ni noai laapa. Go e dape doko nam̃elearuna ni matua m̃asoe larua: go lova makali sikai ni navakalina dua e do m̃elu nawokana pano: go naraena e dapala elo e dara kasua.

¹⁷Go ragi waina a punusi a, a dowo pisari nam̃elena dapala tea mate sikai. Go e doropusi nam̃elearuna ni matua doko au, po naga, P̃a ta mataku mau;

¹⁸kinau a pei tea vea go tea edaku, go tea Mauri; go a mate, go p̃a leo, a mauri doko pa pa ega tu po du mau du, go a peani tea viloki maga ni namateana go ni Hades.

¹⁹Nalakena tea wanogoe p̃a midiri tea maga waina ku punusi sua ra, go tea maga waina eu doko ragi waia, go tea maga waina euga wo pakilina edaku ki tea maga wanogoe;

²⁰p̃aia ni m̃asoe larua waina ku punusi ra doko nam̃elearugu ni matua, go nakau ni nasulu ni kold larua. M̃asoe larua eu pei agelo maga ki ekalesia larua: go nakau nasulu larua eu pei ekalesia larua.