Read Nguna Togoa Etafe North APOKALUPESI 14 Bible Online

APOKALUPESI 14 - Nguna Togoa Etafe North bible

APOKALUPESI 14

¹Go a punusi, go kuga leo, Arnio e lawodu tava Sion, go manu p̃onotia sikai go manu rualima pati go manu pati eu lawodu sikoti a, eu pilake nagisana, go nagisa ni Tamana, ero pei tea midiriana doko naraeda.

²Go a dogo nadaleo sikai waina e m̃elu nakoroatelagi umai, e dapala nadaleo ni noai laapa, go e dapala tovae warua sikai: go nadaleo waina a dogoe edapala nadaleo ni aurea maga ni harp waina eu do p̃okati nalegaana ni harp ki harp adeada maga:

³go eu do lega tea waina e dapala nalegaana vau sikai narae ni malo tasake, go narae ni nalo mauri pati go ni tea matua maga: go te naata sikai e da mari atae ataedogo nalegaana wanogoe mau, ma manu p̃onotia sikai go manu rualima pati go manu pati eu sikida mari atae, tea maga waina eu pei tea vakotoviana m̃elu dua ki maramana.

⁴Nara eu pei tea maga waina eu da pei tea mariana, eu loa sikoti nagoroi maga mau, nalakena eu pei naputu maga. Nara eu pei tea maga waina eu do dausi Arnio sara tokora waina e paki asa. Nara eu pei tea vakotoviana m̃elu dua ki naatam̃oli maga, naga euga magi Sup̃e go magi Arnio pei takavea sikai.

⁵Go nasorosoroana e da pei tea vap̃aiana doko nawokada mau: eu pei tea mamaau.

⁶Go a punusi agelo p̃ota sikai, e diri m̃aleoputo ni nakoroatelagi, e peani narogorogoana wia waina e du mau du naga ega rogorogo ki nia paki tea maga waina eu doko maramana, go paki sara nalauna go sara naworawora go sara namena go sara narei;

⁷go e noa ki nadaleo warua sikai, e naga, Kuga matauki Sup̃e, po dua e nasamasamaana; nalakena aura ni navasap̃otaeana aneana e po umai: go kuga lotu ki tea waina e mari nakoroatelagi go maramana go natasi go namata ni noai maga.

⁸Go tea p̃ota sika, agelo kerua sikai, e dausi a, e naga, E dowo, e dowo, Babelon warua, waina e mari nalauna maga mamau puti eu munu waine seara ni namaritausuana ni namaripeleana aneana.

⁹Go agelo p̃ota sikai, ketolu sikai, e dausi ra, e noa ki nadaleo warua sikai, e naga, Te naata sikai e pe lotu ki nalo mila go nasup̃e kakana, po dape wotu sikai doko naraena kite doko nam̃elearuna,

¹⁰nae ma ega wo munu waine seara ni namaritausuana ki Sup̃e, waina e pei tea marim̃atakiana po da pei tea marisarisariana mau doko lasa munu ni namaetoana aneana; go ega wo pei tea mariana ega wo pitinu ki nakapu go sulfur namata ni agelo tautau maga, go namata ni Arnio:

¹¹go naasua ni navitinuana adeada e do sake pa pa e du du po du mau du; go eu dika namaromaroana aleati go p̃ogi, tea maga waina eu lotu ki nalo mila go nasup̃e kakana, go te naata waina e dape wotu ni nagisana.

¹²Nasokiana ni tea tautau maga e doko nea, tea maga waina eu do pavaigoro natip̃akiana maga ki Sup̃e, go nasaralomauana ni Yesu.

¹³Go a dogo nadaleo sikai waina e m̃elu nakoroatelagi umai, e naga, P̃a midiri, Tea mate maga waina eu mate doko Nawota eu maropa pae ragi waia pa pa: ioro, Naatana e noa e, naga euga maromaro m̃elu dua ki nawosimawosaana adeada maga; nalakena nawosiana adeada maga eu do dausi ra.

¹⁴Go a punusi, go kuga leo, napopouru tare sikai; go tea waina e sakesaake napopouru e dakiusi naatam̃oli Natuna, waina e peani vauvau ni kold sikia e doko nap̃auna, go tea tagaukotovi makali sikai e doko nam̃elearuna.

¹⁵Go agelo p̃ota sikai e dave m̃elu nasum̃a tapu umai, doko pioso ki nadaleo warua sikai paki tea waina e sakesaake napopouru, e naga, P̃a sai ki tea tagaukotovi anigo, po dagaukotovi: nalakena aura waina p̃a tagaukotovi asa e po umai; nalakena tea lolovaeana ni maramana e kokolo.

¹⁶Go tea waina e sakesaake napopouru e naki ki tea tagaukotovi aneana paki maramana; go maramana e pei tea tagaukotoviana.

¹⁷Go agelo p̃ota sikai e dave umai m̃elu nasum̃a tapu waina e doko nakoroatelagi, nae ma e pua tea tagaukotovi makali sikai.

¹⁸Go agelo p̃ota sikai e dave m̃elu wede ni naviriana umai, waina e peani nakasuaana dap̃au nakapu; go e pioso ki nadaleo warua sikai paki tea waina e pua tea tagaukotovi makali, e naga, P̃a sai ki tea tagaukotovi makali anigo, po lei m̃okai maga ni vaine ni maramana; nalakena nawana maga eu mami.

¹⁹Go agelo e nadi ki tea tagaukotovi aneana paki maramana, po lei vaine ni maramana, po nadi ki nia paki m̃oru ni navasokiana ni nawa ni vaine, m̃oru ni navasokiana warua, ni namaritausuana ki Sup̃e.

²⁰Go m̃oru ni navasokiana ni nawa ni vaine e pei tea vasiana etaku ni natokoana, go nada e dave m̃elu dua ki m̃oru ni navasokiana ni nawa ni vaine, pa pa paki tea katiana maga ni horse maga, pae maile p̃onotia dua.