Read Nguna Togoa Etafe North APOKALUPESI 16 Bible Online

APOKALUPESI 16 - Nguna Togoa Etafe North bible

APOKALUPESI 16

¹Go a dogo nadaleo warua sikai waina e dave m̃elu nasum̃a tapu, e noa ki agelo larua, e naga, Kuga vano, po daki lasa larua ni namaritausuana ki Sup̃e paki maramana.

²Go tea vea e pano, po daki lasa aneana paki navanua; go e pei namanuka pitinu sa paki naatam̃oli maga waina eu pilake wotu ni nalo mila, go waina eu do lotu ki nasup̃e kakana.

³Go kerua e daki lasa aneana paki natasi; go e pei nada dapala nada ni naatam̃oli mate sikai; go sara nalo mauri eu mate, go tea maga waina eu doko natasi.

⁴Go ketolu e daki lasa aneana paki noai sara maga go namata noai ni noai maga, go e pei nada.

⁵Go a dogo agelo ni noai maga e naga, Ku leana, waina ku doko ragi waia go waina ku doko tuai, Tea Tapu, nalakena ku pasa p̃otae dapala nogoe:

⁶nalakena eu daki nada ni tea tautau maga go ni profeta maga, go ku dua ra nada naga euga munugi a: eu p̃ia ki nia.

⁷Go a dogo wede ni naviriana e naga, Ioro, Yehovah Sup̃e O, Tea Kasua mau, navasap̃otaeana anigo maga eu pei lomau go eu leana.

⁸Go kevati e daki lasa aneana paki elo; go e pei tea vituakiana paki nia naga ega tap̃araki naatam̃oli maga ki nakapu.

⁹Go naatam̃oli maga eu pei tea tap̃arakiana ki navivitinuana warua: go eu pasa sa ki nagisa ni Sup̃e waina e peani nakasuaana dap̃au nawokatiana maga wanogoe; go eu da midoaki doa mau naga euga tua e nasamasamaana.

¹⁰Go kelima e daki lasa aneana paki malo tasake ki nalo mila; go namarakiana aneana e pei tea mariana e maligo; go eu kati namenada nalakena navitinuana,

¹¹go eu pasa sa ki Sup̃e ni nakoroatelagi nalakena navitinuana adeada maga go nalakena namanuka adeada maga; go eu da midoaki doa m̃elu dua ki nawosiana adeada maga mau.

¹²Go kelatesa e daki lasa aneana paki noai sara warua, Eufrates; go noai kakana e dap̃a, naga napua ki nawota maga waina eu pae elo sake umai ega vei tea marim̃atakiana.

¹³Go a punusi naatana dolu waina eu da dautau mau, eu dave m̃elu nawoka ni drakon, go m̃elu nawoka ni nalo mila, go m̃elu nawoka ni profeta sorosoro, eu dapala frok maga:

¹⁴nalakena eu pei naatana maga ni dimon maga, eu do mari navaivaiana maga; waina eu do dave pano punusi nawota maga ni maramana mamau, naga euga saisai ki da paki navakalo ni naaleatia warua ki Sup̃e, Tea Kasua mau.

¹⁵(Kuga leo, aga valoti dapala tea vanako sikai. Tea waina e do leleogoro, po do pavaigoro sugoro aneana maga e maropa, naga ega ta m̃alam̃ala surata mau, go naga euga ta punusi tea ni namaliereana aneana mau.)

¹⁶Go eu saisai ki da paki tokora waina e pei tea sosoana pae Heberu ki Harmacedon.

¹⁷Go kelarua e daki lasa aneana paki namalopa; go nadaleo warua sikai e dave m̃elu nasum̃a tapu pae malo tasake umai, e naga, E pei tea marisuaana:

¹⁸go navila maga, go nadaleo maga, go tovae maga eu pakilina; go naruru warua sikai e pakilina, dapala waina tea takiusi a e da pakilina mau pae ragi waina naatam̃oli maga eu doko maramana pa pa, naruru sikai waina e p̃arua go waina e kasua dapala nogoe.

¹⁹Go natokoana warua e pei tea mariana e pei matele dolu, go natokoana maga ni nalauna maga eu dowo: go Babelon warua e pei tea midoakiana namata ni Sup̃e, naga ega tua e lasa munu ni waine ni namaritausuana ni namaetoana aneana.

²⁰Go sara naure eu sava pano, go tava maga eu da pei tea vap̃aiana mau.

²¹Go usa ni vatu warua, dapala talenta sikai, e siwo pae nakoroatelagi umai paki naatam̃oli maga: go naatam̃oli maga eu pasa sa ki Sup̃e nalakena nawokatiana ni usa ni vatu; nalakena nawokatiana kakana e p̃arua pa p̃arua liu.