Read Nguna Togoa Etafe North APOKALUPESI 17 Bible Online

APOKALUPESI 17 - Nguna Togoa Etafe North bible

APOKALUPESI 17

¹Go sikai ni agelo larua waina eu dape lasa larua e umai, po pasa ki nau, e naga, P̃a umai, aga wo pisei ki‐go navasap̃otaeana ni nagoroi masausara warua waina e sakesaake doko noai laapa;

²waina nawota maga ni maramana eu maripele asa, go tea maga waina eu doko maramana doko eu pei tea mariana eu matamaloku ki waine ni namaripeleana aneana.

³Go e dape lua au doko Naatana paki masop̃alo: go a punusi nagoroi sikai e sakesaake nalo mila miala kalakala sikai, waina e pura ki nagisa maga ni navasasakiana po pilake nap̃auna larua go napati ni nap̃auna rualima sikai.

⁴Go nagoroi wanogoe e pei tea sugoroana ki tea miala kesakesa go ki tea miala kalakala, po pei tea rekeikiana ki kold go ki vatu wia go ki napati maga ni vilavila, e dape doko nam̃elearuna lasa munu sikai ni kold, waina e pura ki tea mamaragokiana maga, go ki naleo maga waina eu da dautau mau ni namaripeleana aneana,

⁵go nagisa sikai e pei tea midiriana doko naraena, P̃AIA, BABELON WARUA, P̃ILA NI NAGOROI MASAUSARA MAGA GO NI TEA MAMARAGOKIANA MAGA NI MARAMANA.

⁶Go a punusi nagoroi wanogoe e matamaloku ki nada ni tea tautau maga, go ki nada ni tea noa sokisoki maga ki Yesu. Go ragi waina a punusi a, a maga ki namagaana warua.

⁷Go agelo e noa ki nau, e naga, Ekasana ku maga? Kinau aga wo noa ki‐go p̃aia ni nagoroi, go ni nalo mila waina e do ova e, waina e pilake nap̃auna larua go napati ni nap̃auna rualima sikai.

⁸Nalo mila waina ku punusi a e doko tuai, go e da doko ragi waia mau; go ega wo sake m̃elu dua ki epua, go ega wo paki namatepuoliana pano. Go tea maga waina eu doko maramana euga wo maga, tea maga waina nagisada e da pei tea midiriana doko tusi ni namauriana mau pae nanadikilaketanoana ni maramana pa pa, ragi waina euga vunusi nalo mila, naga e doko tuai, go naga e da doko ragi waia mau, go naga ega wo umai.

⁹Namidodoana waina e pilake namanumatuaana e doko nea. Nap̃auna larua eu pei tava larua, waina nagoroi e sakesaake ara:

¹⁰go eu pei nawota larua; e lima eu dowo sua, sikai e doko ragi waia, tea p̃ota e ko da umai mau; go ragi waina ega wo umai, e one asa one naga ega toko ragi kiki.

¹¹Go nalo mila waina e doko tuai, go e da doko ragi waia mau, nae e pei kelatolu, go e pei tea ni tea larua; go ega wo paki namatepuoliana pano.

¹²Go napati rualima ni nap̃auna waina ku punusi ra eu pei nawota rualima sikai, waina eu ko da dape namarakiana mau: ma euga wo dape naveinawotaana dapala nawota maga, aura sikai, sikoti nalo mila.

¹³Nara eu peani namidoakip̃otaeana sikai maau, go eu do pitua ki nakasuana go naveinawotaana adeada paki nalo mila.

¹⁴Nara euga wo mari navakalo paki Arnio, go Arnio ega wo mari matua ki da, nalakena e pei Nawota ki nawota maga, go Tea Maramara ki tea maramara maga; go tea maga waina eu sikoti a, tea sosoana maga go tea matadoaana maga go tea saralomau maga, nara ma euga wo mari matua.

¹⁵Go e noa ki nau, e naga, Noai maga waina ku punusi ra, waina nagoroi masausara e do sakesaake ara, eu pei narei maga, go taua maga, go nalauna maga, go namena maga.

¹⁶Go napati rualima sikai ni nap̃auna waina ku punusi ra, go nalo mila, nara euga wo pilosi nagoroi masausara, go euga wo mari a ega vei maso maladi, go m̃alam̃ala, go euga wo gani nap̃okasina, go euga wo dap̃araki puti a ki nakapu.

¹⁷Nalakena Sup̃e e pitua ki nia paki nap̃op̃oda naga euga mari namidoakip̃otaeana aneana, go naga euga mari namidoakip̃otaeana sikai maau, go naga euga vitua ki namarakiana adeada paki nalo mila, pa pa navasaana maga ki Sup̃e euga vei tea marisuaana.

¹⁸Go nagoroi waina ku punusi a e pei natokoana warua, waina e peani namarakiana dap̃au nawota maga ni maramana.