Read Nguna Togoa Etafe North APOKALUPESI 18 Bible Online

APOKALUPESI 18 - Nguna Togoa Etafe North bible

APOKALUPESI 18

¹Edaku ki tea maga wanogoe a punusi agelo p̃ota sikai e siwo pae nakoroatelagi umai, e peani naveinawotaana warua; go maramana e pei tea maramalagatiana ki nasamasamaana aneana.

²Go e pioso ki nadaleo kasua sikai, e naga, E dowo, e dowo Babelon warua, go e po pei natokoana sikai ki dimon maga, go tokora ni navavaigoroana sikai ni sara naatana waina eu da dautau mau, go tokora ni navavaigoroana sikai ni sara manu waina eu da dautau mau go waina eu pei tea vilosiana.

³Nalakena nalauna maga mamau puti eu dowo nalakena waine ni namaritausuana ni namaripeleana aneana; go nawota maga ni maramana eu maripele asa, go tea sorisori maga ni maramana eu pei sogolapa m̃elu nawaruaana ni namarilagilagiana aneana.

⁴Go a dogo nadaleo p̃ota sikai waina e m̃elu nakoroatelagi umai, e naga, Kuga tave, narei aginau, m̃elu dua ki nia umai, naga kuga ta mamau saisaipeani namarinaleosaana aneana maga mau, go naga kuga ta dape nawokati‐a‐ana maga seara kakada mau:

⁵nalakena namarinaleosaana aneana maga eu pei tea tauakiana pa pa paki nakoroatelagi, go Sup̃e e midoaki namarinaleotageleana aneana maga.

⁶Kuga lagati dua e ega tapala waina nae e pitua, go kuga maneana mari a ega warua paka rua ega vae nawosiana aneana maga: lasa munu waina e mari a e sarisari, kuga maneana mari a ega sarisari paka rua.

⁷Dapala waina e dum̃ana samasamani a, po mari lagilagi, kuga tua e navitinuana go nasusueana ega warua ega tapala nogoe: nalakena e noa nap̃op̃ona, e naga, A dasake pei nawota nagoroi, go a da pei malepu mau, go aga wo da punusi nasusueana mau.

⁸Nalakena tea wanogoe nawokati‐a‐ana maga euga wo umai naaleatia sikai maau, namateana, go nasusueana, go navitoloana; go ega wo pei tea tap̃arakiana ki nakapu; nalakena Yehovah Sup̃e waina e pasa p̃otae a e kasua.

⁹Go nawota maga ni maramana, waina eu maripele asa po do mari lagilagi sikoti a, euga wo dagisi a po lalagaarova asa, ragi waina euga vunusi naasua ni natap̃araki‐nia‐ana,

¹⁰euga wo lawodu uvea nalakena namatakuana ni navitinuana aneana, po naga, Ai, ai, natokoana warua, Babelon, natokoana kasua! Nalakena aura sikai maau navasapotae‐ko‐ana e umai asa.

¹¹Go tea sorisori maga ni maramana eu do dagisi a po do susue asa, nalakena te naata sikai e da moro pakotovi naleo musagiana adeada mau;

¹²naleo musagiana ni kold, go ni silver, go ni vatu wia, go ni napati maga ni vilavila, go ni linen wia, go ni tea miala kesakesa, go ni silk, go ni tea miala kalakala; go sara nakau ni nap̃o wia, go sara lasa ni napati ni elefant, go sara lasa ni nakau wia p̃arua liu, go ni brass, go ni airon, go ni vatu tau;

¹³go sinamon go amomon, go tea ni nap̃o wia, go naroro lolo, go libano, go waine, go naroro, go flaur wia, go whiit, go katel, go shiip; go ni horse maga go ni kariot maga, go ni naviti maga; go naata ni naatam̃oli maga.

¹⁴Go nawa nakau maga waina naatam̃a e masau p̃arua ki da eu m̃elu dua ki‐go pano, go naleo maga mamau puti waina eu lidalida go waina eu maramalaga eu puoli ki‐go, go euga wo da moro pap̃ai ra mau.

¹⁵Tea sorisori maga ni naleo wanogoe maga, waina eu pei sogolapa nalakena nae, euga wo lawodu uvea nalakena namatakuana ni navitinuana aneana, doko do dagi po do susue;

¹⁶doko do naga, Ai, ai, natokoana warua, waina e pei tea sugoroana ki linen wia go ki tea miala kesakesa go ki tea miala kalakala, po pei tea rekeikiana ki kold go ki vatu wia go ki napati ni vilavila!

¹⁷Nalakena aura sikai maau nasogolapaana warua dapala nogoe e pei tea mariana e pei maso maladi asa. Go sara nawota ni shipe, go sara naata waina eu porau paki te tokora, go naatam̃oli maga ni shipe, go tea maga waina eu p̃osiwosi natasi,

¹⁸eu lawodu uvea, po pioso ragi waina eu punusi naasua ni natap̃araki‐nia‐ana, eu naga, Seve natokoana e dakiusi natokoana warua waia?

¹⁹Go eu nadi ki natano paki nap̃auda, po pioso, eu dagi po susue, eu naga, Ai, ai, natokoana warua, waina tea maga mamau puti waina eu peani shipe maga doko natasi eu pei sogolapa asa nalakena naleo maga kakana ni navakokotoana warua! Nalakena aura sikai maau e pei tea mariana e pei maso maladi asa.

²⁰Kuga laelaea nalo kakana, nakoroatelagi, go tea tautau maga, go apostolo maga, go profeta maga; nalakena Sup̃e e pasa p̃otae navasap̃otaeana animu paki nia.

²¹Go agelo kasua sikai e dape dakati vatu sikai e dapala vatumaa warua sikai, po nadi ki nia paki natasi, po naga, Dapalana ki narowoana kasua, Babelon, natokoana warua, ega wo pei tea nadikiana pakitano, go ega wo da moro pei tea vap̃aiana mau.

²²Go nadaleo ni aurea maga ni harp go ni tea maga waina eu lega go ni tea maga waina eu sui lokore go ni tea maga waina eu sui paiga ega wo da moro pei tea rogoana ako mau; go te tea vei mataisau ni te namataisauana sikai ega wo da moro pei tea vap̃aiana ako mau; go nadaleo ni vatumaa sikai ega wo da moro pei tea rogoana ako mau.

²³Go namarama ni nasulu sikai ega wo da moro maramalaga ako mau; go nadaleo ni tea vitawiri go ni tea laki ega wo da moro pei tea rogoana ako mau: nalakena tea sorisori anigo maga eu pei naatam̃oli warua maga ni maramana; nalakena nalauna maga mamau puti eu pei tea viragisasap̃okiana ki nawosidoaana anigo.

²⁴Go nada ni profeta maga go ni tea tautau maga, go ni tea maga mamau puti waina eu pei tea maripunueana maramana, e pei tea vap̃aiana asa.