Read Nguna Togoa Etafe North APOKALUPESI 2 Bible Online

APOKALUPESI 2 - Nguna Togoa Etafe North bible

APOKALUPESI 2

¹P̃a midiri dua agelo ki ekalesia ni Efeso. Tea waina e dape soki m̃asoe larua eu doko nam̃elearuna ni matua, tea waina e surata m̃aleoputo ni nakau ni nasulu ni kold larua, e noa tea maga waia:

²A atae nawosiana anigo maga, go nawosimawosaana go nasokiana anigo, go naga ku dogo sa ki naatam̃oli sa maga, go ku maridogo tea maga waina eu dum̃ada soso ra ki apostolo maga, go eu da pei apostolo maga mau, go ku pap̃ai ra eu pei tea sorosoro;

³go ku peani nasokiana po soki nalakena nagisagu, po da mawosa asa mau.

⁴Ma a peani tea waia dip̃a ko, naga ku doropusi nadodomiana vea anigo.

⁵Nalakena tea wanogoe p̃a midoaki tokora waina ku dowo pae asa, go p̃a midoaki doa, po mari nawosiana vea maga; kite a pe valoti punusi ko, po disua ki nakau ni nasulu anigo m̃elu dua ki naliana, waina ku pe ta midoaki doa mau.

⁶Ma ku peani tea waia, naga ku karaikita nawosiana maga ki tea sarausi Nikolao maga, waina kinau ma a karaikita ra.

⁷Tea waina e pilake nadaliga ega rogo tea waina Naatana e noa ki ekalesia maga asa. Tea waina e mari matua, aga wo dua e naga ega kani tea ni nakau ni namauriana, waina e doko Paradeiso ki Sup̃e.

⁸Go p̃a midiri dua agelo ki ekalesia ni Semurna. Tea vea go tea edaku, waina e mate, po moro mauri, e noa tea maga waia.

⁹A atae nariesoki‐ko‐ana go naveiteatikaana anigo (ma ku pei sogolapa), go navasasakiana ki tea maga waina eu noa naga eu pei tea ni Yudea, go eu da pei tea ni Yudea mau, ma eu pei nasaisaiana sikai ki Satan.

¹⁰P̃a ta matauki tea maga waina p̃a wo sua ra mau: p̃a leo, diabolo ega wo nadi ki te seara kakamu paki ekopu ni nasum̃a ni navavaigoroana, naga kuga vei tea maridogoana; go kuga wo peani nariesokiana naaleatia rualima sikai. P̃a vei lomau pa pa paki namateana, go aga wo dua ko vauvau ni namauriana.

¹¹Tea waina e pilake nadaliga, ega rogo tea waina Naatana e noa ki ekalesia maga asa. Tea waina e mari matua ega wo da pei tea marisakiana ki namateana kerua mau.

¹²Go p̃a midiri dua agelo ki ekalesia ni Percamo. Tea waina e peani lova makali ni navakalina dua e noa tea maga waia:

¹³A atae tokora waina ku doko asa doko, tokora waina malo tasake ki Satan e doko asa; go ku dape soki nagisagu, go ku da pasa goro nasaralomau‐au‐ana mau, naaleatia maga ki Antipas, tea noa sokisoki aginau, tea vei lomau, waina e pei tea maripunueana m̃aleoputo kakamu, tokora waina Satan e doko asa doko.

¹⁴Ma a peani tea visa dip̃a ko, nalakena ku peani naatam̃oli seara waina eu dape soki navasapiseikiana ki Balaam, waina e pasa piseiki Balak naga ega nadi ki tea tapilagonaana sikai narae ni Israel natuna maga, naga euga kani naleo maga waina eu pei naviriana paki nasup̃e maga, go naga euga maripele.

¹⁵Go dapala nogoe ku peani naatam̃oli seara waina eu dape soki navasapiseikiana ki tea sarausi Nikolao maga.

¹⁶Nalakena tea wanogoe p̃a midoaki doa: ma ku pe ta midoaki doa mau, aga wo paloti punusi ko m̃araverave, go aga wo mari navakalo paki da ki lova ni nawokagu.

¹⁷Tea waina e pilake nadaliga, ega rogo tea waina Naatana e noa ki ekalesia maga asa. Tea waina e mari matua, aga wo dua e manna surukiana seara, go aga wo dua e vatu tare sikai, go nagisa vau sikai tea midiriana doko vatu wanogoe, waina te naata sikai e da atae a mau, ma tea waina e dape e ega wo sikina atae a.

¹⁸Go p̃a midiri dua agelo ki ekalesia ni Tuateira. Sup̃e Natuna, waina e pilake namatana ero dapala soro ni nakapu, go nam̃elena ero dakiusi brass waina e lidalida, e noa tea maga waia:

¹⁹A atae nawosiana anigo maga, go nadodomiana go nasaralomauana go nasuasuaana go nasokiana anigo, go naga nawosiana edaku anigo maga eu laapa liu tea vea maga.

²⁰Ma a peani tea waia dip̃a ko naga suasua ki nagoroi Yesabel, waina e dum̃ana soso e ki profeta nagoroi sikai; go e do pasa piseiki po do surue tea suasua aginau maga naga euga maripele, go naga euga kani naleo maga waina eu pei naviriana paki nasup̃e maga.

²¹Go a dua e ragi naga ega midoaki doa; go e da masauna naga ega midoaki doa m̃elu dua ki namaripeleana aneana mau.

²²P̃a leo, aga wo nadi ki nia paki nawewele sikai, go tea maga waina eu mamau maripele sikoti a, eu pe ta midoaki doa m̃elu dua ki nawosiana aneana maga mau, a pe wo nadi ki da paki nariesokiana warua.

²³Go aga wo mari punue natuna maga ki namateana; go ekalesia maga mamau puti euga wo atae naga kinau a pei tea waina a do leo usiusi nap̃elekevatu maga go nap̃op̃o maga: go aga wo dua mu sara naata sikasikai pataka nawosiana animu maga.

²⁴Ma a noa ki mu tea p̃ota maga waina ku doko Tuateira, tea maga waina eu da dape navasapiseikiana wanogoe mau, waina eu da atae tea vakipua maga ki Satan, dapala waina eu noa e; aga wo da doro tea madaga p̃ota mu mau.

²⁵Ma tea waina ku peani a, kuga tape soki a pa pa paki ragi waina aga valoti asa.

²⁶Go tea waina e mari matua, go tea waina e pavaigoro nawosiana aginau maga pa pa paki ragi edaku, aga wo dua e naveinawotaana dap̃au nalauna maga:

²⁷go ega wo maraki ra ki tiko ni airon sikai, dapala waina lasa maga ni tea mari lasa ni naruku eu pei tea marip̃oraworaeana; dapala waina kinau ma a dape a ki Tamagu:

²⁸go aga wo dua e m̃asoe lapa ni malip̃ogi.

²⁹Tea waina e pilake nadaliga ega rogo tea waina Naatana e noa ki ekalesia maga asa.