Read Nguna Togoa Etafe North APOKALUPESI 21 Bible Online

APOKALUPESI 21 - Nguna Togoa Etafe North bible

APOKALUPESI 21

¹Go a punusi nakoroatelagi vau sikai go maramana vau sikai: nalakena nakoroatelagi vea go maramana vea ero pano sua; go natasi e da moro doko mau.

²Go a punusi natokoana tapu, Yerusalem vau, e do siwo pae nakoroatelagi m̃elu Sup̃e umai, e pei tea marim̃atakiana dapala nagoroi laki sikai waina e magi anawota pei tea rekeikiana.

³Go a dogo nadaleo warua sikai e m̃elu malo tasake, e naga, Kuga leo, tap̃aup̃au ki Sup̃e e sikoti naatam̃oli maga, go ega wo doko sikoti ra, go nara euga wo pei narei aneana, go nae ega wo pei Sup̃e sikoti ra, Sup̃e adeada.

⁴Go ega wo kasi lua sara naririmata m̃elu dua ki namatada maga; go namateana ega wo da moro doko mau; go nasusueana, go natagiana, go navitinuana, euga wo da moro doko mau: tea vea maga teu pano sua.

⁵Go tea waina e dasake malo tasake e naga, Kuga leo, a mari naleo maga mamau puti eu pau. Go e naga, P̃a midiri: nalakena navasaana maga wanogoe eu pei daleo atatu go lomau.

⁶Go e noa ki nau, e naga, Eu pei tea marisuaana, Kinau a pei Alfa go Omeca, naatulakeana go nanopuana. Kinau aga wo dua m̃oli ki tea waina e madou noai ni namata noai ni namauriana.

⁷Tea waina e mari matua ega wo peani tea maga wanogoe; go aga wo pei Sup̃e aneana, go nae ega wo pei natugu.

⁸Ma agi tea mataku maga, go tea maga waina eu da saralomau mau, go tea mamaragokiana maga, go tea mari punue maga, go tea maripele maga, go tea wosidoa maga, go tea lotu ki nasup̃e maga, go tea sorosoro maga mamau puti, matele adeada ega wo doko namarourou waina e do soro ki nakapu go ki sulfur; waina e pei namateana kerua.

⁹Go sikai ni agelo larua waina eu dape lasa larua, waina eu pura ki nawokatiana larua edaku mau e umai; go e pasa ki nau, po naga, P̃a umai, aga wo pisei ki‐go nagoroi laki, nagoroi ki Arnio.

¹⁰Go e dape lua au doko Naatana paki tava warua pakilagi sikai, go e pisei ki nau natokoana tapu Yerusalem, e do siwo pae nakoroatelagi m̃elu Sup̃e umai,

¹¹e pilake nasamasamaana ki Sup̃e: namarama kakana e dakiusi vatu sikai waina e p̃ia p̃arua liu, dapala vatu yasper sikai, e m̃aru dapala krustalo:

¹²e peani nakoro warua pakilagi sikai; e peani namata‐pua rualima sikai tamate dua, go agelo rualima sikai tamate dua waina eu doko pisari namata‐pua maga; go nagisa maga waina eu pei tea midiriana ara, waina eu pei nagisa maga ni naworawora maga ni Israel natuna maga:

¹³namata‐pua dolu eu doko taleva ni elo sake; go namata‐pua dolu eu doko taleva ni north; go namata‐pua dolu eu doko taleva ni sauth; go namata‐pua dolu eu doko taleva ni elo musu.

¹⁴Go nakoro ni natokoana e peani laketano rualima sikai tamate dua, go e peani doko ara nagisa rualima sikai tamate dua ni apostolo rualima sikai tamate dua ki Arnio.

¹⁵Go tea waina e pasa ki nau e dape tea totowo napati nau ni kold sikai. Naga ega rowogi natokoana, go namata‐pua kakana maga, go nakoro kakana.

¹⁶Go natokoana e pei p̃alap̃ala one, go navarauana kakana e pataka ni naweleweleana kakana: go e dowogi natokoana ki napati nau e pei maile manu sikai go p̃onotia lima: navarauana go naweleweleana go navakilagiana kakana eu pataka sikai.

¹⁷Go e dowogi nakoro kakana, kubit p̃onotia sikai rualima takuna pati tamate pati, totowo ki naatam̃oli sikai, waina e pei, tea ki agelo sikai.

¹⁸Go natavagiana ni nakoro kakana e pei yasper: go natokoana e pei kold tautau dakiusi class tautau.

¹⁹Laketano maga ni nakoro ni natokoana eu pei tea rekeikiana ki sara vatu wia. Laketano vea e pei yasper; kerua, safir; ketolu, kalkedon; kevati, emerald;

²⁰kelima, sardonux; kelatesa, sardius; kelarua, krusolitho; kelatolu, berul; keloveti, topas; kerualima, krusopraso; kerualima sikai tamate sikai, huakintho; kerualima sikai tamate kerua, amethust.

²¹Go namata‐pua rualima sikai tamate dua eu pei napati ni vilavila rualima sikai tamate dua; sara namata‐pua eu pei tea ni napati ni vilavila sikasikai puti: go napua lapa ni natokoana e pei kold tautau, dapala class lagaduruana.

²²Go a da punusi te nasum̃a tapu sikai asa mau: nalakena Yehovah Sup̃e, Tea Kasua mau, go Arnio, ero pei nasum̃a tapu kakana.

²³Go natokoana e da dapala waina e p̃ia naga elo kite atelagi eroga maramalaga asa mau: nalakena nasamasamaana ni Sup̃e e maramalagati a, go Arnio e pei nasulu kakana.

²⁴Go nalauna maga euga wo surata pae namarama kakana: go nawota maga ni maramana eu do dape nasamasamaana adeada paki asa.

²⁵Go namata‐pua kakana maga euga wo da pei tea kokoroana aleati mau, (nalakena p̃ogi ega wo da doko tokora wanogoe mau):

²⁶go euga wo dape nasamasamaana go nadodomadaganiana ni nalauna maga umai paki asa:

²⁷go te navatuna sikai waina e da dautau mau ega wo da sili paki asa mau, kite tea waina e do mari namamaragokiana go nasorosoroana: ma tea maga waina eu pei tea midiriana tusi ni namauriana ki Arnio euga wo sikida sili paki asa.