Read Nguna Togoa Etafe North APOKALUPESI 3 Bible Online

APOKALUPESI 3 - Nguna Togoa Etafe North bible

APOKALUPESI 3

¹Go p̃a midiri dua agelo ki ekalesia ni Sardis. Tea waina e dape Naatana larua ni Sup̃e, go m̃asoe larua, e noa tea maga waia: A atae nawosiana anigo maga, naga ku peani nagisa sikai naga ku mauri, go ku pei tea mate.

²P̃a to leleogoro, go p̃a lawosoki tea maga waina eu ko doko, waina eu pei m̃aladigi naga euga mate: nalakena a da pap̃ai te nawosiana anigo seara waina eu pei tea vakavuroana narae ni Sup̃e aginau mau.

³Nalakena tea wanogoe p̃a midoaki dapala waina ku dape go dapala waina ku dogo; go p̃a vavaigoro e, go p̃a midoaki doa. Nalakena tea wanogoe ku pe ta leleogoro mau, a pe wo paloti dapala tea vanako sikai, go p̃a wo da atae seve aura waina aga wo paloti pa parati ki‐go asa mau.

⁴Ma ku peani nagisa visa maau doko Sardis waina eu da mari sugoro adeada eu loa mau: go euga wo surata sikoti au po suni tea tare maga; nalakena eu p̃ia ki nia.

⁵Tea waina e mari matua ega wo pei tea sugoroana dapala nogoe ki sugoro tare; go aga wo da kasi lua nagisana m̃elu dua ki tusi ni namauriana mau, go aga wo noa sai nagisana narae ni Tamagu, go narae ni agelo aneana maga.

⁶Tea waina e pilake nadaliga ega rogo tea waina Naatana e noa ki ekalesia maga asa.

⁷Go p̃a midiri dua agelo ki ekalesia ni Filadelfia. Tea waina e dapu, tea waina e pei lomau, tea waina e peani tea viloki ki David, tea waina e p̃olagati go te naata e da kokoro mau, go waina e kokoro go te naata e da p̃olagati mau, e noa tea maga waia:

⁸A atae nawosiana anigo maga (p̃a leo, a lawo ki namata wolagatiana sikai e doko naraem̃a, waina te naata e da mari atae kokoro e mau), naga ku peani nakasuaana kiki, go ku dogo paratiki navasaana aginau, po da pasagoro nagisagu mau.

⁹P̃a leo, a pitua ki da eu pei tea ni nasaisaiana ki Satan, tea maga waina eu dum̃ada noa naga eu pei tea ni Yudea, go eu da pei tea ni Yudea mau, ma eu sorosoro, p̃a leo, aga wo mari ra naga euga wo umai po suai natano narae ni nam̃elem̃a, go naga euga atae naga kinau a dodomi ko.

¹⁰Nalakena ku pavaigoro navasaana ni nasokiana aginau, kinau ma aga wo pavaigoro ko m̃elu dua ki aura ni namaridogoana, aura waina ega wo umai pa paratiki maramana mamau, naga ega maridogo tea maga waina eu doko maramana doko.

¹¹Aga valoti m̃araverave: p̃a tape soki tea waina ku peani a, naga te naata sikai ega ta dape vauvau anigo mau.

¹²Tea waina e mari matua, aga wo mari a ega vei tip̃a sikai ekopu ni nasum̃a tapu ki Sup̃e aginau, go ega wo da moro dave m̃elu dua ki nia mau; go aga wo midiri nagisa ni Sup̃e aginau asa, go nagisa ni natokoana ki Sup̃e aginau, Yerusalem vau, waina e do pae nakoroatelagi m̃elu Sup̃e aginau siwo umai, go nagisagu vau.

¹³Tea waina e pilake nadaliga ega rogo tea waina Naatana e noa ki ekalesia maga asa.

¹⁴Go p̃a midiri paki agelo ki ekalesia ni Laodikeia. Amen, tea noa sokisoki lomau go waina e pei lomau, naatulakeana ni natawonakiana ki Sup̃e, e noa tea maga waia.

¹⁵A atae nawosiana anigo maga, naga ku da maladi mau go ku da pivitinu mau: a masauna naga p̃a maladi kite p̃a vivitinu.

¹⁶Dapala nogoe nalakena ku pivivitinu, go ku da pivitinu mau go ku da maladi mau, aga wo lua ki‐go m̃elu dua ki nawokagu,

¹⁷Nalakena ku naga, A pei sogolapa, po dalua sua nasogolapaana, po da pei tea tika ki te navatuna mau; go ku da atae naga ku pei tea rogo kite sa go tea tagisiana go tea tika go tea kesa go tea m̃alam̃ala;

¹⁸a pusum̃aki paki‐go naga p̃a vakotovi kiagu kold waina e pei tea venim̃atakiana ki nakapu, naga p̃a vei sogolapa; go sugoro tare maga naga p̃a susu, go naga namaliereana ni nam̃alam̃alaana anigo ega ta doko lina mau; go naroro ni mata sa naga p̃a sala namatam̃a asa, naga p̃a leo sai.

¹⁹Tea maga waina kinau a dodomi ra, a pasa kasua ki da po parati pisei ki da: nalakena tea wanogoe p̃a vei p̃op̃o suisui, po midoaki doa.

²⁰P̃a leo, a lawodu pisari namata po do p̃okawoka: te naata e pe rogo nadaleogu po p̃olagati namata, aga wo paki ekopu punusi a, go aga wo ganikani sikoti a, go nae ega wo ganikani sikoti au.

²¹Tea waina e mari matua, aga wo dua e naga ega tasake sikoti au malo tasake aginau, dapala waina kinau ma a mari matua po dasake sikoti Tamagu malo tasake aneana.

²²Tea waina e pilake nadaliga, ega rogo tea waina Naatana e noa ki ekalesia maga asa.