Read Nguna Togoa Etafe North APOKALUPESI 5 Bible Online

APOKALUPESI 5 - Nguna Togoa Etafe North bible

APOKALUPESI 5

¹Go a punusi tusi sikai e doko nam̃elearu ni matua ni tea waina e dasake malo tasake, e pei tea midiriana nap̃elena go natakuna, e pei tea vulusokiana p̃ono ki navulusokiana larua.

²Go a punusi agelo kasua sikai e do dogorogo ki nadaleo warua, e naga, Sei e p̃ia naga ega vukepiri tusi, po kisipiri navulusokiana kakana maga?

³Go te naata sikai ni nakoroatelagi, kite ni maramana, kite ni etano ki maramana, e da mari atae pukepiri tusi wanogoe mau, kite leopunusi a.

⁴Go kinau a dagi p̃arua, nalakena te naata sikai e da pei tea vap̃aiana mau waina e p̃ia naga ega vukepiri tusi wanogoe, kite leo punusi a:

⁵go tea matua maga sikai kakada e noa ki nau, e naga, P̃a ta dagi mau: p̃a leo, Laion waina e pei tea naworawora ni Yudah, Nawasi ni David, e marimatua naga ega vukepiri tusi po kisipiri navulusokiana larua kakana.

⁶Go a punusi Arnio sikai e lawodu m̃aleoputo ni malo tasake go ni nalo mauri pati, go m̃aleoputo ni tea matua maga, dapala e pei tea maripunueana, e pilake napati larua ni nap̃auna, go namata larua, waina eu pei Naatana larua ni Sup̃e waina eu pei tea tip̃akiluaana paki maramana mamau.

⁷Go e umai, go e dape a m̃elu dua ki nam̃elearu ni matua ni tea waina e dasake malo tasake.

⁸Go ragi waina e dape sua tusi, nalo mauri pati go tea matua rualima dua tamate pati eu dowo pakitano narae ni Arnio, eu dape harp sikasikai sarasara ra, go lasa maga ni kold waina eu pura ki tea ni nap̃o wia, waina e pei natapasavasaana maga ki tea tautau maga.

⁹Go eu do lega nalegaana vau sikai, eu naga, Ku p̃ia naga p̃a tape tusi, go naga p̃a kisipiri navulusokiana kakana maga: nalakena ku pei tea maripunueana, po magi Sup̃e pakotovi ki nadam̃a naatam̃oli maga ni sara naworawora, go ni sara navasaana, go ni sara narei, go ni sara nalauna,

¹⁰po mari ra eu magi Sup̃e aginami pei namarakiana sikai go tea viri maga; go euga wo maramara doko maramana.

¹¹Go a punusi, go a dogo nadaleo ni agelo laapa dalivirigoro malo tasake go nalo mauri maga go tea matua maga; go naveveana kakada e pei tivilia maga paka tivilia maga, go manu maga paka manu maga;

¹²eu do noa ki nadaleo warua sikai, eu naga, Arnio waina e pei tea maripunueana e p̃ia naga ega tape namarakiana, go nasogolapaana, go namanumatuaana, go nakasuaana, go nadodomadaganiana, go nasamasamaana, go navasap̃iakiana.

¹³Go a dogo sara naleo tawonakiana waina eu doko nakoroatelagi, go maramana, go etano ki maramana, go natasi, go naleo maga mamau puti waina eu doko ara, a dogo ra eu naga, Agi tea waina e dasake malo tasake, go agi Arnio, ega vei navasap̃iakiana, go nadodomadaganiana, go nasamasamaana, go namarakiana, pa pa ega tu du po du mau du.

¹⁴Go nalo mauri pati eu naga, Amen. Go tea matua maga eu dowo pakitano po lotu.