Read Nguna Togoa Etafe North APOKALUPESI 7 Bible Online

APOKALUPESI 7 - Nguna Togoa Etafe North bible

APOKALUPESI 7

¹Edaku ki tea wanogoe a punusi agelo pati eu lawodu naweluki pati ni maramana, eu dape soki nalagi pati ni maramana, naga te nalagi sikai ega ta sau doko maramana, kite doko natasi, kite paki te nakau sikai mau.

²Go a punusi agelo p̃ota sikai e sake pae elo sake, e dape tea vulusoki ki Sup̃e mauri: go e pioso ki nadaleo warua sikai paki agelo pati, waina e pei tea vituakiana paki da naga euga mari sa ki maramana go natasi,

³e naga, Kuga ta mari sa ki maramana, kite natasi, kite nakau maga mau, pa pa auga vea pulusoki tea suasua maga ki Sup̃e anigida doko naraeda.

⁴Go a dogo naveveana ni tea maga waina eu pei tea vulusokiana, nasogosogo sikai tivilia pati go manu pati, tea vulusokiana maga ni sara naworawora ni Israel natuna maga.

⁵Tea ni naworawora ni Yudah tivilia sikai go manu dua eu pei tea vulusokiana: Tea ni naworawora ni Reuben tivilia sikai go manu dua: Tea ni naworawora ni Cad tivilia sikai go manu dua:

⁶Tea ni naworawora ni Asher tivilia sikai go manu dua: Tea ni naworawora ni Naftali tivilia sikai go manu dua: Tea ni naworawora ni Manasseh tivilia sikai go manu dua:

⁷Tea ni naworawora ni Simeon tivilia sikai go manu dua: Tea ni naworawora ni Levi tivilia sikai go manu dua: Tea ni naworawora ni Issakar tivilia sikai go manu dua:

⁸Tea ni naworawora ni Sebulon tivilia sikai go manu dua: Tea ni naworawora ni Yosef tivilia sikai go manu dua: Tea ni naworawora ni Benyamin tivilia sikai go manu dua eu pei tea vulusokiana.

⁹Edaku ki tea maga wanogoe a punusi go kuga leo, taua warua sikai, waina te naata e da mari atae peve ra mau, tea ni sara nalauna, go ni naworawora maga go ni narei maga go ni namena maga mamau puti, eu lawodu narae ni malo tasake go narae ni Arnio, eu suni sugoro tare maga, go naulu ni paama maga eu doko nam̃elearuda;

¹⁰go eu do pioso ki nadaleo warua sikai, eu naga, Namautipauriana ega vei agi Sup̃e anigida waina e dasake doko malo tasake, go agi Arnio.

¹¹Go agelo maga mamau puti eu lawodu dalivirigoro malo tasake, go dalivirigoro tea matua maga go nalo mauri pati; go eu dowo dap̃olosiwo narae ni malo tasake po lotu ki Sup̃e,

¹²eu naga, Amen: navasap̃iakiana, go nasamasamaana, go namanumatuaana, go navasadodom̃atakiana, go nadodomadaganiana, go namarakiana, go nakasuaana, euga vei agi Sup̃e anigida pa pa ega tu du po du mau du. Amen.

¹³Go tea matua maga sikai kakada e pasadara, po noa ki nau, Tea maga wanae waina eu suni sugoro tare maga, eu pei sei, go eu pae esava umai?

¹⁴Go a noa ki nia, Nawota aginau, nigo ku atae a. Go e noa ki nau, Tea maga wanae eu pei tea maga waina eu m̃elu nariesokiana warua umai, go eu sarue sugoro adeada maga, po mari ra eu dare nada ni Arnio.

¹⁵Nalakena tea wanogoe eu doko narae ni malo tasake ki Sup̃e; go eu maneana suasua aleati go p̃ogi nasum̃a tapu aneana: go tea waina e dasake doko malo tasake ega wo mari tap̃aup̃au aneana ega wo kovagoro ra.

¹⁶Euga wo da moro pitolo mau, go euga wo da moro madou mau; go elo ega wo da sili ara mau, go te navivitinuana mau:

¹⁷nalakena Arnio waina e doko m̃aleoputo ni malo tasake ega wo leo paratiki pakale ra, po maraki ra paki namata noai maga ni namauriana: go Sup̃e ega wo kasilua sara naririmata m̃elu dua ki namatada maga.