Read Nguna Togoa Etafe North APOKALUPESI 9 Bible Online

APOKALUPESI 9 - Nguna Togoa Etafe North bible

APOKALUPESI 9

¹Go agelo kelima e sui paiga, go a punusi m̃asoe sikai ni nakoroatelagi e dowo paki maramana: go tea viloki ni namadau ni epua e pei tea vituakiana paki nia.

²Go e p̃olagati namadau ni epua; go naasua sikai e sake m̃elu dua ki namadau, dapala naasua ni upu warua sikai; go elo go namalopa ero pei tea mariana ero maligo nalakena naasua ni namadau.

³Go midiri maga eu dave m̃elu dua ki naasua paki maramana; go nakasuaana e pei tea vituakiana paki da, dapala waina mataloa maga ni maramana eu peani nakasuaana.

⁴Go e pei tea noaana paki da naga euga ta mari sa ki nam̃enau ni navanua mau, kite te navatuna malakesa mau, kite te nakau sikai mau, ma naga euga mari sa ki naatam̃oli maga waina eu da peani navulusokiana ni Sup̃e doko naraeda mau euga sikida.

⁵Go e pei tea vituakiana paki da naga euga ta mari punue ra mau, ma naga euga vei tea mariana euga vitinu atelagi lima: go navitinuana adeada e dapala navitinuana waina mataloa sikai e mari a, ragi waina e dip̃a naatam̃oli sikai.

⁶Go naaleatia maga wanogoe naatam̃oli maga euga wo laaga namateana, go euga wo da pap̃ai a mau; go euga wo masauna naga euga mate, go namateana e do sava dua ki da pano.

⁷Go natakiusiana ni midiri maga e dakiusi horse maga waina eu pei tea marim̃atakiana raki navakalo; go tea waina e dapala vauvau maga dakiusi kold e doko nap̃auda, go naraeda eu dapala narae ni naatam̃oli maga.

⁸Go eu pilake naloluda dapala nalolu ni nagoroi maga, go napatida eu dapala napati ni laion maga.

⁹Go eu suni kokororum̃a maga, dapala kokororum̃a maga ni airon; go nasaruruana ni nalivaruda e dapala nasaruruana ni kariot maga, ni horse laapa waina eu do sava paki navakalo.

¹⁰Go eu pilake napueda eu dakiusi mataloa maga, go natip̃ada maga; go nakasuaana adeada naga euga mari sa ki naatam̃oli maga atelagi lima e doko napueda.

¹¹Eu peani agelo ni epua e pei nawota dap̃au ra: nagisana pae Heberu e pei Abaddon, go pae navasaana ni Hellas e peani nagisa Apolluon.

¹²Ai vea e pano sua: kuga leo, Ai dua ero ko do umai edaku ki tea maga wanogoe.

¹³Go agelo kelatesa e sui paiga, go a dogo nadaleo sikai e m̃elu napati maga ni wede ni naviriana ni kold waina e doko narae ni Sup̃e,

¹⁴e noa ki agelo kelatesa, waina e dape paiga, e naga, P̃a veresi agelo pati waina eu pei tea soliana pisari noai sara warua Eufrates.

¹⁵Go agelo pati wanogoe eu pei tea veresiana, waina eu pei tea marim̃atakiana sua raki aura go naaleatia go atelagi go natau, naga euga mari punue namagovai ketolu ni naatam̃oli maga.

¹⁶Go naveveana ni taua maga ni tea maga waina eu sakesaake horse e pei tivilia sikai paka tivilia sikai paka rua: a dogo naveveana kakada.

¹⁷Go a punusi horse maga doko navunusiana dapala waia, go tea maga waina eu sakesaake ara, eu suni kokororum̃a maga dapala nakapu miala go huakintho go sulfur: go nap̃au ni horse maga eu dapala nap̃au ni laion maga; go nakapu e do dave m̃elu dua ki nawokada pano go naasua go sulfur.

¹⁸Namagovai ketolu ni naatam̃oli maga eu pei tea maripunueana pae nawokatiana dolu wanogoe, ki nakapu go ki naasua go ki sulfur, waina eu do dave m̃elu dua ki nawokada.

¹⁹Nalakena nakasuaana ki horse maga e doko nawokada, go e doko napueda: nalakena napueda eu dakiusi m̃aata maga, go eu pilake p̃auda maga; go ki tea maga wanogoe eu do marisaki.

²⁰Go tea p̃ota maga ni naatam̃oli maga waina eu da pei tea maripunueana ki nawokatiana maga wanogoe mau, eu da midoaki doa m̃elu dua ki nawosiana maga ni nam̃elearuda mau, naga euga ta lotu ki dimon maga mau, go ki nasup̃e maga ni kold, go ni silver, go ni brass, go ni vatu, go ni nakau; waina eu da mari atae leo sai kite dogo, kite surata mau:

²¹go eu da midoaki doa m̃elu dua ki namaripunueana adeada maga, go ki nawosidoaana adeada maga, go ki namaripeleana adeada, go ki navanakoana adeada maga mau.