Read Nguna Togoa Etafe North RUTH 1 Bible Online

RUTH 1 - Nguna Togoa Etafe North bible

RUTH 1

¹Go e pakilina naaleatia maga waina tea vasap̃otae maga eu do pasap̃otae, naga navitoloana sikai e doko navanua. Go naatam̃oli sikai ni Bethlehem‐yudah e pano naga ega m̃enaki‐atatoko navanua ki Moab, nae, go anagoroi, go natuna naanoai dua.

²Go nagisa ni naatam̃oli wanogoe Elimelek, go nagisa ni anagoroi Naomi, go nagisa ni natuna naanoai dua Mahlon go Kilion, eu pei tea ni Efrath ni Bethlehem‐yudah. Go eu rumai paki navanua ki Moab, po doko asa doko.

³Go Elimelek Naomi anawota e mate; go nae e pei tea toropusiduakiana, go natuna naanoai dua.

⁴Go ero dum̃ada madeada piragi nagoroi maga ni nagoroi maga ni Moab; nagisa ni tea sikai Orpah, go nagisa ni kerua Ruth: go eu doko tokora wanogoe doko natau e alagoro pei rualima sikai.

⁵Go Mahlon go Kilion ero dua mate; go nagoroi wanogoe e pei tea toropusiduakiana ki natuna dua go ki anawota.

⁶Go e duleana nae go sulina dua, naga ega liliu m̃elu dua ki navanua ki Moab pano: nalakena e dogo sua navanua ki Moab naga Yehovah e umai punusi narei aneana naga ega tua ra navinaga.

⁷Go e pano m̃elu dua ki tokora waina e doko asa, go sulina maga ero sikoti a pano; go eu surata pae napua pano naga euga liliu paki navanua ki Yudah.

⁸Go Naomi e noa ki sulina maga, Koroga vano, koroga liliu paki nasum̃a ki p̃ilamu maga pano: Yehovah ega mari nadodomiana paki mu ega tapala waina koro mari a paki tea mate maga, go paki nau.

⁹Yehovah ega tua mu naga koroga vap̃ai namaromaroana doko nasum̃a ki amuwota maga. Go e dum̃ili ra; go eu sike nadaleoda, po dagi.

¹⁰Go ero noa ki nia, Ee, ma aroga wo liliu sikoti ko paki narei anigo pano.

¹¹Go Naomi e noa, Koroga liliu, natugu nagoroi maga, ekasana koroga sikoti au pano? Natugu naanoai ero ko doko nap̃elegu naga eroga vei amuwota maga kite?

¹²Koroga liliu, natugu nagoroi maga, koroga vano; nalakena a matua dapala a pe ta laki mau. A pe noa, A peani naleogoroana, go a pe laki p̃ogi ni masoso, go a pe tape natugu naanoai maga;

¹³koro pe wo leogoro nalakena tea wanogoe pa pa eroga wo p̃arua kite? Koro pe wo doko m̃oli nalakena tea wanogoe dapala koroga wo da laki mau kite? Ee, natugu nagoroi maga nalakena a susue p̃arua nalakena nimu, nalakena nam̃elearu ni Yehovah e dave dip̃a au.

¹⁴Go eu sike nadaleoda po moro dagi: go Orpah e dum̃ili tuana; ma Ruth e puluti a.

¹⁵Go e noa, P̃a leo, taim̃a e po liliu paki narei aneana go paki sup̃e aneana pano: p̃a liliu dausi taim̃a pano.

¹⁶Go Ruth e noa, P̃a ta pasadie au mau naga aga toropusi ko, go naga aga liliu m̃elu dua ki narausi‐ko‐ana: nalakena tokora waina p̃a wo paki asa, aga wo paki asa; go tokora waina p̃a wo m̃enaki asa, aga wo m̃enaki asa; narei anigo euga wo pei narei aginau, go Sup̃e anigo Sup̃e aginau:

¹⁷tokora waina p̃a wo mate asa, aga wo mate asa, go tokora wanogoe aga wo pei tea ovakiana asa: Yehovah ega mari dapala nogoe paki nau, go ega moro mari a, nalakena namateana ega wo mari gida toroga vamawota.

¹⁸Go e punusi naga nae e midoakisokisoki a naga ega sikoti a pano, go e makoto ki navasaana paki nia.

¹⁹Go ero dua surata pano pa pa ero umai paki Bethlehem. Go e pakilina, ragi waina ero umai sua paki Bethlehem, naga natokoana mamau e pari nalakena nara, go nagoroi maga eu noa, Tea waia e pei Naomi kite?

²⁰Go e noa ki da, Kuga ta soso au ki Naomi mau, kuga soso au ki Mara: nalakena Tea Kasua mau e mari au a susue p̃arua.

²¹Kinau a pura pano, go Yehovah e piragi au a p̃alo liliu umai: ekasana ku soso au ki Naomi, ragi waina Yehovah e noasokisoki dip̃a au, go Tea Kasua mau e mari sa ki nau?

²²Go Naomi e liliu, go sulina Ruth, nagoroi ni Moab, e sikoti a, waina e liliu m̃elu dua ki navanua ki Moab: go nara ero umai paki Bethlehem, ragi ni naatulakeana ni natagaukotoviana ni barle.