Read Nguna Togoa Etafe North RUTH 2 Bible Online

RUTH 2 - Nguna Togoa Etafe North bible

RUTH 2

¹Go Naomi e peani naatam̃oli sikai waina e pei namatarau ki anawota, naatam̃oli marimatua sikai ni nasogolapaana, ni nawora ki Elimelek; go nagisana Boas.

²Go Ruth, nagoroi ni Moab, e noa ki Naomi, Aga vaki vanua pano, a pavara ni ko asa, po pivila m̃aleoputo ni m̃okai maga ni korn dausi tea waina aga wo pap̃ai nasaup̃iaana namatana maga. Go e noa ki nia, P̃a vano, natugu nagoroi.

³Go e pano, po umai po pivila vanua dausi tea tagaukotovi maga: go e pisigoro ki nia naga e pap̃ai namagovai ni vanua waina e pei agi Boas, waina e pei tea ni nawora ki Elimelek.

⁴Go kuga leo, Boas e pae Bethlehem umai, po noa ki tea tagaukotovi maga, Yehovah ega sikoti mu. Go eu noa ki nia, Yehovah ega vasa m̃ata ki‐go.

⁵Go Boas e noa ki tea suasua aneana waina e pei tea lawokiana dap̃au tea tagaukotovi maga, Agi sei nagoroi atara waia?

⁶Go tea suasua waina e pei tea lawokiana dap̃au tea tagaukotovi maga e pasadara po noa, E pei nagoroi atara ni Moab, nae waina e liliu sikoti Naomi m̃elu dua ki navanua ki Moab umai;

⁷go e noa, Aga vivila, a pavara ni ko asa, po daua ki m̃aleoputo ni napu maga dausi tea tagaukotovi maga: go e umai, po doko pae ragi ni malip̃ogi pa pa paki ragi waia, waina e maromaro ragi kiki ekopu ni nasum̃a.

⁸Go Boas e noa ki Ruth, P̃a rogo, natugu nagoroi, p̃a ta pano naga p̃a vivila vanua p̃ota sikai mau, go p̃a ta liu tokora waia pano mau; ma p̃a toko nea puluti nagoroi atara aginau maga.

⁹Namatam̃a eroga toko vanua waina eu do dagaukotovi a, go p̃a to dausi ra pano: a po dip̃aki natureai maga naga euga ta kisidogo ko mau; go ragi waina ku madou p̃a vaki lasa maga po munu dogo tea waina natureai maga eu pautui a.

¹⁰Go e dowo dap̃olosiwo, po suai natano, po noa ki nia, Ekasana a po pap̃ai nasaup̃iaana namatam̃a maga naga p̃a atae au, waina a pei tea ni navanua p̃ota?

¹¹Go Boas e pasadara po noa ki nia, E pei tea noasai‐m̃atakiana paki nau, tea mamau puti waina ku mari a paki tuam̃a edaku ki namateana ki am̃awota, go naga ku doropusi tamam̃a go p̃ilam̃a, go navanua waina ku pakilina asa, po umai paki narei sikai waina ku da atae a sala vea mau.

¹²Yehovah ega lagati dua ko nawosiana anigo, go namoriana vura ega vei tea vituakiana paki‐go m̃elu Yehovah, Sup̃e ki Israel, waina ku po umai naga p̃a sava sili etano ni nalivaruna maga.

¹³Go e noa, Aga vap̃ai nasaup̃iaana namatam̃a maga, nawota aginau; nalakena ku po pasakorokoro pakavakale au, go nalakena ku po pasa paki nap̃op̃o ni tea suasua nagoroi anigo, go kinau a da dakiusi tea suasua nagoroi anigo maga sikai kakada mau.

¹⁴Go Boas e noa ki nia, ragi ni nakaniana, P̃a umai paki m̃aladigi waia, po gani bred seara kakana, po pupugi matele anigo paki waine kokona. Go e do natano pisari tea tagaukotovi maga: go e maneana sai ki korn veniana, go e ganikani, po puka, po doropusi seara kakana.

¹⁵Go e duleana naga ega vivila, go Boas e dip̃aki natureai aneana maga, po noa, Ega vivila m̃aleoputo ni napu maga ma, go kuga ta mari a ega maliere mau.

¹⁶Go kuga moro maneana pualua seara m̃elu dua ki napu maga, po doropusi a, go ega vivila, go kuga ta pasa kasua ki nia asa mau.

¹⁷Go e pivila doko vanua pa pa paki ragi melu; go e p̃okalesue tea waina e pilae a, go e alagoro pei efah sikai ni barle.

¹⁸Go e dape dakati a, po umai paki natokoana: go tuana e punusi tea waina e pilae a: go e dape lua po dua e tea waina e doropusi a ragi waina e puka sua.

¹⁹Go tuana e noa ki nia, Ku pivila esava masoso? Go ku p̃osiwosi esava? Tea waina e atae ko ega vei tea vasam̃atakiana. Go e noakisai tuana naata waina e p̃osiwosi sikoti a, po noa, Nagisa ni naatam̃oli waina a p̃osiwosi sikoti a masoso e pei Boas.

²⁰Go Naomi e noa ki sulina, Nae ega vei tea vasam̃atakiana ki Yehovah, waina e da doropusi nadodomiana aneana paki tea mauri maga go paki tea mate maga mau. Go Naomi e noa ki nia, Naatam̃oli wanogoe e pei namatarau m̃aladigi ki gida, nae e pei tea taulua anigida sikai kakada.

²¹Go Ruth, nagoroi ni Moab e noa, Ioro, e noa ki nau, P̃a to puluti natureai aginau maga, pa pa euga mari sua natagaukotoviana mamau aginau.

²²Go Naomi e noa ki sulina Ruth, E p̃ia, natugu nagoroi, naga p̃a vano sikoti nagoroi atara aneana maga, go naga euga ta sua ko vanua p̃ota sikai mau.

²³Go e puluti nagoroi atara maga ki Boas naga ega vivila pa pa paki nanopuana ni natagaukotoviana ni barle go ni natagaukotoviana ni whiit; go e doko sikoti tuana doko.