Read Nguna Togoa Etafe North RUTH 3 Bible Online

RUTH 3 - Nguna Togoa Etafe North bible

RUTH 3

¹Go tuana Naomi e noa ki nia, Natugu nagoroi, aga ta manigo laaga namaromaroana naga p̃a toko p̃ia doko kite?

²Go ragi waia Boas namatarau anigida waina ku sikoti nagoroi atara aneana maga e da doko kite? P̃a leo, nae e do nive barle malo wokalesue nap̃ogiana waia.

³Go p̃a loloso, go p̃a tum̃am̃a puvurai ki‐go, go p̃a suni sugoro anigo maga, go p̃a siwo paki malo wokalesue pano: ma pa ta tum̃am̃a mari ko naga p̃a vei tea ataeana paki naatam̃oli wanogoe mau pa pa ega mari sua nakaniana go namunuana.

⁴Go ega wo doko, ragi waina ega wo one natano, naga p̃a wo atae tokora waina ega wo one asa, go p̃a wo paki ekopu, po mari pakasa ki tokora ni natuana, go p̃a wo one natano; go ega wo noakisai ko tea waina p̃a wo mari a.

⁵Go e noa ki nia, Tea mamau puti waina ku noa e aga wo mari a.

⁶Go e siwo paki malo wokalesue pano, po mari dapala tea mamau puti waina tuana e dip̃aki nia asa.

⁷Go Boas e ganikani po munu, go nap̃op̃ona e laelaea, go e pano naga ega one natano pisari namatap̃ago ni taua ni korn: go e pano panako umai, po mari pakasa ki tokora ni natuana, go e one natano.

⁸Go e pakilina p̃ogi matua, naga naatam̃oli wanogoe e mataku, go e doko leana po kolo leo, go kuga leo, nagoroi sikai e one pisari natuana.

⁹Go e noa, Nigo ku pei sei? Go e noa, Kinau a pei Ruth, tea suasua nagoroi anigo: go ku po p̃elesa ki nalivarum̃a dap̃augoro tea suasua nagoroi anigo; nalakena nigo ku pei namatarau ni m̃aladigi.

¹⁰Go e noa, Nigo p̃a vei tea vasam̃atakiana ki Yehovah, natugu nagoroi: ku po mari nadodomiana edaku anigo e p̃ia liu tea vea, nalo ni waina ku da dausi natureai maga mau, e pe vei tea tika kite e pe vei tea vei sogolapa.

¹¹Go ragi waia, natugu nagoroi, p̃a ta mataku mau; tea mamau waina ku noa e aga wo manigo mari a: nalakena natokoana mamau ki narei aginau eu atae naga nigo ku pei nagoroi sikai ni namarimatuaana.

¹²Go ragi waia e pei lomau naga kinau a pei namatarau ni m̃aladigi: ma namatarau sikai e doko waina e pei m̃aladigi liu au.

¹³P̃a m̃enaki nap̃ogiana waia, go ega wo doko malip̃ogi, naga e pe wo daulua ko, e pe wia; ega taulua ko: ma e pe ta masauna naga ega taulua ko mau, go kinau aga wo daulua ko. Yehovah e mauri: p̃a one natano pa pa paki malip̃ogi.

¹⁴Go e one pisari natuana one pa pa paki malip̃ogi: go e duleana pea ki ragi waina naata sikai e loatae tana ri. Go e noa, Ega ta pei tea ataeana mau naga nagoroi e umai paki malo wokalesue.

¹⁵Go e noa, P̃a tape umai sugoro kovagoro waina e doko ako, go p̃a vuasoki a; go e puasoki a: go e dowogi totowo latesa ni barle, po doropusi a e doko asa: go e umai paki natokoana.

¹⁶Go e umai punusi tuana, go e noa, E dapale sava, natugu nagoroi? Go e noakisai a tea mamau puti waina naatam̃oli wanogoe e maneana mari a.

¹⁷Go e noa, Totowo latesa ni barle waia e dua au asa; nalakena e noa, P̃a ta p̃alo pano punusi tuam̃a mau.

¹⁸Go e noa, P̃a ko doko etano, natugu nagoroi, pa pa p̃a wo atae dapala waina naleo waia ega wo dowo: nalakena naatam̃oli wanogoe ega wo da maromaro mau, pa pa ega wo mari sua naleo waia masoso.