Read Nguna Togoa Etafe North RUTH 4 Bible Online

RUTH 4 - Nguna Togoa Etafe North bible

RUTH 4

¹Go Boas e sake paki namata‐pua, po dasake tokora wanogoe: go kuga leo, namatarau ni m̃aladigi waina Boas e pasa asa e do liu pano; go e noa, We, mariki, p̃a tawasi, p̃a tasake nea. Go e dawasi, po dasake.

²Go e piragi naatam̃oli rualima sikai ni tea matua maga ni natokoana, po noa, Kuga tasake nea, go eu dasake.

³Go e noa ki namatarau ni m̃aladigi, Naomi, waina e liliu pae navanua ki Moab umai, e naga ega sori matele ni natano sikai, waina e pei agi taigida Elimelek.

⁴Go kinau a midoa ki nia naga aga noakisai ko asa, po noa, P̃a vakotovi a narae ni tea maga waina eu dasake nea, go narae ni tea matua maga ni narei aginau. Ku pe wo daulua e, p̃a taulua e: ma ku pe wo da daulua e mau, p̃a noakisai au asa, naga aga atae a: nalakena nigo ku pe vuoli te naata e pe ta doko mau waina ega taulua e; go kinau a edakugoro ko. Go e noa, Kinau aga wo daulua e.

⁵Go Boas e noa, Naaleatia waina p̃a wo pakotovi vanua wanogoe paki nam̃elearu ni Naomi, go p̃a wo pakotovi a paki Ruth nagoroi ni Moab, nagoroi ki tea mate, naga p̃a sike nagisa ni tea mate ega tu tea veanipiolikiana aneana.

⁶Go namatarau ni m̃aladigi e noa, A marisa dum̃agu maginau daulua e, a pe mari sa ki tea veanipiolikiana aginau: nigo p̃a tum̃am̃a manigo daulua natauluaana aginau, nalakena a marisa daulua e.

⁷Go tea waia e pei namariana tuai doko Israel nalo ni natauluaana go nalo ni nasurupiolikiana, naga euga lawosoki sara naleo; naatam̃oli e sawo lua nam̃elevasiana aneana, po dua tea ni m̃aladigi ki nia asa: go tea wanogoe e pei nanoasokisokiana doko Israel.

⁸Go namatarau ni m̃aladigi e noa ki Boas, P̃a tum̃am̃a manigo pakotovi a. Go e sawo lua nam̃elevasiana aneana.

⁹Go Boas e noa ki tea matua maga, go ki narei mamau, Nimu ku pei tea noasokisoki maga naaleatia waia, naga a po pakotovi tea mamau waina e pei agi Elimelek, go tea mamau waina e pei agi Kilion go agi Mahlon, paki nam̃elearu ni Naomi.

¹⁰Go Ruth ma, nagoroi ni Moab, Mahlon anagoroi, a po pakotovi a naga ega vei nagoroi aginau, naga aroga sike nagisa ni tea mate ega tu tea veanipiolikiana aneana, naga nagisa ni tea mate ega ta pei tea taeluaana m̃elu dua ki m̃aleoputo ni taina maga, go m̃elu dua ki namata‐pua ni tokora aneana mau: nimu ku pei tea noasokisoki maga naaleatia waia.

¹¹Go narei mamau waina eu doko namata‐pua, go tea matua maga, eu noa, Au pei tea noasokisoki maga. Yehovah ega mari nagoroi waina e po umai paki ekopu ni nasum̃a anigo ega tapala Rahel go ega tapala Leah, waina ero dua davagi nasum̃a ki Israel: go p̃a mari matua Efratah, go p̃a mari nagisam̃a ega vei tea rogoana Bethlehem:

¹²go nasum̃a anigo ega tapala nasum̃a ni Peres, waina Tamar e magi Yudah dape a, pae nawora waina Yehovah ega wo dua ko asa pae nagoroi atara waia.

¹³Go Boas e piragi Ruth, go e maneana pei anagoroi; go e umai punusi a, go Yehovah e dua e natumauana, go e dape natuna naanoai sikai.

¹⁴Go nagoroi maga eu noa ki Naomi, Yehovah ega vei tea vasam̃atakiana, waina e da mari namatarau ni m̃aladigi ega makoto paki‐go naaleatia waia mau, go nagisana ega vei tea rogorogokiana Israel.

¹⁵Go ega wo manigo pei tea viragi liliua ki namauriana, go tea vakale nakapuaraana anigo: nalakena sulim̃a, waina e dodomi ko, e dape a, nae waina e p̃ia ki‐go p̃arua liu natum̃a naanoai larua.

¹⁶Go Naomi e dape piakiki wanogoe po doropusi a e doko narum̃ana, go e maneana pei tea vakale.

¹⁷Go nagoroi maga waina eu doko eu soso e ki nagisa sikai, eu noa, Piakiki naanoai sikai e magi Naomi pakilina; go eu soso nagisana ki Obed: nae e pei tama ni Yesse, tama ni David.

¹⁸Go tea maga waia eu pei navakilinaana maga ni Peres: Peres e pesi Hesron, go Hesron e pesi Ram,

¹⁹go Ram e pesi Amminadab;

²⁰go Amminadab e pesi Nahshon, go Nahshon e pesi Salmon;

²¹go Salmon e pesi Boas, go Boas e pesi Obed;

²²go Obed e pesi Yesse, go Yesse e pesi David.