Read Nguna Togoa Etafe North 1 SAMUEL 1 Bible Online

1 SAMUEL 1 - Nguna Togoa Etafe North bible

1 SAMUEL 1

¹Naatam̃oli sikai ni Ramathaimsofim e doko navanua ni tava ni Efraim nagisana Elkanah, natu ni Yeroham, natu ni Elihu, natu ni Tohu, natu ni Suf, naatam̃oli sikai ni Efraim.

²Go e piragi nagoroi dua; nagisa ni tea sikai Hannah, go nagisa ni kerua Peninnah: go Peninnah e peani natuna maga, ma Hannah e da peani te natuna mau.

³Go naatam̃oli wanogoe e sake m̃elu dua ki natokoana aneana pano sara natau naga ega lotu po pitua ki naviriana paki Yehovah ki taua maga Shiloh. Go Eli natuna dua, Hofni ma Finehas, tea viri maga ki Yehovah, ero doko tokora wanogoe doko.

⁴Go naaleatia waina Elkanah e mari naviriana, e dua anagoroi Peninnah namagovai sikai go e dua natuna naanoai maga go natuna nagoroi maga namagovai sikasikai sarasara ra:

⁵Ma e dua Hannah namagovai paka rua: nalakena e dodomi Hannah, ma Yehovah e p̃ogoro nap̃elena.

⁶Go tea kokona ki nia e pasa p̃auluulu paki nia naga ega mari nap̃op̃ona ega rogokitesa, nalakena Yehovah e p̃ogoro nap̃elena.

⁷Go e mari dapala nogoe sara natau; ragi waina e sake paki nasum̃a ki Yehovah, e pasa p̃auluulu paki nia; nalakena tea wanogoe e dagi, po da ganikani mau.

⁸Go anawota Elkanah e noa ki nia, e naga, Hannah ekasana ku do dagi? Go ekasana ku da ganikani mau? Go ekasana nap̃op̃om̃a e dogokitesa? Kinau a da p̃ia ki‐go do liu natu naanoai rualima sikai kite?

⁹Go Hannah e duleana edaku ki eu ganikani po munu Shiloh. Go Eli tea viri, e dasake doko malo tasake aneana pisari nakau lawodu ni namata ni nasum̃a tapu ki Yehovah.

¹⁰Go Hannah e doko narogokitesaana ni naatana, po dapasavasa paki Yehovah, po dagi p̃arua.

¹¹Go e sai nasaiana sikai, po naga, Yehovah ki taua maga O, waina ku pe wo leo punusi narogokitesaana ki tea suasua nagoroi anigo lomau, po midoa ki nau, po da malio ki tea suasua nagoroi anigo mau, ma waina ku pe wo dua tea suasua nagoroi anigo piakiki naanoai sikai, ragi wanogoe aga wo dua Yehovah asa naaleatia mamau puti ni namauriana aneana, go tea masi nalolu sikai ega wo da sake paki nap̃auna mau.

¹²Go e pakilina, ragi waina e ko do dapasavasa narae ni Yehovah, naga Eli e leosoki nagolena.

¹³Ma Hannah e pasa nap̃op̃ona; nagolena ero do parivari, ma nadaleona e da pei tea rogoana mau: nalakena tea wanogoe Eli e midoa ki nia naga e po matamaloku.

¹⁴Go Eli e noa ki nia, P̃a wo matamaloku pa pa paki seve ragi? P̃a toropusi waine anigo ega m̃elu dua ki‐go pano.

¹⁵Go Hannah e pasadara po naga, Ee, nawota aginau, kinau a pei nagoroi rogokitesa sikai: a da munu waine, kite te namunuana kasua mau, ma a po daki naatagu narae ni Yehovah.

¹⁶P̃a ta midoa ki nia mau naga tea suasua nagoroi anigo e pei tea dodo p̃arop̃aro sikai: a ko do pasa nalakena narogokitesaana warua aginau go navasa‐p̃auluuludip̃a‐au‐ana.

¹⁷Go Eli e pasadara po naga, P̃a vae natam̃ateana pano: go Sup̃e ni Israel ega tua ko tea waina ku do datagovi a asa.

¹⁸Go Hannah e naga, Tea suasua nagoroi anigo ega vap̃ai nasaup̃iaana namatam̃a. Go nagoroi wanogoe e pae napua aneana pano, po ganikani, go naraena e da moro susue mau.

¹⁹Go eu duleana malip̃ogi loaloa, po lotu narae ni Yehovah, go eu moro liliu pano paki nasum̃a adeada doko Ramah: go Elkanah e atae nagoroi aneana Hannah; go Yehovah e midoa ki nia.

²⁰Go e pakilina ragi kakana, naga Hannah e diena po dape piakiki naanoai sikai; go e salagisana ki Samuel, po naga, Nalakena a po datagovi Yehovah asa.

²¹Go naatam̃oli wanogoe Elkanah, go tea ni nasum̃a aneana mamau puti, eu sake pano naga euga vitua paki Yehovah ki naviriana ni sara natau, go ki nasaiana aneana.

²²Ma Hannah e da sake pano mau; nalakena e noa ki anawota, e naga, Aga wo da sake pano pa pa piakiki wanogoe ega toropusi susu, go ragi wanogoe aga wo piragi a sake, naga ega vakilina narae ni Yehovah, po doko tokora wanogoe doko.

²³Go Elkanah anawota e noa ki nia, e naga, P̃a mari tea waina e p̃ia ki‐go; p̃a toko pa pa ega toropusi susu; ma tea sikai maau waia, Yehovah ega lawosoki navasaana aneana. Go nagoroi wanogoe e doko, po do pakasusu ki natuna, pa pa e doropusi susu.

²⁴Go ragi waina e doropusi susu, e piragi a sake sikoti a, pilake kau anoai sikai tea ni natau dolu, go efah sikai ni flaur, go nawili sikai ni waine, po piragi a umai paki nasum̃a ki Yehovah doko Shiloh: go piakiki wanogoe e ko da pei tea ni natau laapa.

²⁵Go eu mari punue kau anoai wanogoe, po piragi piakiki umai punusi Eli.

²⁶Go e naga, Nawota aginau O, naatam̃a e mauri nawota aginau, kinau a pei nagoroi waina a lawodu nea naraem̃a, doko do dapasavasa paki Yehovah.

²⁷A dapasavasa datago piakiki waia; go Yehovah e pitua ki navavaraniana aginau waina a datagovi a asa:

²⁸Nalakena tea wanogoe kinau a moro pitua liliua ki nia dua Yehovah asa; ragi waina e mauri doko, e pei tea vituakiana e pei agi Yehovah. Go e lotu ki Yehovah tokora wanogoe.