Read Nguna Togoa Etafe North 1 SAMUEL 10 Bible Online

1 SAMUEL 10 - Nguna Togoa Etafe North bible

1 SAMUEL 10

¹Go Samuel e dape lasa ni naroro lolo, po daki nia paki nap̃auna, po dum̃ili a, po naga, E da pei naga Yehovah e po puvurai ki‐go naga p̃a vei tea maraki dap̃au tea veaniana aneana kite?

²Ragi waina p̃a wo doropusi au masoso po pano, p̃a wo pap̃ai naatam̃oli dua pisari matigo ni Rahel, kokoi ni Benyamin doko Selsah; go nara eroga wo noa ki‐go, naga, Ass maga waina ku pano po laaga ara, eu po pei tea vap̃aiana: go p̃a leo, tamam̃a e da moro midoaki ass maga wanogoe mau, ma e do midoaki parati ki mu, go e naga, Aga wo mari nasava nalo ni natugu?

³Go p̃a wo moro pae tokora wanogoe pano, pa pa p̃a wo pakilina nalake ni oak ni Tabor, go tokora wanogoe naatam̃oli dolu euga wo sua ko asa waina eu do sake pa punusi Sup̃e Beth‐el, sikai e dapetape naninani natuna dolu, go kerua e dapetape bred dolu, go ketolu e dapetape nawili sikai ni waine:

⁴Go euga wo pasa dodomi ko, po dua ko bred ega rua; waina p̃a wo dape ra ki nam̃elearuda.

⁵Go edaku ki nia, p̃a wo pakilina tava ki Sup̃e, tokora waina nasum̃a ki naatam̃oli ni navakalo ni Filistine maga e doko asa: go ega wo pakilina, ragi waina p̃a wo umai paki m̃aladigi ki natokoana, naga p̃a wo sua taua ni profeta maga waina eu do pae tokora vakilagi siwo umai pilake salteri, go timbrel, go lokore, go harp, waina eu do pea ki da umai; go euga wo do peanoasai:

⁶Go Naata ni Yehovah ega wo puvua umai doko ako, go kuga wo mamau peanoasai, go p̃a wo pei tea maridoaana po pei naatam̃oli vanop̃ota sikai.

⁷Go ega toko, ragi waina navaivaiana maga wanogoe euga wo pakilina ki‐go, naga p̃a wo mari tea waina nam̃elearum̃a ega vap̃ai a naga ega mari a; nalakena Sup̃e e do sikoti ko.

⁸Go p̃a wo siwo pea ki nau paki Cilcal pano; go p̃a leo, aga wo paloti punusi ko, naga aga vitua ki navituaana tap̃arakiana maga, go naga aga viri naviriana maga ni navituaana maga ni natam̃ateana: p̃a wo doko naaleatia larua, pa pa aga wo paloti punusi ko, po pisei ki‐go ki tea waina p̃a wo mari a.

⁹Go e dapala nogoe, ragi waina e atutaku naga ega va dua ki Samuel pano, naga Sup̃e e dua e p̃op̃o vanop̃ota sikai: go navaivaiana maga mamau puti wanogoe eu pakilina naaleatia wanogoe.

¹⁰Go ragi waina eu rumai paki tava wanogoe, kuga leo, taua sikai ni profeta maga eu sua e; go Naata ni Sup̃e e puvua umai doko asa, go eu mamau peanoasai.

¹¹Go e pakilina, ragi waina tea maga mamau puti waina eu atae e sala vea eu punusi naga e sikoti profeta maga eu mamau peanoasai, ragi wanogoe narei eu dum̃ada noa ki da, eu naga, Nasava waia waina e pakilina ki natu ni Kish? Saul nae ma e pei profeta sikai kite?

¹²Go tea sikai ni tokora wanogoe e pasadara, po naga, Go sei e pei tamada? Nalakena tea wanogoe e po pei naluluakia sikai, Saul nae ma e pei profeta sikai kite?

¹³Go ragi waina e makoto ki naveanoasaiana, e umai paki tokora vakilagi.

¹⁴Go Saul aloana e noa ki nia, go ki tea suasua aneana, e naga, Koro paki esava? Go e naga, Aro pano po laaga ass maga: go ragi waina aro punusi naga eu da pei tea vap̃aiana mau, aro pa punusi Samuel.

¹⁵Go Saul aloana e naga, P̃a noakisai au, a pavara ni ko, tea waina Samuel e noa ki mu asa.

¹⁶Go Saul e noa ki aloana, e naga, E noakisai gami naga ass maga eu pei tea vap̃aiana. Ma nalo ni naleo ni namarakiana waina Samuel e pasa asa, e da noakisai a asa mau.

¹⁷Go Samuel e soso saisai ki narei pa punusi Yehovah Mispah;

¹⁸Go e noa ki Israel natuna maga, e naga, Yehovah Sup̃e ni Israel e pasa dapala nea, e naga, Kinau a piragi lua Israel m̃elu dua ki Ityipt sake umai, go a pualua mu m̃elu dua ki nam̃elearu ni tea ni Ityipt maga, go m̃elu dua ki nam̃elearu ni namarakiana maga mamau puti waina eu diesoki mu:

¹⁹Ma naaleatia waia, nimu ku po dip̃adoa Sup̃e animu waina e dum̃ana pualua mu m̃elu dua ki sara namarisaki‐mu‐ana go narogokitesaana animu maga; go ku po noa ki nia, ku naga, Ee, ma p̃a sike nawota sikai dap̃au gami. Go nalakena tea wanogoe kuga tum̃amu lawo ki mu narae ni Yehovah, pae naworawora animu maga, go pae manu animu maga.

²⁰Go Samuel e piragi naworawora maga mamau puti ni Israel umai paki m̃aladigi, go naworawora ni Benyamin e pei tea vuatiluaana.

²¹Go e piragi naworawora ni Benyamin umai paki m̃aladigi pae namatarau adeada maga, go namatarau ni tea ni Matri eu pei tea vuatiluaana: go Saul natu ni Kish e pei tea vuatiluaana; ma ragi waina eu laaga asa, e mari sa pei tea vap̃aiana mau.

²²Nalakena tea wanogoe eu moro pusuusu paki Yehovah asa, po naga, Naatam̃oli sikai e ko puoli kite? Go Yehovah e pasadara, po naga, Kuga leo, e dum̃ana dasuru ki nia m̃aleoputo ni sara naleo.

²³Go eu sava pano po piragi a umai; go ragi waina e lawodu m̃aleoputo ni narei, napauna maga ero parau do liu naatam̃oli p̃ota maga.

²⁴Go Samuel e noa ki narei mamau, e naga, Ku punusi tea waina Yehovah e matadoa e kite? Tea takiusi a m̃aleoputo ni narei mamau e da doko mau. Go narei mamau eu darasa, po naga, Sup̃e p̃a mauti nawota.

²⁵Ragi wanogoe Samuel e noa ki narei napua ni natomariana ni namarakiana, go e midiri a tusi sikai, po doropusi a e doko narae ni Yehovah. Go Samuel e dip̃aki lua narei mamau puti eu pano, sara naata sikasikai paki nasum̃a adeada.

²⁶Go Saul e moro paki nasum̃a aneana Cibeah; nara ma taua ni naatam̃oli maga waina Sup̃e e kisidogo nap̃op̃oda, eu mamau.

²⁷Ma tea p̃arop̃aro maga seara eu naga, Naatam̃oli waia ega wo mauti gida dapale sava? Go eu midoakidao asa, po da maneana dape te navituaana sikai umai mau. Ma nae e punuta doko.