Read Nguna Togoa Etafe North 1 SAMUEL 11 Bible Online

1 SAMUEL 11 - Nguna Togoa Etafe North bible

1 SAMUEL 11

¹Go Nahash naatam̃oli sikai ni Ammon e sake umai, po m̃enakigoro Yabesh‐cilead: go naatam̃oli maga ni Yabesh eu noa ki Nahash, eu naga, P̃a mari navasasokiana sikai paki gami, go auga wo manigo suasua.

²Go Nahash naatam̃oli ni Ammon e noa ki da, e naga, Naleo sikai maau e doko waina ku pe mari a, a pe mari navasasokiana sikai paki mu, namatamu maga ni matua euga mamau p̃uti pei tea asiriluaana; go aga wo pitua ki nia ega vei tea waina Israel mamau eu pe vei tea dododaoana asa.

³Go tea matua maga ni Yabesh eu noa ki nia, eu naga, P̃a tua gami naaleatia larua, naga au mariatae dip̃aki lua tea tautauana maga pano paki kokoi maga mamau puti ni Israel: go naata waina ega mauti gami e pe tika, au pe wo paloti punusi ko.

⁴Go tea tautauana maga eu rumai paki Cibeah ki Saul, po pasa navasaana maga wanogoe nadaliga maga ni narei: go narei mamau eu sike nadaleoda po dagi.

⁵Go kuga leo, Saul e pae vanua umai, e dausi oks maga; go Saul e naga, Nasava e mari narei eu dagi? Go eu noa ki nia navasaana maga ki naatam̃oli maga ni Yabesh.

⁶Go Naata ni Sup̃e e puvua umai doko Saul ragi waina e dogo navasaana maga wanogoe, go namaetoana aneana e pavaga p̃arua.

⁷Go e puati oks ero dua po dae kotokotovi ra, po dip̃aki lua ra pano usuraki kokoi maga mamau puti ni Israel pae nam̃elearu ni tea tautauana maga, po naga, Naata waina e pe ta m̃elu umai dausi Saul go Samuel mau, ega vei tea mariana ega tapala nogoe paki oks aneana maga. Go namatauki‐Sup̃eana e dowo narei, go eu dave umai dapala naatam̃oli sikai maau.

⁸Go e peve saisai ki da Besek; go Israel natuna maga eu pei naatam̃oli manu p̃onotia dolu, go naatam̃oli maga ni Yudah eu pei tivilia dolu.

⁹Go eu noa ki tea tautauana maga waina eu rumai, eu naga, Kuga vasa dapala waia paki naatam̃oli maga ni Yabesh‐cilead, po naga, Matamai ragi waina elo ega susui, kuga veani namautipauriana. Go tea tautauana maga eu rumai po noakisai naatam̃oli maga ni Yabesh asa; go eu laelaea.

¹⁰Nalakena tea wanogoe naatam̃oli maga ni Yabesh eu naga, Matamai auga wo paloti punusi mu, go kuga mari paki gami ega tapala tea mamau puti waina ku midoaki nia naga e p̃ia.

¹¹Go e dapala nogoe matamai ki nia naga Saul e dap̃otawotae narei eu pei taua dolu; go eu rumai paki m̃aleoputo ni tokora ni nam̃enakiana ragi ni navavaigoroana ni malip̃ogi, po atugi tea ni Ammon maga pa pa paki aleati matua: go e pakilina naga tea maga waina eu ko mauri eu pei tea taperaverakiana, dapala waina naata sikai e mari sa moro sikoti naata sikai.

¹²Go narei eu noa ki Samuel, eu naga, Naatam̃oli sei waina e naga, Saul ega wo maramara dap̃au gida? P̃a viragi naatam̃oli maga wanogoe umai, naga tuga maripunue ra.

¹³Go Saul e naga, Te naata sikai ega wo da pei tea maripunueana naaleatia waia mau: nalakena masoso Yehovah e po mari namautipauriana Israel.

¹⁴Go Samuel e noa ki narei, e naga, Kuga umai, go tuga vaki Cilcal pano, po moro mari pau ki namarakiana tokora wanogoe.

¹⁵Go narei mamau eu pano puti paki Cilcal; go tokora wanogoe eu mari Saul e pei nawota narae ni Yehovah doko Cilcal; go eu mari naviriana maga ni navituaana maga ni natam̃ateana narae ni Yehovah; go tokora wanogoe Saul go naatam̃oli maga mamau puti ni Israel eu laelaea p̃arua asa.