Read Nguna Togoa Etafe North 1 SAMUEL 12 Bible Online

1 SAMUEL 12 - Nguna Togoa Etafe North bible

1 SAMUEL 12

¹Go Samuel e noa ki Israel mamau, e naga, Kuga leo, a po dogo parati ki nadaleomu ki sara navasaana waina ku noa ki nau asa, go a po manimu mari nawota sikai dap̃au mu.

²Go kuga leo, nawota wanogoe e do surata naraemu: go kinau a po pei tea matua po kapuara; go kuga leo, natugu naanoai maga ero sikoti mu doko: go a surata pea ki mu pae ragi ni navei‐natureai‐ana aginau pa pa paki naaleatia waia.

³Kinau nea: kuga noasokisoki dip̃a au narae ni Yehovah, go narae ni tea vuvuraikiana aneana: oks ki sei a po puati a? Kite ass ki sei a po puati a? A po mari dagele paki sei? Kite sei a po diesoki a? Kite a po dape namoriana sili sikai pae nam̃elearu ni sei naga namatagu ega kesa asa? Go aga wo pitua ki liliua ki nia paki mu.

⁴Go eu naga, Ku da mari dagele paki gami mau, kite diesoki gami, go ku da dape te navatuna pae nam̃elearu ni te naata mau.

⁵Go e noa ki da, e naga, Yehovah e pei tea noasokisoki dip̃a mu, go tea vuvuraikiana aneana naaleatia waia, naga ku da pap̃ai te navatuna doko nam̃elearugu mau. Go eu naga, Nae e pei tea noasokisoki.

⁶Go Samuel e noa ki narei, e naga, E pei Yehovah waina e dawona ki Moses go Aaron, go waina e piragi lua tamamu maga m̃elu dua ki navanua ni Ityipt umai.

⁷Nalakena tea wanogoe kuga tu dorogo, naga aga manimu mari navululuana narae ni Yehovah nalo ni namariana leana maga ki Yehovah, waina e manimu ma tamamu maga mari ra.

⁸Ragi waina Yakob e umai paki Ityipt, go tamamu maga eu pioso paki Yehovah, ragi wanogoe Yehovah e dip̃aki lua Moses go Aaron waina ero piragi lua tamamu maga m̃elu dua ki Ityipt umai, po mari ra eu doko tokora waia doko.

⁹Ma eu malio ki Yehovah Sup̃e adeada, go nae e sori ra paki nam̃elearu ni Sisera, tea maraki taua ni naatam̃oli navakalo ki Hasor, go paki nam̃elearu ni Filistine maga, go paki nam̃elearu ni nawota ni Moab, go eu mari navakalo dip̃a ra.

¹⁰Go eu pioso paki Yehovah, po naga, Au mari naleo sa, nalakena au doropusi Yehovah po magi Baal maga go Ashtaroth suasua: ma ragi waia p̃a vualua gami m̃elu dua ki nam̃elearu ni tea kokona ki gami maga, go auga wo manigo suasua.

¹¹Go Yehovah e dip̃aki lua Yerubbaal, go Bedan, go Yefthah, go Samuel, po pualua mu m̃elu dua ki nam̃elearu ni tea kokona ki mu maga daliviri, go ku doko p̃ia doko.

¹²Go ragi waina ku punusi naga Nahash, nawota ni Ammon natuna maga, e umai dip̃a mu, ku noa ki nau, ku naga, Ee, ma nawota sikai ega wo maramara dap̃au gami: ragi waina Yehovah Sup̃e animu e pei nawota animu.

¹³Nalakena tea wanogoe kuga leo, po punusi nawota waina nimu ku matadoa e, go waina ku datago asa: go kuga leo, Yehovah e po lawo ki nawota sikai dap̃au mu.

¹⁴Waina ku pe matau ki Yehovah po maneana suasua, po dogo parati ki nadaleona, po da mari p̃auluulu paki natip̃akiana ki Yehovah mau, go waina nimu ma nawota waina ega maramara dap̃au mu, ku pe rausi Yehovah Sup̃e animu, e pe wia:

¹⁵Ma waina ku pe ta dogo parati ki nadaleo ni Yehovah mau, go waina ku pe mari p̃auluulu paki natip̃akiana ki Yehovah, ragi wanogoe nam̃elearu ni Yehovah ega wo dip̃a mu, dakiusi waina e pea dip̃a tamamu maga.

¹⁶Nalakena tea wanogoe kuga tu dorogo po punusi naleo warua waia waina Yehovah ega wo mari a naraemu.

¹⁷Masoso e da pei naaleatia ni natagaukotoviana ni whiit kite? Aga wo pioso paki Yehovah naga ega tip̃aki lua tovae go usa umai; go kuga wo punusi po atae naga nasigisigileoana animu e p̃arua, waina ku mari a narae ni Yehovah, waina ku dum̃amu manimu datago nawota sikai.

¹⁸Nalakena tea wanogoe Samuel e pioso paki Yehovah; go naaleatia wanogoe Yehovah e dip̃aki lua tovae go usa umai: go narei mamau eu matau ki p̃arua ki Yehovah go Samuel.

¹⁹Go narei mamau eu noa ki Samuel, eu naga, P̃a magi tea suasua anigo maga dapasavasa paki Yehovah Sup̃e anigo, naga auga ta mate mau: nalakena au po sokari namarinaleosaana aginami maga mamau puti ki tea sa waia, waina au dum̃agami maginami datago nawota sikai.

²⁰Go Samuel e noa ki narei, e naga, Kuga ta mataku mau: lomau ku po mari tea sa mamau waia: ma kuga ta dawasi m̃elu dua ki narausi‐Yehovah‐ana mau, ma kuga magi Yehovah suasua ki nap̃op̃omu mamau;

²¹Go kuga ta dawasi mau: nalakena ku pe wo dausi naleo p̃alo maga waina eu marisa silae mu kite pualua mu mau, nalakena eu pei naleo p̃alo maga.

²²Go nalakena nagisana warua Yehovah ega wo da doropusi narei aneana mau: nalakena e pei tea midoaki‐m̃ata‐kiana ki Yehovah naga ega mari mu kuga vei narei aneana sikai.

²³Go ega madu uvea ki nau naga aga mari naleo sa paki Yehovah, waina a pe ta moro manimu dapasavasa mau: ma aga wo pasa pisei ki mu napua waina e p̃ia go e leana.

²⁴Ma kuga matau ki Yehovah, po maneana suasua lomau ki nap̃op̃omu mamau: go kuga midoakiusiusi tea warua maga waia waina e manimu mari ra.

²⁵Ma waina ku pe wo doko nasigisigileoana doko, go ku pe wo pei tea maripuolikiana, nimu ma nawota animu kuga mamau.