Read Nguna Togoa Etafe North 1 SAMUEL 13 Bible Online

1 SAMUEL 13 - Nguna Togoa Etafe North bible

1 SAMUEL 13

¹Saul e pei tea ni natau rualima dolu ragi waina e atulake po maramara dap̃au Israel; go e maramara natau ero dua.

²Go Saul e dum̃ana maneana matadoa naatam̃oli manu dolu ni Israel; go naatam̃oli manu dua kakada eu sikoti Saul doko Mikmash go doko tava ni Beth‐el, go naatam̃oli manu sikai kakada eu sikoti Yonathan doko Cibeah ni Benyamin: go namagovai ni naatam̃oli waina eu doko, e dip̃aki lua ra sara naata sikasikai paki tap̃aup̃au adeada.

³Go Yonathan e atugi naatam̃oli maga ni navakalo ni Filistine maga waina eu doko Ceba, go Filistine maga eu dogo e. Go Saul e sui paiga usuraki navanua mamau, po naga, Heberu maga euga rogo e.

⁴Go Israel mamau eu dogo naga Saul e atugi naatam̃oli maga ni navakalo ni Filistine maga, go naga Filistine maga eu mamarago ki Israel. Go narei eu pei tea viragi‐saisai‐kiana dausi Saul paki Cilcal.

⁵Go Filistine maga eu dum̃ada saisai ki da naga euga mari navakalo paki Israel, kariot adeada maga eu pei tivilia dolu, go naatam̃oli maga waina eu sakesaake horse eu pei manu latesa, go narei maga eu dapala naworaone waina e doko nadigi ni natasi nalo ni nalaapaana: go eu sake umai, po lawo ki tap̃aup̃au adeada maga Mikmash, taleva ni elo sake ni Beth‐aven.

⁶Ragi waina naatam̃oli maga ni Israel eu punusi naga eu doko nap̃alaasa sikai, (nalakena narei eu pei tea riesokiana), ragi wanogoe narei eu dum̃ada dasuru ki da doko valea maga, go doko namalasi wono, go doko vatu maga, go doko tokora ni navavaigoroana, go doko m̃oru maga.

⁷Go tea ni Heberu seara eu duagoto Yordan pano sua paki navanua ni Cad go Cilead; ma Saul nae e ko doko Cilcal doko, go narei mamau eu dausi a po duruuru pano.

⁸Go e doko tokora wanogoe doko naaleatia larua, dapala waina Samuel e datuta ki nia asa: ma Samuel e da umai paki Cilcal mau; go narei eu doropusi a po daperavera.

⁹Go Saul e naga, Kuga tape navituaana tap̃arakiana umai dua au asa, go navituaana maga ni natam̃ateana. Go e pitua ki navituaana tap̃arakiana wanogoe.

¹⁰Go e pakilina, ragi waina e po pitua ki sua navituaana tap̃arakiana, naga kuga leo, Samuel e pakilina; go Saul e dave pano po sua e, naga ega vasa dodomi a.

¹¹Go Samuel e naga, Ku po mari nasava? Go Saul e naga, A punusi naga narei eu doropusi au po daperavera, go naga nigo ku da umai mau ragi tatutakiana, go naga Filistine maga eu dum̃ada saisai ki da Mikmash;

¹²Go nalakena tea wanogoe a naga, Ragi waia Filistine maga euga wo siwo umai dip̃a au paki Cilcal, go a ko da datago nasaup̃iaana ki Yehovah mau: nalakena tea wanogoe a dum̃agu mari kasua ki nau, po pitua ki navituaana tap̃arakiana.

¹³Go Samuel e noa ki Saul, e naga, Ku po mari manumatavusa: ku da pavaigoro natip̃akiana ki Yehovah Sup̃e anigo mau waina e dip̃aki‐go asa: go nae e naga ega lawosoki namarakiana anigo doko Israel pa pa pa.

¹⁴Ma ragi waia namarakiana anigo ega wo da moro doko mau: Yehovah e dum̃ana laaga naatam̃oli sikai pataka ni nap̃op̃ona, go Yehovah e po dawona ki nia naga ega vei tea maraki dap̃au narei aneana, nalakena nigo ku da pavaigoro tea waina Yehovah e dip̃aki‐go asa.

¹⁵Go Samuel e duleana, po sake pae Cilcal pano paki Cibeah ni Benyamin. Go Saul e peve naatam̃oli maga waina eu sikoti doko, eu alagoro pei naatam̃oli p̃onotia latesa.

¹⁶Go Saul ma natuna Yonathan, go naatam̃oli maga waina eu sikoti ra doko, eu m̃enaki doko Ceba ni Benyamin: ma Filistine maga eu m̃enaki doko Mikmash.

¹⁷Go tea marisaki maga eu m̃elu dua ki tokora ni nam̃enakiana ki Filistine maga umai, eu pei taua dolu asa: go taua sikai e dawasi paki napua pae Ofrah, paki navanua ni Shual:

¹⁸Go taua kerua e dawasi pae napua waina e paki Beth‐horon: go taua ketolu e dawasi paki napua ni kokoi waina e leo siwo paki malo matemate ni Seboim paki masop̃alo.

¹⁹Go tea vei mataisau sikai ni airon e da doko navanua ni Israel mau: nalakena Filistine maga eu naga, Mase tea ni Heberu eu pe tum̃ada madeada mari lova go naio:

²⁰Ma tea ni Israel eu mamau puti pano punusi Filistine maga naga sara naata sikasikai ega vakali tea sisi natano aneana, go tea tovae natano aneana, go karau aneana, go tea tae natano aneana;

²¹Ma eu peani tea vavakali sikai raki tea tae natano, go raki tea tovae natano, go raki fork, go raki karau; go naga euga vakali tip̃a.

²²Go nalakena tea wanogoe e pakilina naaleatia ni navakalo naga te lova sikai kite te naio sikai e da doko nam̃elearu ni te sikai ni narei mau, waina eu sikoti Saul go Yonathan: ma eu doko nam̃elearu ni Saul go ni natuna Yonathan.

²³Go naatam̃oli maga ni navakalo ni Filistine maga eu dave pano paki nawosaia ni Mikmash.