Read Nguna Togoa Etafe North 1 SAMUEL 14 Bible Online

1 SAMUEL 14 - Nguna Togoa Etafe North bible

1 SAMUEL 14

¹Go e pakilina doko naaleatia sikai naga Yonathan, natu ni Saul, e noa ki natureai waina e do dape nalikau aneana maga, e naga, P̃a umai, toroga duagoto pano paki tap̃aup̃au ki naatam̃oli maga ni navakalo ni Filistine maga, waina eu doko taleva kerua. Ma e da noa ki tamana asa mau.

²Go Saul e doko namatap̃ago mau ni Cibeah doko melu ni nakau pomekranet waina e doko Mikron: go naatam̃oli maga waina eu sikoti a doko eu alagoro pei p̃onotia latesa;

³Go Ahiyah, natu ni Ahitub, tai ni Ikabod, natu ni Finehas, natu ni Eli, tea viri ki Yehovah doko Shiloh waina e pilake efod sikai. Go narei eu da atae mau naga Yonathan e pano sua.

⁴Go namawota ni napatira dua, doko nawosaia waina Yonathan e laaga naga ega vae asa pano paki tap̃aup̃au ki naatam̃oli maga ni navakalo ni Filistine maga, vatu sikai e doko taleva sikai, go vatu sikai e doko taleva kerua: go nagisa ni sikai e pei Boses, go nagisa ni kerua e pei Seneh.

⁵Napatira sikai e duleana taleva ni north kivea ni Mikmash, go kerua e duleana taleva ni sauth kivea ni Ceba.

⁶Go Yonathan e noa ki natureai waina e do dape nalikau aneana maga, e naga, P̃a umai go toroga tuagoto pano paki tap̃aup̃au ki tea maga wanogoe waina eu da pei tea tovadaviviana mau: e pe wo doko naga Yehovah ega wo manigida p̃osiwosi: nalakena Yehovah e da gona ki nalaapaana kite ki navisaana naga ega mauti ra.

⁷Go tea to dape nalikau aneana maga e noa ki nia, e naga, P̃a mari sara naleo waina e doko nap̃op̃om̃a: p̃a tum̃am̃a doa ko, p̃a leo, kinau a sikoti ko doko pataka ni nap̃op̃om̃a.

⁸Go Yonathan e naga, P̃a leo, toroga tuagoto pa punusi naatam̃oli maga wanogoe, po dokolina ki da.

⁹Waina eu pe noa ki gida, eu pe naga, Koroga tu dorogo pa pa auga va punusi mu; ragi wanogoe toroga wo du dorogo tokora waina toro doko asa, go toroga wo da sake pa punusi ra mau.

¹⁰Ma waina eu pe noa ki gida, eu pe naga, Koroga sake umai punusi gami; ragi wanogoe toroga wo sake pano: nalakena Yehovah e po pitua ki da paki nam̃elearugida: go tea wanogoe ega wo manigida pei navaivaiana.

¹¹Go ero dua pano po dokolina ki tap̃aup̃au ki naatam̃oli maga ni navakalo ni Filistine maga: go Filistine maga eu naga, Kuga leo, Heberu maga eu po dave umai m̃elu dua ki m̃oru maga waina eu dum̃ada dasuru ki da ara.

¹²Go naatam̃oli maga ni navakalo ni Filistine maga eu pasadara Yonathan go tea to dape nalikau aneana maga, po naga, Koroga sake umai punusi gami, go kinami auga wo pisei ki mu navatuna sikai. Go Yonathan e noa ki tea to dape nalikau aneana maga, e naga, P̃a sake umai dausi au: nalakena Yehovah e po pitua ki da paki nam̃elearu ni Israel.

¹³Go Yonathan e karokaaro sake ki naruna go natuana, go tea to dape nalikau aneana maga e dausi a: go eu dowo narae ni Yonathan; go tea to dape nalikau aneana maga e dausi a po atugi ra.

¹⁴Go nawokatiana vea wanogoe waina Yonathan go tea to dape nalikau aneana maga ero mari a, naatam̃oli eu alagoro pei rualima dua eu mate asa malo kiki sikai dakiusi namagovai ni eker ni natano.

¹⁵Go naruruuruana sikai e doko tokora ni nam̃enakiana, go e doko vanua, go e doko usuraki narei mamau; go naatam̃oli maga ni navakalo, go tea marisaki maga, nara ma eu duruuru: go natano e duruuru; go dapala nogoe naruruuruana warua liu e doko.

¹⁶Go tea vavaigoro maga ki Saul waina eu doko Cibeah ni Benyamin eu leo punusi a; go kuga leo, tea laapa eu sara pano, go eu daperavera paki sara tokora.

¹⁷Go Saul e noa ki narei waina eu sikoti a doko, e naga, Kuga veve parati ki naatam̃oli, po atae sei waina e dave m̃elu dua ki gida pano. Go ragi waina eu peve parati ki sua, go kuga leo, Yonathan go tea to dape nalikau aneana maga ero da doko.

¹⁸Go Saul e noa ki Ahiyah, e naga, P̃a viragi areka ki Sup̃e umai. Nalakena areka ki Sup̃e e sikoti Israel natuna maga doko ragi wanogoe.

¹⁹Go e pakilina, ragi waina Saul e ko do pasa paki tea viri, naga namarip̃araiana waina e doko tokora ni nam̃enakiana ki Filistine maga e do disu po p̃arua: go Saul e noa ki tea viri, e naga, Ega toko.

²⁰Go Saul go narei mamau waina eu sikoti a, eu dum̃ada saisai ki da, po umai paki navakalo: go kuga leo, lova ki sara naata e dip̃a tana, go navariana warua e doko.

²¹Go Heberu maga waina eu sikoti Filistine maga sala vea, go waina eu sikoti ra sake paki tokora ni nam̃enakiana pano; nara ma eu dum̃ada doa ra po puluti tea ni Israel waina eu sikoti Saul go Yonathan.

²²Go dapala nogoe naatam̃oli maga ni Israel waina eu dum̃ada dasuru ki da malo ni tava ni Efraim, ragi waina eu dogo naga Filistine maga eu sava pano, nara ma eu sava kasua dausi ra pano po mari navakalo.

²³Go dapala nogoe Yehovah e mauti Israel naaleatia wanogoe: go navakalo e duagoto pano paki Beth‐aven.

²⁴Go naatam̃oli maga ni Israel eu dogokitesa naaleatia wanogoe: ma Saul e mari narei eu pivisa, e naga, Naatam̃oli waina e pe kani navinaga pea ki ragi melu, pea ki waina aga mari nasikoana paki tea kokona ki nau maga, naatam̃oli wanogoe ega wo pei tea vasasakiana. Go te naata e da katidogo navinaga mau.

²⁵Go narei mamau eu rumai paki maala ni nakau; go tokora wanogoe honi e doko natano doko.

²⁶Go ragi waina narei eu rumai paki maala ni nakau, kuga leo, honi e duturu: ma te naata sikai e da sao ki nam̃elearuna paki nawokana mau; nalakena narei eu matau ki navivisaana wanogoe.

²⁷Ma Yonathan e da dogo e mau ragi waina tamana e pasa parati ki narei ki navivisaana wanogoe: nalakena tea wanogoe e sai ki tiko aneana waina e doko nam̃elearuna, po pupugi a nasum̃a ni honi, go e sai ki naruna paki nawokana; go namatana ero maramalaga.

²⁸Go naatam̃oli sikai e noa ki nia, e naga, Tamam̃a e pasa parati ki narei ki navivisaana sikai, e naga, Naatam̃oli waina ega wo gani navinaga naaleatia waia ega vei tea vasasakiana. Go narei eu dape soki navivisaana wanogoe.

²⁹Go Yonathan e naga, Tamagu e mari duletulea ki navanua: kuga vunusi, a pavara ni mu asa, namatagu ero maramalaga, nalakena a ganidogo malo kiki ni honi waia.

³⁰Go e p̃ia liu waina narei eu pe kani p̃arua ki tea tapepavakotoana ki tea kokona ki da maga masoso; nalakena tu punusi naga naatugiana e da p̃arua m̃aleoputo ni Filistine maga.

³¹Go naaleatia wanogoe eu atugi Filistine maga pae Mikmash pa pa liliu Aiyalon: go narei eu mawosa p̃arua.

³²Go narei eu m̃araverave pano po puati tea tape‐pavakotoana, po atugi shiip, go oks maga, go kau natuna maga natano; go narei eu gani ra pilake nada.

³³Go eu noakisai Saul asa, eu naga, P̃a leo, narei eu do mari naleo sa paki Yehovah, eu do ganikani pilake nada. Go nae e naga, Nimu ku mari malauweluki: kuga malulua ki vatu warua sikai umai punusi au naaleatia waia.

³⁴Go Saul e naga, Kuga tum̃amu daperavera ki mu usuraki narei, po noa ki da naga, Sara naatam̃oli euga vuati oks adeada umai punusi au, go shiip adeada, po mari punue ra tokora waia, po ganikani; go kuga ta ganikani pilake nada po mari naleo sa paki Yehovah asa mau. Go sara naatam̃oli sikasikai eu puati oks adeada umai p̃ogi wanogoe, po mari punue ra tokora wanogoe.

³⁵Go Saul e magi Yehovah davagi wede ni naviriana sikai waina e pei wede ni naviriana vea mau waina e magi Yehovah davagi a.

³⁶Go Saul e naga, Tuga siwo pano po kopasi Filistine maga p̃ogi, po mari sasa ki da pa pa ega aleati, go tuga ta doropusi te naata sikai kakada ega mauri doko mau. Go eu naga, P̃a mari tea waina ku midoaki nia naga e p̃ia. Go tea viri e naga, Kuga umai, tuga vaki m̃aladigi ki Sup̃e.

³⁷Go Saul e pusuusu paki Sup̃e, e naga, Kinau aga wo siwo pano po kopasi Filistine maga kite? P̃a wo pitua ki da paki nam̃elearu ni Israel kite? Ma e da pasadara e mau naaleatia wanogoe.

³⁸Go Saul e naga, Kuga umai paki m̃aladigi, nimu tea maraki maga mamau puti ki narei: kuga vunusi po atae te navatuna waina e pei namarinaleosaana doko naaleatia waia.

³⁹Yehovah e mauri doko waina e mauti Israel, ma e pe toko natugu Yonathan, nae e pe wo mate lomau. Ma te naata sikai ni narei mamau e da pasadara e mau.

⁴⁰Go e noa ki Israel mamau, e naga, Nimu kuga toko taleva sikai, go kinau ma natugu Yonathan aroga wo doko taleva kerua. Go narei eu noa ki Saul, eu naga, P̃a mari tea waina ku midoaki nia naga e p̃ia.

⁴¹Nalakena tea wanogoe Saul e noa ki Yehovah, Sup̃e ni Israel, e naga, P̃a visei ki tea waina e leana. Go gole e nadi Yonathan go Saul: ma narei eu doko.

⁴²Go Saul e naga, Kuga nadi ki gole namawota kakagu go natugu Yonathan. Go gole e nadi Yonathan.

⁴³Go Saul e noa ki Yonathan, e naga, P̃a noa ki nau ki tea waina ku po mari a. Go Yonathan e noa ki nia asa, e naga, Kinau a ganidogo honi kiki, ki namatap̃ago ni tiko waina e doko nam̃elearugu; go p̃a leo, e one au one naga aga wo mate.

⁴⁴Go Saul e naga, Sup̃e ega mari tea wanogoe, po moro sokari a: nalakena lomau p̃a wo mate Yonathan.

⁴⁵Go narei eu noa ki Saul, eu naga, Yonathan ega wo mate kite? Nae waina e pei nalakena namautiana warua waia waina e doko Israel? Ega madu uvea ki gida: Yehovah e mauri, go napati ni nalolu ni nap̃au ni Yonathan sikai ega wo da dowo paki natano mau; nalakena masoso Sup̃e e silae a go e marimatua. Go narei eu mauti Yonathan, go e da mate mau.

⁴⁶Go Saul e doropusi Filistine maga po sake pano, go Filistine maga eu paki tokora adeada pano.

⁴⁷Ragi waina Saul e peani naveinawotaana dap̃au Israel, e mari navakalo dip̃a tea kokona ki nia maga mamau puti daliviri, dip̃a Moab, go dip̃a Ammon natuna maga, go dip̃a Edom, go dip̃a nawota maga ni Sobah, go dip̃a Filistine maga: go sara tokora waina e paki asa, e marimatua ki da.

⁴⁸Go e marimatua, po atugi tea ni Amalek, po pualua Israel m̃elu dua ki nam̃elearu ni tea maga waina eu mari sa ki da.

⁴⁹Go Saul natuna naanoai maga eu pei Yonathan, go Ishvi, go Malki‐shua: go nagisa ni natuna nagoroi maga ero pei tea waia; nagisa ni takalapa Merab, go nagisa ni takariki Mikal:

⁵⁰Go nagisa ni nagoroi ki Saul e pei Ahinoam, natu ni Ahimaas: go nagisa ni tea maraki ki taua aneana e pei Abner, natu ni Ner, Saul aloana.

⁵¹Go Kish e pei tama ni Saul; go Ner, tama ni Abner, e pei natu ni Abiel.

⁵²Go navakalo warua liu e doko dip̃a Filistine maga naaleatia maga mamau puti ki Saul: go ragi waina Saul e punusi te naatam̃oli kasua sikai, kite te naatam̃oli waina e pei m̃aau, e dum̃ana maneana piragi lua e.