Read Nguna Togoa Etafe North 1 SAMUEL 15 Bible Online

1 SAMUEL 15 - Nguna Togoa Etafe North bible

1 SAMUEL 15

¹Go Samuel e noa ki Saul, e naga, Yehovah e dip̃aki lua au umai naga aga vuvurai ki‐go naga p̃a wo pei nawota dap̃au narei aneana, dap̃au Israel: nalakena tea wanogoe p̃a takidorogo paki nadaleo ni navasaana maga ki Yehovah.

²Yehovah ki taua maga e noa dapala nea, e naga, A po midoaki parati ki tea waina Amalek e mari a paki Israel, takana waina e dum̃ana lawo ki nia dip̃a e napua, ragi waina e sake m̃elu dua ki Ityipt umai.

³Go tea wanogoe, p̃a vano po atugi Amalek, po mari sasa ki puti sara naleo adeada po da mari malemale ra mau; ma p̃a maripunue naanoai go nagoroi, piakiki go tea susu, oks go shiip, kamel go ass.

⁴Go Saul e soso saisai ki narei po peve ra Telaim, eu pei naatam̃oli manu p̃onotia dua waina eu surata ki natuada, go naatam̃oli maga ni Yudah tivilia sikai.

⁵Go Saul e umai paki natokoana ni Amalek, po kusugoro doko nap̃aloa.

⁶Go Saul e noa ki tea ni Kain, e naga, Kuga vano, kuga siwo m̃elu dua ki tea ni Amalek pano, mase a pe mari sa ki puti mu ragi sikai maau, nara ma nimu: nalakena nimu ku pisei ki nadodomiana animu paki Israel natuna maga ragi waina eu sake m̃elu dua ki Ityipt umai. Go tea wanogoe tea ni Kain eu m̃elu dua ki tea ni Amalek pano.

⁷Go Saul e atugi tea ni Amalek pae Havilah pano pae napua paki Shur, waina e doko kivea ni Ityipt.

⁸Go e puati pulemauri ki Akak, nawota ni tea ni Amalek, po mari sasa ki narei mamau puti ki nawoka ni lova.

⁹Ma Saul go narei maga eu mauti Akak, go tea wia liu maga ni shiip, go ni oks maga, go ni tea m̃anopunopu maga, go ni shiip natuna maga, go sara naleo waina e p̃ia, go eu da masau mari sa ki puti ra mau: ma sara naleo waina eu sa mau sa, go waina eu midoaki sa ki da, tea maga wanogoe eu mari sasa ki puti ra.

¹⁰Go ragi wanogoe navasaana ki Yehovah e umai paki Samuel, e naga,

¹¹Kinau a dum̃agu midoakipiri naga a sike Saul naga ega vei nawota: nalakena e maradoa liliu pa dua ki narausi‐au‐ana, go e da mari natip̃akiana aginau maga mau. Go Samuel e dogokitesa; go e pioso paki Yehovah p̃ogi mamau.

¹²Go Samuel e duleana malip̃ogi loaloa naga ega sua Saul; go e pei tea noaana paki Samuel, eu naga, Saul e umai paki Karmel, go p̃a leo, e dum̃ana maneana sike namidoakiparati‐kiana sikai, go e moro surata po siwo paki Cilcal pano.

¹³Go Samuel e umai punusi Saul: go Saul e noa ki nia, e naga, P̃a vei tea vasam̃atakiana ki Yehovah: kinau a po mari sua natip̃akiana ki Yehovah.

¹⁴Go Samuel e naga, Ma nakaiana ni shiip waina a dogo e, e pei nasava, go namuaana ni oks waina a dogo e?

¹⁵Go Saul e naga, Eu po puati ra pae tea ni Amalek maga: nalakena narei eu mauti tea wia liu ni shiip go ni oks maga, naga euga vitua ki da euga vei naviriana paki Yehovah Sup̃e anigo; go namagovai kerua waina e doko, au po mari sasa ki puti ra.

¹⁶Go Samuel e noa ki Saul, e naga, P̃a vunuta, go aga wo noa ki‐go tea waina Yehovah e po noa ki nau asa p̃ogi waia. Go e noa ki nia, e naga, P̃a noa e.

¹⁷Go Samuel e naga, Ku dum̃am̃a midoaki nia naga ku pei tea kiki, ma ku da pei tea mariana ku pei nap̃au ni naworawora maga ni Israel mau kite? Go Yehovah e puvurai ki‐go ku pei nawota dap̃au Israel;

¹⁸Go Yehovah e dip̃aki lua ko pano nasurataana sikai, po naga, P̃a vano, po mari sasa ki puti tea marinaleosa maga, tea ni Amalek, po do atugi ra pa pa euga mavunuvunu.

¹⁹Go tea wanogoe nasava e pei nalakena ku da dogo parati ki nadaleo ni Yehovah mau, ma ku m̃araverave pano po puati tea tapepavakotoana wanogoe, po mari tea waina e sa narae ni Yehovah?

²⁰Go Saul e noa ki Samuel, e naga, Io, kinau a po dogo parati ki nadaleo ni Yehovah, go a po surata napua waina Yehovah e dip̃aki lua au naga aga vae asa, go a po puati Akak nawota ni Amalek, po mari sasa ki puti tea ni Amalek maga.

²¹Ma narei eu puati te seara ni tea tapepavakotoana, shiip go oks, tea wia liu kakada ni naleo tapu maga naga euga mari naviriana paki Yehovah Sup̃e anigo Cilcal.

²²Go Samuel e naga, Yehovah e maro p̃arua ki navituaana tap̃arakiana go naviriana, dakiusi waina e maro p̃arua ki narogoparatikiana ki nadaleo ni Yehovah kite? P̃a leo, narogoparatikiana e p̃ia do liu naviriana, go natakidorogoana e p̃ia do liu nap̃eletia ni shiip anoai maga.

²³Nalakena namarip̃auluuluana e dakiusi namarinaleosaana ni nawosidoaana, go navei‐p̃au‐kasuaana e dakiusi nasigisigileoana go na‐lotu‐ki‐nasup̃e‐ana. Nalakena nigo ku po dip̃adoa navasaana ki Yehovah, nae ma e po dip̃adoa ko naga p̃a ta pei nawota mau.

²⁴Go Saul e noa ki Samuel, e naga, Kinau a po mari naleo sa: nalakena a po dapiri natip̃akiana ki Yehovah, go navasaana anigo maga: nalakena a matau ki narei po dogo parati ki nadaleoda.

²⁵Go nalakena tea wanogoe, a pavara ni ko asa, p̃a midoakikorokoro namarinaleosaana aginau, po sikoti au liliu naga aga lotu ki Yehovah.

²⁶Go Samuel e noa ki Saul, e naga, Aga wo da sikoti ko liliu mau: nalakena nigo ku po dip̃adoa navasaana ki Yehovah, go Yehovah e dip̃adoa ko naga p̃a ta pei nawota dap̃au Israel mau.

²⁷Go ragi waina Samuel e dum̃ana doa e naga ega m̃elu pano, Saul e puasoki sugoro kovagoro aneana, go e mawora.

²⁸Go Samuel e noa ki nia, e naga, Yehovah e po puap̃orae namarakiana ni Israel e makoto ki‐go naaleatia waia, go e po dua tea ni m̃aladigi ki‐go asa, waina e p̃ia liu ko.

²⁹Go Nakasuaana ni Israel ega wo da sorosoro kite midoakipiri mau: nalakena nae e da pei naatam̃oli mau naga ega midoakipiri.

³⁰Go Saul e naga, A po mari naleo sa: ma p̃a dodomadagani au ragi waia, a pavara ni ko asa, narae ni tea matua maga ni narei aginau, go narae ni Israel, go p̃a sikoti au liliu naga aga lotu ki Yehovah Sup̃e anigo.

³¹Go Samuel e dum̃ana doa e dausi Saul; go Saul e lotu ki Yehovah.

³²Go Samuel e naga, P̃a viragi Akak, nawota ni tea ni Amalek, umai punusi au. Go Akak e matemate umai punusi a. Go Akak e naga, Nakokonaana ni namateana e alagoro nopu.

³³Go Samuel e naga, Dapala waina lova anigo e mari nagoroi eu dika ki piakiki, dapala nogoe p̃ilam̃a ega wo dika ki piakiki m̃aleoputo ni nagoroi maga. Go Samuel e daekotokotovi Akak narae ni Yehovah Cilcal.

³⁴Go Samuel e paki Ramah pano; go Saul e sake paki nasum̃a aneana pano paki Cibeah ni Saul.

³⁵Go Samuel e da moro umai punusi Saul te ragi mau, pa pa paki naaleatia ni namateana aneana; ma Samuel e dagisi Saul: go Yehovah e midoakipiri naga e po mari Saul e pei nawota dap̃au Israel.