Read Nguna Togoa Etafe North 1 SAMUEL 16 Bible Online

1 SAMUEL 16 - Nguna Togoa Etafe North bible

1 SAMUEL 16

¹Go Yehovah e noa ki Samuel, e naga, P̃a wo dagisi Saul pa pa paki seve ragi, waina a po dip̃adoa e naga ega ta moro pei nawota dap̃au Israel? P̃a vakavuro napati anigo ki naroro, go p̃a vano, aga wo dip̃aki lua ko pa punusi Yesse, naatam̃oli sikai ni Bethlehem: nalakena a po dum̃agu maginau matadoa natuna naanoai sikai naga ega vei nawota.

²Go Samuel e naga, Aga wo pano dapale sava? Waina Saul e pe wo dogo e, go e pe wo maripunue au. Go Yehovah e naga, P̃a vuati kau natu nagoroi sikai sikoti ko pano, go p̃a naga, A po umai naga aga magi Yehovah mari naviriana.

³Go p̃a soso Yesse umai punusi naviriana wanogoe, go aga wo pisei ki‐go tea waina p̃a wo mari a: go p̃a wo maginau puvurai ki tea waina aga wo noa ki sai ko ki nagisana.

⁴Go Samuel e mari tea waina Yehovah e noa e, go e umai pakilina Bethlehem. Go tea matua maga ni natokoana eu rumai po sua e, eu duruuru, go eu naga, Nigo ku matemate umai kite?

⁵Go e naga, A matemate umai: Aga wo magi Yehovah mari naviriana: kuga tum̃amu mari mu kuga tautau, go kuga sikoti au umai paki naviriana. Go e dapugoro Yesse go natuna maga, po soso ra umai paki naviriana.

⁶Go e pakilina, ragi waina eu rumai sua, naga e leo punusi Eliab, go e naga, Alagoro tea waina Yehovah e puvurai ki nia e doko naraena.

⁷Ma Yehovah e noa ki Samuel, e naga, P̃a ta leo punusi naraena, kite navarauana aneana mau; nalakena a po dip̃adoa e: Yehovah e da do leo punusi dapala naatam̃oli e do leo punusi; nalakena naatam̃oli e do leo punusi natakuna, ma Yehovah e do leo punusi nap̃op̃ona.

⁸Go Yesse e soso Abinadab umai, po mari a e surata narae ni Samuel. Go e naga, Nae ma Yehovah e da matadoa e mau.

⁹Go Yesse e mari Shammah naga ega umai doko narae ni Samuel. Go e naga, Nae ma Yehovah e da matadoa e mau.

¹⁰Go Yesse e mari natuna naanoai larua eu surata narae ni Samuel. Go Samuel e noa ki Yesse, e naga, Tea maga waia Yehovah e da matadoa ra mau.

¹¹Go Samuel e noa ki Yesse, e naga, Natum̃a maga mamau puti eu doko nea kite? Go e naga, Tea takariki e madoko, go p̃a leo, nae e do pavaigoro shiip maga. Go Samuel e noa ki Yesse, e naga, P̃a tip̃aki lua naata sikai ega vano po piragi a umai: nalakena tuga wo da dasake mau pa pa nae ega wo umai paki nea.

¹²Go e dip̃aki lua naata sikai pano, po piragi lua e umai. Go nae e pei raewia liu, namatana ero p̃ia pa, go e pei tea leom̃atakiana. Go Yehovah e naga, P̃a tuleana, p̃a vuvurai ki nia: nalakena tea waia e pei nae.

¹³Go Samuel e dape napati ni naroro, po puvurai ki nia m̃aleoputo ni taina maga: go Naata ni Yehovah e puvua umai doko David naaleatia wanogoe go sara naaleatia pa pa pa. Go Samuel e duleana, po paki Ramah pano.

¹⁴Ma Naata ni Yehovah e m̃elu dua ki Saul pano, go naatana sa sikai waina e pae Yehovah umai, e mari a e mataku.

¹⁵Go tea suasua maga ki Saul eu noa ki nia, eu naga, P̃a leo, naatana sa sikai e pae Sup̃e umai, po mari ko ku dogokitesa.

¹⁶Nawota aginami ega tip̃aki lua tea suasua anigo maga waina eu doko naraem̃a, naga euga laaga naatam̃oli sikai waina e manumatua p̃okati harp: go ega wo pakilina, ragi waina naatana sa pae Sup̃e ega toko ako, naga nae ega wo p̃okati ki nam̃elearuna, go p̃a wo dogo kite p̃ia.

¹⁷Go Saul e noa ki tea suasua aneana maga, e naga, Kuga maginau pap̃ai naatam̃oli sikai waina e mariatae p̃okati m̃ata ki, go kuga viragi a umai punusi au.

¹⁸Go natureai sikai e pasadara, po naga, P̃a leo, Kinau a punusi Yesse, tea ni Bethlehem, natuna naanoai sikai, waina e manumatua p̃okati m̃ata ki, go e pei m̃aau, go e pei naatam̃oli ni navakalo, go tea manumatua navasaana, go naatam̃oli leom̃atakiana, go Yehovah e sikoti a doko.

¹⁹Go tea wanogoe Saul e dip̃aki lua tea tautauana maga pa punusi Yesse, po naga, P̃a tip̃aki lua natum̃a David umai punusi au, nae waina e do leo parati ki shiip.

²⁰Go Yesse e puati ass sikai waina e dapetape bred, go nawili ni waine sikai, go naninani natuna sikai, po dip̃aki lua ra pae nam̃elearu ni natuna David naga ega tua Saul ara.

²¹Go David e umai punusi Saul, po lawodu naraena: go e dodomi p̃arua ki nia; go e po pei tea to dape nalikau aneana maga.

²²Go Saul e dip̃aki lua navasaana pano punusi Yesse, e naga, P̃a suasua, a pavara ni ko asa, naga David ega lawodu naraegu; nalakena a po midoaki m̃ata ki nia.

²³Go e pakilina, ragi waina naatana sa wanogoe pae Sup̃e umai e doko Saul, naga David e puati harp, po p̃okati a ki nam̃elearuna: go dapala nogoe Saul e dogo masalesale, po dogo kite p̃ia, go naatana sa wanogoe e pa dua ki nia.