Read Nguna Togoa Etafe North 1 SAMUEL 17 Bible Online

1 SAMUEL 17 - Nguna Togoa Etafe North bible

1 SAMUEL 17

¹Go Filistine maga eu piragi saisai ki naatam̃oli adeada maga ni navakalo naga euga mari navakalo, go eu pei tea viragi‐saisai‐kiana doko Sokoh, waina e pei agi Yudah, go eu sike tap̃aup̃au adeada maga namawota ni Sokoh go ni Asekah, doko navanua ni Efes‐dammim.

²Go Saul go naatam̃oli maga ni Israel eu mamau pei tea viragi‐saisai‐kiana, go eu sike tap̃aup̃au adeada maga nadigi ni nap̃aloa ni Elah, po dum̃ada lawo ki m̃ata ki da naga euga mari dip̃a Filistine maga.

³Go Filistine maga eu lawodu tava taleva sikai, go Israel eu lawodu tava taleva kerua: go nap̃aloa sikai e doko namawota kakada.

⁴Go m̃aau sikai e dave m̃elu dua ki tokora ni nam̃enakiana ki Filistine maga, nagisana Coliath, tea ni Cath, navarauana aneana e pei kubit latesa go namagovai.

⁵Go e suni kalup̃au ni brass e doko nap̃auna, go e suni kokororum̃a; go narowogiana ni kokororum̃a wanogoe e pei shekel ni brass manu lima.

⁶Go e peani nakokoro ni brass doko nam̃adurae natuana, go e ova naio vuru ni brass e doko namawota napauna.

⁷Go natura ni naio aneana e dakiusi nakau waina eu do pausi nakulukulu asa; go narowogiana ni navinaga ni naio aneana e pei shekel ni airon p̃onotia latesa: go tea to dape nakokoro aneana e pea ki nia pano.

⁸Go e lawodu po pioso paki naatam̃oli maga ni navakalo ni Israel, po noa ki da, e naga, Ekasana ku dave umai naga kuga tum̃amu lawo ki mu raki navakalo? Kinau a da pei naatam̃oli ni Filistine kite, go nimu ku da pei tea suasua maga ki Saul kite? Kuga tum̃amu manimu matadoa naatam̃oli sikai, go nae ega siwo umai punusi au.

⁹Waina e pe mariatae mari au, po atugi au, ragi wanogoe kinami auga wo pei tea suasua animu maga: ma waina kinau e pe marimatua ki nia, po maripunue a, ragi wanogoe nimu kuga wo pei tea suasua po maginami suasua.

¹⁰Go naatam̃oli ni Filistine wanogoe e naga, Kinau a midoakipiri taua maga ni navakalo ni Israel naaleatia waia; kuga tua au naatam̃oli sikai, naga aroga tum̃agami mari gami.

¹¹Go ragi waina Saul go Israel mamau eu dogo navasaana maga ki Filistine wanogoe, eu m̃anaunau go eu mataku p̃arua.

¹²Go David e pei natu ni tea ni Efrath ni Bethlehem‐yudah, nagisana Yesse; go e peani natu naanoai eu latolu: go e pei tea matua ragi ni naaleatia maga ki Saul, e peani natau eu laapa.

¹³Go Yesse natuna naanoai takavea dolu eu pano sua dausi Saul paki navakalo: go nagisa ni natuna dolu wanogoe waina eu paki navakalo, eu pei Eliab tea takalapa, go tea takarausi a Abinadab, go ketolu Shammah.

¹⁴Go David e pei tea takariki: go tea takavea dolu nara eu dausi Saul.

¹⁵Go David e do surata papiliu m̃elu dua ki Saul paki Bethlehem, naga ega vagani shiip ki tamana.

¹⁶Go Filistine wanogoe e disu paki m̃aladigi po dokolina malip̃ogi go ragi melu naaleatia rualima pati.

¹⁷Go Yesse e noa ki natuna David, e naga, P̃a magi taim̃a maga dape efah sikai ni korn veniana waia, go bred rualima sikai waia, go p̃a m̃araverave dape ra pano paki tokora ni nam̃enakiana punusi taim̃a maga;

¹⁸Go p̃a magi tea maraki ni manu adeada dape tsis rualima sikai waia pano dua e ara, go p̃a vunusi taim̃a maga eu p̃ia doko kite, go p̃a tape nanadisokiana adeada sikai umai paki nau.

¹⁹Go Saul go nara ma naatam̃oli maga ni Israel eu mamau puti doko nap̃aloa ni Elah, po do mari navakalo paki Filistine maga.

²⁰Go David e duleana malip̃ogi loaloa, po doropusi shiip eu doko sikoti tea leoparatiki sikai, go e dape navinaga wanogoe po pano, dapala waina Yesse e dip̃aki nia asa; go e umai paki tokora waina eu sike tap̃aup̃au maga asa, ragi sikai maau waina taua waina eu do dave pano paki navakalo eu darasa raki navivimariana.

²¹Go Israel go Filistine maga eu dum̃ada lawo ki m̃ata ki da raki navakalo, taua dip̃a taua.

²²Go David e doropusi naloriki aneana maga eu doko nam̃elearu ni tea leoparatiki naloriki, po sava paraki taua ni navakalo wanogoe po pasa dodomi taina maga.

²³Go ragi waina e ko do pasa paki da, kuga leo, m̃aau sikai e sake umai, Filistine ni Cath wanogoe, nagisana Coliath, m̃elu dua ki ovara maga ni Filistine, go e pasa navasaana sikai maau wanogoe waina e pea pasa asa: go David e dogo e.

²⁴Go naatam̃oli maga ni Israel, ragi waina eu punusi naatam̃oli wanogoe, eu mamau puti sava dua ki nia pano, eu mataku p̃arua.

²⁵Go naatam̃oli maga ni Israel eu naga, Nimu ku punusi naatam̃oli waia waina e sake umai kite? E po sake umai lomau naga ega mari dip̃a Israel: go ega wo doko, naga naata waina e pe wo maripunue a, naata wanogoe nawota ega wo dua e nasogolapaana warua, go ega wo dua e natuna nagoroi, go ega wo mari tea ni nasum̃a ki tamana euga vei tea veresi‐m̃oli‐kiana doko Israel.

²⁶Go David e pasa paki naatam̃oli maga waina eu lawodu pisari a, po naga, Nasava ega wo pei tea mariana paki naatam̃oli waina e pe wo maripunue Filistine waia, po mari lua navasapinoakiana m̃elu dua ki Israel? Nalakena Filistine waia waina e da pei tea tovadaviviana mau, nae e pei sei naga ega mari dip̃a taua maga ni navakalo, tea ki Sup̃e mauri?

²⁷Go narei eu pasadara dapala nea, eu naga, Ega wo pei tea mariana dapala nogoe paki naatam̃oli waina e pe wo maripunue a.

²⁸Go taina takalapa Eliab, e dogo e ragi waina e pasa paki naatam̃oli maga; go namaetoana ki Eliab e pavaga dip̃a David, go e naga, Nalakena nasava nigo ku siwo umai? Go ku doropusi sei e leo parati ki shiip visa maau wanogoe masop̃alo? Kinau a atae nap̃op̃ovakilagiana anigo, go nasigisigileoana ni nap̃op̃om̃a; nigo ku siwo umai naga p̃a vunusi navakalo.

²⁹Go David e naga, A po mari nasava ragi waia? Nalakena sikai e da doko mau kite?

³⁰Go e dum̃ana doa e pa dua ki nia paki tea p̃ota, po moro pasa navasaana waina e pea pasa asa: go narei eu moro pasadara e dapala sala vea.

³¹Go ragi waina eu dogo navasaana maga waina David e pasa ara, eu dogorogo ki da narae ni Saul; go Saul e dip̃aki lua paraki nia umai.

³²Go David e noa ki Saul, e naga, Nap̃op̃o ni te naata ega ta manainai mau nalakena nae; tea suasua anigo ega wo pano po mari dip̃a Filistine wanogoe.

³³Go Saul e noa ki David, e naga, Nigo ku da pataka naga p̃a vano po mari dip̃a Filistine wanogoe mau: nalakena nigo ku po pei natureai doko, go nae e pei naatam̃oli navakalo pae ragi waina e pei natureai pa pa paki ragi waia.

³⁴Go David e noa ki Saul, e naga, Tea suasua anigo e leo parati ki shiip ki tamana; go ragi waina laion e umai, kite bear, po ova lua shiip natuna sikai m̃elu navata,

³⁵Kinau a sava dausi a pano po atugi a, po pualua e m̃elu dua ki nawokana: go ragi waina e paraki nau, a puasoki nalolu ni nasina, po atugi a, po maripunue a.

³⁶Tea suasua anigo e p̃okati laion maga go bear maga; go Filistine waia waina e da pei tea tovadaviviana mau, ega wo pei sikai kakada, nalakena e mari saudoa ki taua naatam̃oli maga ni navakalo ki Sup̃e mauri.

³⁷Go David e naga, Yehovah waina e pualua au m̃elu dua ki nakini ni laion, go m̃elu dua ki nakini ni bear, ega wo pualua au m̃elu dua ki nam̃elearu ni Filistine waia. Go Saul e noa ki David, e naga, P̃a vano, go Yehovah ega wo sikoti ko.

³⁸Go Saul e sugoro David ki tea suniana aneana, go e doropusi kalup̃au ni brass e doko nap̃auna, go e sugoro e ki kokororum̃a.

³⁹Go David e dasoki lova doko tea suniana aneana go e maridogo surata pano; ma e ko da pea maridogo e mau. Go David e noa ki Saul, e naga, A marisa surata pilake tea maga waia; nalakena a ko da pea maridogo ra mau. Go David e sawolua ra.

⁴⁰Go e puati tiko aneana e doko nam̃elearuna, go e matadoa vatu m̃om̃oa eu lima pae nap̃ap̃a noaisara, po pai ra nala ki tea leoparatiki shiip waina e peani a, e pei nala kiki; go slig aneana e doko nam̃elearuna: go e disu paki m̃aladigi ki Filistine wanogoe.

⁴¹Go Filistine wanogoe e surata umai disu paki m̃aladigi ki David; go naata waina e do dape nakokoro e surata pea ki nia.

⁴²Go ragi waina Filistine wanogoe e leo pilialia po punusi David, e midoaki p̃alo ki nia: nalakena e ko pei natureai doko, e pei raewia, go e pei tea leom̃atakiana.

⁴³Go Filistine wanogoe e noa ki David, e naga, Kinau a pei koria sikai kite, naga ku umai sua au pilake tiko? Go Filistine wanogoe e pasa sa ki David pae nagisa ni sup̃e aneana maga.

⁴⁴Go Filistine wanogoe e noa ki David, e naga, P̃a umai punusi au, go aga wo dua manu maga ni namalopa, go nalo tuavati maga ni namalasi, ki nap̃okasim̃a.

⁴⁵Go David e noa ki Filistine wanogoe, e naga, Nigo ku umai sua au ki lova, go ki naio, go ki naio vuru: ma kinau a umai sua ko pae nagisa ni Yehovah ki taua maga, Sup̃e ki taua maga ni navakalo ni Israel, waina ku pasapinoa ki nia.

⁴⁶Naaleatia waia Yehovah ega wo pitua ki‐go paki nam̃elearugu; go aga wo atugi ko, po daekotovi nap̃aum̃a; go naaleatia waia aga wo pitua ki nap̃atoko mate ni taua ki Filistine maga paki manu maga ni namalopa, go nalo mila maga ni navanua; naga narei mamau puti ni maramana euga atae naga Sup̃e sikai e doko Israel:

⁴⁷Go naga nasaisaiana mamau waia euga atae naga Yehovah e da do mauti ki lova go ki naio mau: nalakena navakalo e pei agi Yehovah, go nae ega wo pitua ki mu paki nam̃elearugami.

⁴⁸Go e pakilina, ragi waina Filistine wanogoe e duleana, po umai paki m̃aladigi naga ega sua David, naga David e mari m̃araverave, po sava paki taua ni navakalo naga ega sua Filistine wanogoe.

⁴⁹Go David e sai ki nam̃elearuna paki nala aneana, po dape lua vatu sikai pae asa, po pulua ki nia, po nadi navare ni Filistine wanogoe; go vatu wanogoe e musu navarena, go e dowo dap̃olosiwo paki natano.

⁵⁰Go dapala nogoe David e marimatua ki Filistine wanogoe ki slig, go ki vatu sikai, po atugi Filistine wanogoe, po maripunue a; ma te lova e da doko nam̃elearu ni David mau.

⁵¹Go David e sava po pasoki Filistine wanogoe, go e puati lova aneana, po sai lua e m̃elu nala kakana, po maripunue a, po daekotovi nap̃auna asa. Go ragi waina Filistine maga eu punusi naga m̃aau adeada e mate, nara eu sava pano.

⁵²Go naatam̃oli maga ni Israel go ni Yudah eu duleana, po darasa, po kopa usi Filistine maga pa pa paki Cath, go pa pa paki namata‐pua maga ni Ekron. Go tea atugiana maga ni Filistine eu dowo pae napua paki Shaaraim, go pa pa paki Cath, go paki Ekron.

⁵³Go Israel natuna maga eu kopasi lua Filistine maga po moro liliu umai, go eu mari sasa ki tokora ni nam̃enakiana adeada.

⁵⁴Go David e dape nap̃au ni Filistine wanogoe, po piragi a paki Yerusalem pano; ma nalikau aneana maga ni navakalo e doropusi ra eu doko tap̃aup̃au aneana.

⁵⁵Go ragi waina Saul e punusi naga David e dave pano dip̃a Filistine wanogoe, e noa ki Abner, tea maraki ni taua, e naga, Abner, natureai wanogoe e pei natu ni sei? Go Abner e naga, Naatam̃a e mauri doko, nawota O, ma a marisa noa e.

⁵⁶Go nawota e naga, P̃a vusuusu parati ki, natureai wanogoe e pei natu ni sei.

⁵⁷Go ragi waina David e liliu umai edaku ki waina e maripunue Filistine wanogoe, Abner e puati a, po piragi a umai paki narae ni Saul, nap̃au ni Filistine wanogoe e doko nam̃elearuna.

⁵⁸Go Saul e noa ki nia, e naga, Nigo ku pei natu ni sei, natureai O? Go David e pasadara, po naga, Kinau a pei natu ni tea suasua anigo Yesse, tea ni Bethlehem.